人在中環

後出軌日子

2012-02-09T16:09:00.004+08:00

Joseph同Marie兩公婆，係朋友圈裡面出名既「小男人+惡妻」組合。

佢地兩個既相處模式，原則上係「Marie永遠是對的」。Marie話A，Joseph唔敢話B。Marie既要求幾無理都好，Joseph永遠想辦法滿足。

人家話，聰明既女孩子，總懂得在人前人後俾番幾分薄面自己個老公。假設呢個邏輯係正確既話，Marie肯定係一個愚蠢到頂點既女仔。事關Marie對Joseph，唔單止唔會俾面，Joseph偶有失神，盡管響大庭廣眾面前，Marie亦會對Joseph不留情面地高聲喝罵，而且說話句句有骨。試過有次，大班朋友食飯，Joseph夾左件Marie唔鍾意食既雞胸俾佢，Marie即時當住大班朋友面前發爛狂鬧Joseph。朋友們個個嚇到目定口呆，難委Joseph卻毫無反抗，任由Marie鬧至幾乎失聲。

Joseph同Marie係我大學既同學，佢地兩個以前，唔係咁架。

N年之前，反而係Joseph比較大男人，而Marie反而像個小島依人。大學畢業之後冇耐，佢地就結左婚。朋友圈裡面，佢地算係屬於比較早結婚既一對。婚後Joseph既事業發展得唔錯，職位升得越黎越高。事業得意既男人，開始得到越黎越多「老婆以外」既女性垂青，不久之後，Joseph出了軌，搞了個婚外情。至於那個婚外既情婦嘛…係佢地兩個結婚時，Marie姊妹團裡面既其中一員。

Joseph既呢段婚外情搞左兩年，後來Joseph回頭是岸，返番去Marie既身邊。至於果兩年「搞搞震」既日子，Joseph同Marie就雙雙絕跡於我地一班朋友圈既聚會。到佢地再次十指緊扣出現返響我地面前既時候，佢地兩個既相處「地位」，就逆轉到依家呢個模樣。

朋友們大概都估到佢地兩個「失蹤」果兩年，婚姻應該係出左問題，只係大家都係成年人，冇人問，亦冇人會玩篤爆。只係每次當Joseph被鬧既時候，佢都會向我呢個「知情人仕」報以一個無奈既眼神。

「咁係我當日對佢唔住，依家只能當係贖罪囉。裂痕，補唔番架啦。」這是事後Joseph曾經同我講過既說話。

我有時諗，男人步入中年，有點錢也有點事業，要搵出軌既機會，比起年青既時候其實仲要容易得多。只係出軌既故事聽得太多，但當中有好美好結局既，卻好似從未encounter過。風水師朋友同我批左個流年，話我今年桃花會好旺，叫我小心好自為之。然而像Joseph般既故事，發生在自己身邊，係個百份百既反面教材。桃花？no thank you啦。

至於Marie嘛…我反而覺得，冇錯Joseph係曾經做錯，兼且錯得厲害。然而觀乎今日Marie對Joseph既態度，到底係一種報復，抑或係自我既情緒失控？Joseph今日既然浪子回頭，而Marie又決定接受Joseph既回來（至少表面上如是…），縱使人到中年，但未來日子還是流流長，反正決定左繼續同呢個人一齊，何不放下過去，好好用心經營呢段失而復得既婚姻？

繼續如此下去，大概誰都沒有好處。

暴發戶的自信

2012-01-31T17:46:00.000+08:00

我認識一個「暴發戶」朋友，咀臉好討厭。

響未「暴發」之前，呢位朋友其實為人OK既，只不過，響落難既日子裡面，被比他有財有勢既人欺壓得好厲害，不斷被人看扁，心中有氣。後來朋友籍住一次偶然既機會發左達，佢既人生從此就改變。

「暴發」係blessing，亦係咀咒。「暴發」之後，朋友要同過去既自己劃清界線，由生活習慣去到日常跟其他人相處，都變得恃勢凌人。一副「我大把錢俾」既模樣。稍有不合自己意思既事，就大吵大鬧，惡形惡相。從前我所認識既那位謙厚忍讓既朋友，消失得無影無蹤。

我呢位朋友，來自國內。

人會變，至於變既程度，可以大到你唔相信。然而經歷這種「暴發」過程既國內人，我相信其實為數不少。呢一堆「暴發戶」，有幾多係屬於會響廣東道橫行既呢？

*****

我成日有個諗法：人之所以會惡形惡相，好大程度上係因為欠缺自信心。你認為人地唔俾面你，心裡面總係覺得人地睇你唔起，於是你就會死命裝出一副惡形惡相既面孔，去「主動」話俾人聽，你係一個「需要被尊重」，與及「不應被睇小」既角色。呢個pattern，唔係淨係apply響國內遊客身上。事實上，同樣既事情，響好多本地既辦公室，甚至親朋戚友既圈子裡面亦時有發生。

問題係，惡形惡相通常換唔到真正既尊重。你若但求即時拿點著數，人家礙於你響大庭廣眾既地方發爛渣，為左唔好阻住做生意，給你一點著數多少屬無可奈何。然而真正既尊重，你卻永遠得唔到手。有錢固然唔係大晒，但好多「暴發」左既人，仲係唔明白，點解自己咁有錢，都硬係一次又一次地得唔到自己認為「應得」既尊重？佢地以為，可能只係人地「唔清楚」佢原來有幾多錢，於是不斷做更多既事，希望讓人知道自己係真係好x有錢，點知，越做，就越樣衰。

當自己心底裡面，其實仲有少少睇唔起自己既時候，查實外人又點會尊重你呢。要贏得尊重，通常越惡，越輸。要大聲夾惡先能換來尊重，係因為你仲未夠班囉。

*****

我其實好唔鐘意，話香港要依賴大陸去support才可以生存既呢個講法。香港係一個幾百萬人口既城市，而大陸係一個有十幾億人口既國家。大家根本就唔係同一個層面既東西。正如你會唔會話，紐約要依賴美國先能夠生存，又或者倫敦好依賴英國去support？

然而每個城市都有佢既獨特性，而呢d獨特既地方，造就左佢地響國家/地區、以至世界裡面不同既角色。冇話邊個support邊個既。我亦討厭果d懶係識時務既人成日話，阿爺係大我地係細，所以咩野都要與以遷就既講法。傻啦，宜家唔係咸豐年，唔係仲有皇上同奴材之分既年代。一個城市既獨特性，係有實質既利用價值既，大家互惠互利遮。然而我最頂唔順，有部份人主張要處處改變自己迎合大陸。please，有朝一日你改變到自己同是但一個國內城市一模一樣，一d獨特性都冇果陣，你就真係一文不值啦。

*****

有關狗…

我響度諗，如果有日行街，響你腳邊出現左隻狂吠既傻惡犬，你有冇需要為呢條狗動氣？

一生人要動氣既事情好多，但下下都要動真氣，自己辛苦得黎又傷身。至於選擇「邊d氣先要動」既準則，我就傾向先睇一睇，激怒你既到底係個咩水平既人囉。如果，激嬲你果條友(…又或者係果條「狗」)根本係個水平甚低既生物，唉，就勞氣都慳返啦。

雖然，有d惡狗真係樣衰到「欠揍」既。

有關寫作

2012-01-26T14:00:00.001+08:00

恭喜發財！

像我這種低水平既寫手，註定係唔能夠單靠寫作養家。如果你問我，龍年有咩願望嘛…

寫野係興趣，今日我可以接受微薄既稿費繼續寫字，係因為我有份正職，幫我賺錢養妻活兒。生意係正職，寫稿係副業。咁如果，正職同副業既位置可以對調，查實就真係過癮啦。當然，現實歸現實，呢個願望能夠實現既機會，我相信近乎零。

*****
細個讀書既時候，我中文作文既分數，其實蠻低既。我既文章別字多，語句又不通，最大鑊係成日寫埋d九唔搭八既野。最記得小學某次作文題目係「尋寶記」，老師叫我地寫一個尋寶既短篇故事出黎。我就偏偏貪過癮，寫左個「尋唔到寶」既故仔出黎，仲要安排文章裡面果幾個「主角」，搵左一大餐原來係俾自己個老師整蠱，老點佢地去尋寶芸芸。

老師見到一個五年班既死0靚仔寫埋d咁「大逆不道」既文章，梗係俾個「肥佬」我篇文啦，再加貓麵一大碗，話我作文離晒題，兼諗埋晒d「唔應該諗」既野，仲要罰我重新寫過一篇。

我問老師：「點解『尋寶記』既結局一定係要尋到寶呢？」

後來我明白到，響學校作文要高分，其實係有formula既。內容同主線，最緊要夠行貨，唔好諗住寫d乜野突出既題材同概念，切忌疑似政治不正確。每篇文加入適當「份量」既成語同排比句。寫文之前，要記得查定辭典，搵出一個半個深到老師都要查字典先識既詞語，響文章裡面求其搵個位塞入去，主要用黎拋窒個老師，然後盡量減少錯別字，你篇文，貼硬堂。

中四果年，作文科既第一名，我就係靠呢條方程式攞返黎。

可悲嗎？

*****
有日老婆望住屋企書架上面果四本《人在中環》，問我：「老公，查實你寫黎寫去都係寫d辦公室故事，你唔悶咩？」

「悶呀…」我答：「但係唔寫呢d，我可以寫d乜？」

老婆同我講呢番說話既前一日，我地正正去左戲院睇戲。

「emmm…例如小說丫。」老婆話：「哈哈，你估你寫唔寫到一本好似《那些年》既書出黎？」

根據電影裡面所講，九把刀既年紀應該同我唔差太遠，我查實都係活響果個年代。寫一d唔同既野，我查實一直都想，不過一路都係得個想字。每當公司同事call黎話有乜大鑊野，乜野「理想」既想法都即刻擺埋一邊。

「難些少囉老婆…」我答：「雖然話每個男孩子心裡面都有個沈佳宜，但係我個沈佳宜已經響我身邊，心裡面冇乜遺憾，呢d故仔，好難寫得出喎。」

呢個當然係籍口，唔夠決心先至係真。

*****

農曆新年，Kelly帶住仲係手抱既BB到我屋企拜年。

「有個問題想問你。」Kelly說。

「問丫。」我答。

「早排呢，我上網睇到有關唐英年感情缺失果單野，點知link下link下，link到去有個中環老闆既blog度，講話乜野四個朋友之中就有一個有婚外情喎。」

「咁呢？」我若無其事地說。

「咁我又繼續睇左佢其他有關office故事既post…仲有佢d舊既專欄囉…」Kelly鬼馬地笑了笑。

「哦。」我敷衍地應了一聲。

「老闆，果d故仔呢，唔好寫得咁白啦。當事人睇到，一睇就認得出架啦。」

「都唔知你講乜…」

「不過老闆…」Kelly拍了一拍我膊頭：「多謝晒。」

我響度諗，呢個報紙專欄寫左近六年，去到最近先有舊同事發現，其實係咪算係好彩？

抑或應該算係失敗？

祝大家龍年事事順利，平安健康。

有限可能

2012-01-19T17:45:00.003+08:00

小老闆響年尾既工作，係不斷咁簽支票，不斷咁俾錢。呢個動作年年如是，個個都等錢過年，唯獨做老闆既，一年之中，最窮就係呢段時間。

最近接到有個幾年冇見朋友既電話，佢想創業，所以打電話黎問我意見。呢幾年，同我同期出身既朋友，大部份都人到中年，打工打到悶，亦見到前景既盡頭大概會響邊度。安穩可能有餘，但挑戰欠奉，於是紛紛投身創業大軍。我呢個「兼職顧問」，呢三幾年收過好幾個類似既「查詢」。事實上，面對呢班舊朋友，我亦樂意充當呢個角式。坦白講，好多朋友好耐冇見，要見面，pickup返一d friendship，總要有點理由。如果呢個「顧問」角色，可以讓我pickup返多一d朋友既話，何樂而不為？

人老左，我發覺似乎係越黎越怕醜。其實，電話contact list裡面，有好多好耐冇見既朋友，心裡面其實好想得閒約出黎聚一聚，只係唔知乜野原因，覺得無啦啦搵人出黎好似「唔多好意思」咁。係囉，到底點解會覺得「唔好意思」既呢？

農曆年假期，如果有呢d好耐冇見既朋友call我既話，我諗我一定會應約。

*****

出黎做事之後，事業上時不時就會遇到一d樽頸位。好彩既三幾年先遇到一次，唔好彩既，遇到一次之後就冇得再遇上，因為已經停咗響度冇郁過。

最近遇到樽頸既感覺，同年輕時遇到既時候，感覺有好大分別。年輕既時候，覺得天大地大，自己事業還未成形，一切都有可能。可能性越多，代表你可以行既路亦越多，引伸既結果係，突破樽頸既機會亦越大。年紀大，事業成左形，願意作出既改變亦少。無限可能變成有限可能。再度遇上瓶頸時，冇以前咁有志氣囉。

作為一個生意經營者，我成日都響度問自己，到底我能夠帶住我呢盤生意去到一個點樣既境界？集資上市？成為業界龍頭？又或者被收購完再被收購？以前我會望住一d類似咁既目標努力地向前行，因為年輕既時候，覺得咁樣先叫成就，老來先有故事同d仔仔女女講。然而當囝囝出世之後，我又忽然覺得：「超，查實做到又點？」

老人家話，目標係會隨住年紀不斷咁改變。我仲未完全體會到箇中既道理，但隨住年紀既增長，我反而覺得，從前既所謂「目標」似乎變得越黎越模糊。我並不肯定，從前我非常渴望得到既野，現在仲係咪有跟以前同樣既渴求。我期望人生可以有一d新既目標，能夠再次鼓動我既熱情，去replace我果d日漸變得模糊既舊target。不過響新target仲未出現既時候，感覺其實挺迷失既。

唔知呢d算唔算係中年危機？

大陸勢力

2012-01-18T16:18:00.000+08:00

幾個月前我到多倫多走左一轉。果邊既朋友同我講：「CK，家陣多倫多d樓好貴呀，貴到我地想買都買唔到呀。」

我冇去多倫多好幾年，我印象中，加拿大既樓係又大又好環境。殊不知今次去到既感覺，居然覺得果邊既樓房設計徹底地「香港化」，屋內既空間變得越黎越少，屋與屋之間既距離變得異常狹窄，屋內既間隔亦變得騎呢，但呎價卻以火箭速度向上升。

「加拿大黎架喎！」我怪叫：「乜咁多地方都搞成咁？」

二十年前左右，同樣響多倫多，我記得當時既本地人曾經抱怨，話太多香港移民湧入，令到當地既環境同經濟出現改變。樓房被香港移民炒貴晒，令到當地人既生活成本暴漲。

二十年之後，香港既移民同留學生，有唔少都選擇左回流。今日既唐人街其實唔多聽到廣東話，但普通話既聲音，就隨處都聽到。香港移民陸續離開，換入左更富有，為數更多既大陸移民。

當年一次香港人既移民潮，有本事將當地樓市一下子炒高。二十年後，呢一批大陸移民，比當年移民既香港中產家庭有錢不知幾多倍，當地既樓房，升勢自然比二十年前更加厲害。

國內人埋藏住太多購買力，只要一旦釋放出黎，其實去到邊度都一樣，會成為超級炸彈。

我響大陸有生意，亦認識唔少大陸朋友。奇就奇在，當大陸人響國內既時候，儘管佢地有部份既生活習慣我確實不能認同，但我覺得佢地普遍其實蠻有善既。只係當大陸人離開左自己國土，響人地既地方上，就總係變成剌蝟一樣生人勿近，咀臉都變得囂張討厭。到底係民族既自悲感積壓得太耐，抑或係會到海港城既國內人，都屬於國內某一個特定階層既人？

世界大同，係人都識講。「中港融合」四個字，呢幾年出自政府口中，聽過唔知幾多次。然而有時融合唔到，夾硬去做，到頭黎只係打崩頭。我查實搞唔清楚，「中港融合」係咪等於叫香港大陸化。好多人有意無意都想咁做，但香港仲有些少剩如價值既地方，就係佢同大陸仲係存在些少分別。再繼續將香港大陸化，將香港既城市結構繼續改變去迎會大陸，咁香港仲有乜野價值？

邊個話老人家唔掂？

2012-01-10T13:27:00.001+08:00

What a come back.

謊言最動聽

2012-01-04T15:39:00.002+08:00

都知道，講有關揀「自己人」既標準，未必個個都岩聽。

但係如果你要我講出口，一d疑似好公道，好政治正確既說話，例如甚麼「工作能力最重要」、「用人一定會唯才是用」、又或者「努力工作自然會有回報」之類，我覺得呢d先係老闆最大既謊言，我查實真係講唔出。我寧願做個真小人好過。

「信任」係上位最重要既element。好多老闆即使如我一樣，係「信」字行頭，都未必夠膽講出口，就正正因為老闆自己都清楚，「信任」這回事，往往係好主觀，好個人。有主觀成份既野自然難言公平，同事們聽到自然未必覺得舒服。至於點解某某同事會特別獲得信任而另一d同事又唔得，往往好似鬼故一樣，解唔通。對我黎講，呢樣就係緣份囉。

至於點樣爭取信任，又係另一個課題，可以寫好多好多篇。

好多人會簡單地將「爭取信任」同「擦鞋」劃上等號，咁我就覺得膚淺得滯啦。

又，有好多人以為老闆喜歡有擦鞋仔響身邊，係因為擦鞋仔果d拍馬屁既說話，逗得老闆好開心。咁我又老實同你講，拍馬屁既說話，第一次聽你可能覺得好過癮，聽多幾次，你就會覺得好難頂。呢個世界，高手既馬屁精其實少之又少。大部份人嘗試做呢個角色時，都係演技拙劣，尚未開聲講對白，其實就已經被識破。只係被你拍馬屁果位，選唔選擇去篤爆你。

擦鞋既真正用途，並唔係好似氹細路咁，不斷去keep佢happy。而係當公司裡面有好多人，老闆跟本留意唔到你既時候，做些少野去讓老闆feel到你既存在。擦鞋既說話盡管虛偽到極，但當冇人留意到你既時候，你既動作，係send左個message俾老細，話佢知，你會at least 願意企佢果邊，他朝要搵自己友既話，不妨考慮一下我。

其實，到開始有人留意到你既時候，擦鞋既動作就已經要停。因為，擦鞋擦得太落力，講真的確係幾煩幾討人厭既。

我唔係想encourage人去做馬屁精，事實上，世上係有好多更聰明既人，根本係唔需要做呢個肉酸既擦鞋動作，但同樣可以爭取到上司既注意同信任。呢樣野，好講心思同策略。我只係想提醒下大家，單係將「工作做得好好」，冇錯可以換來上司既欣賞同感激，但卻未必收買到佢地既心。

那些叫你只管努力做、做、做，然後就能等待回報的人，如果唔係無知，就往往係別有用心。

事關這個謊言，太動聽啦。

*****

如果你對呢個topic有興趣，千祈唔好錯過呢篇，內容勁堅。

講個信字

2011-12-29T16:37:00.002+08:00

講個信字

除左已經離左職既Kelly之外，Amy係公司roster裡面，同我共事時間最長既同事。

講真，Amy肯定唔係最醒目，最有能力果批同事，不過經過長時間相處，Amy同我建立左足夠既信任，令我可以將好多confidential既事情交俾佢處理。一般政治正確既講法，作為老闆應該「用人唯才」先至岩，不過實情係，殘酷既商業社會裡面，「用人唯信」往往先係主流。事實上，「有才無信」既人，與及「有信無才」既人，你會點選擇？

建立「信任」要講緣份，世上可能有好多既有才華，亦有誠信既好同事。「有才有信」既人都得唔到上位既機會，所欠既，往往就係一點點跟上司既緣份。

*****

犯眾憎

Amy做野並唔係特別叻，事實上佢時不時亦有犯錯既地方。當初Emma既培訓安排係一個好例子。然而Amy之所以得到我信任，其中一個最重要既原因，係我清楚當佢知道到有問題既時候，佢一定唔會坐以待斃。佢諗既辦法未必係最好，但肯定既係，佢必定會做d野去嘗試解決問題。

呢個特質，睇落好似好普通，好理所當然。但經驗卻話俾我聽，真正擁有呢個特質既人其實少之又少。大部份人即使發現到問題，as long as個問題唔係大到會有即時既明顯影響，佢地都會傾向擺埋一邊。直至問題一直發哮，情況響無聲無色之間不斷惡化，到問題再一次浮現出黎既時候，已經去到冇得挽救既地步。問心講，辦公室裡面，這類人往往佔大多數。

Amy呢一個特質，對我黎講絕對係「有需要」。然而對好多同事黎講，佢就變成左果d，冇事搵事黎搞既麻煩人。好彩Amy份人平時對人都算識做有禮，否則佢呢個特質，響辦公室裡面，應該好容易會犯眾憎。

*****

老細揀「自己人」…

老細響辦公室裡面，一樣需要一些「自己人」，幫手去執行一些不同既人事安排。好多人聽到我咁講，總係會覺得這些「用人唯親」、「自己友」既概念好唔道德，好唔公平。亦係我這些城府深，滿腦子壞思想既老細，造就左一些最乞人憎既擦鞋仔出現。然而政治正確既說話，例如點樣先叫做公平公正，點樣先叫做大公無私，呢類說話邊個唔識講？但實情係，做老闆既亦都清楚，要公司行得暢順，辦公室裡面係需要有些「自己人」，響執行不同既事情上面充當住各式各樣既角色。

響辦公室裡面，老細其實無時無刻都響度留意，有冇邊個有potential可以做佢既「自己人」。至於係咪果d擦鞋擦得佢好開心就一定能夠「入選」？emmm，咁查實又未必。揀呢d人既其實有幾個條件，第一，要口密。不論男女，八婆feel，閒時喜歡講是講非既，幾落力去擦鞋都唔會揀佢。第二，切忌情緒不穩；第三；要肯接受現實，最驟忌剛烈性格及正義女神上身果款同事，與及第四，亦係最重要既，係人緣要夠好。即使同事們知道你係老細既「自己友」，同事亦唔會對你個人太過抗拒。呢一點其實最難，但係「自己人」其中一個最重要既角色係「橋樑」，同事抗拒你的話，你作為「自己友」既價值就會大減。

數左咁耐，「工作能力」到底排到未？

都話，用人係個「信」字行先囉，雖然我明白未必岩聽。

仲有，擦鞋要擦到有人肯「信」你，其實都要幾高技巧。

傳話員，全話完。

2011-12-26T22:09:00.000+08:00

「下個星期響上海既行程，我已經幫你安排好晒啦。」Emma拿著手上的記事簿：「唯獨係銀行果邊個appointment，佢地果邊仲未百份百可以confirm到我。我同佢地暫定左星期二早上10點鐘，如果有變既話，我會響呢邊幫你再安排，然之後sms你架啦。」

「唔該晒Emma。」我滿意地點了點頭。

「冇其他事既話，我出返去做野啦。」Emma說：「順便提一提你，Weather Forecast話上海下個星期溫度會驟降，記住帶多件衫。」

「Thank you Emma，會記住啦。」隨即Emma便離開了我的房間。

Emma進來時，我本來跟Kathy在開會。

「Emma依家好似做得幾好喎。」Kathy微笑說。

「多得當日你幫我train佢囉。」我話：「其實我一直都好奇，當日你同Amy夾左佢走之後，響果4個禮拜裡面，你地同佢做左d乜野特訓，可以令到佢有咁大既改善？」

「我跟本就冇俾過任何training佢。」Kathy說得一貫淡定。

我聽得有點不明白，當日我向Amy投訴Emma這個assistant唔肯用腦，淨係識得傳話，投訴既翌日，Amy同Kathy就一齊黎搵我，話要抽調Emma過去一個月。一個月之後，Emma回歸，表現猶如脫胎換骨。我心諗，響呢一個月裡面，Kathy一定係花左好大既力氣，幫我教好呢一位assistant…

「冇呃你架CK…我真係乜都冇做。」Kathy笑了笑：「我查實只係安排左Emma響我條team裡面，每日參與我地既工作。」

每日參與工作？咁Emma響未調過去幫Kathy之前，咪一樣每日同我一齊工作？咁係咪我既問題，令到Emma一直領略唔到，做好份工作既精髓所在？

「咁好明顯係你唔掂啦！」Kathy帶點鄙視眼神：「拿，事實擺在眼前，冇得抵賴。」

OK，我認輸。

「其實我自己都冇乜點教Emma，事實上，你係呢度既老闆，我係GM，除左你之外，職位最高既人就係我，我地兩個響公司裡面都係高層，而Emma係個初入職既同事，我諗，Either你同我，都唔係一個合適去教Emma既人。」

我響度諗，呢個真係問題？以前我都係咁教同事架啦，不嬲都唔覺得有乜唔妥。到底係公司規模大左，令到我同其他同事既距離遠左，還是我自己個人，響不知不覺間變左？

「我估大概係兩樣都有…」Kathy說得坦白：「一個老闆既說話，對一個剛出黎社會做事既新人黎講，永遠係個absolute order。當佢心裡面覺得，你講既說話，全部都係一個又一個不能違抗既『命令』時，佢點會有機會學習思考？」

「其實，即使佢過到去我果邊面對住我，情況都係一樣。不過我果邊既環境，同你果邊好唔同。Emma請返黎，係做你既assistant，幫你跟頭跟尾。佢響你果邊既environment基本上係working alone，冇teammates可言，所以完全唔會有role model可以跟。」Kathy娓娓道來：「響我果邊就唔同喎，佢有一大班同事同佢一齊work together，人地點做，佢有眼睇。好多時我地所謂教人，可以做既就只係用把口黎講，但係我地講一萬次，都唔及佢親眼睇一次一個同佢職位相若既人點樣做來得有效。」

「CK，千祈唔好睇少一個人身邊團隊既影響力呀。你話係佢向role model學習又得，你話係peer pressure又得。之但係，身邊冇人就九成九都唔得。」

我只能嘆口大氣。

「其實你向Amy投訴當晚，佢就走黎跟我傾過呢件事。」Kathy說：「佢話其實Emma唔係真係咁差，只係佢冇諗清楚，Emma既培訓應該點樣做。響冇做合適training既情況底下，就將個assistant送到你手上，其實等於送Emma去死。」

「所以佢搵你幫手？」我問：「你唔怕揹鑊咩？」

「我有乜所謂？」Kathy笑：「本來你就以經覺得佢唔得架啦，即使Emma跟住我一個月之後冇乜改善，怕且你都唔會怪我掛老細。」

況且Amy同Kathy— 直都只係話想同我「借個人用」，從來冇講過出口，話會幫我培訓Emma。

所以，我估即使Amy一心諗住搵Kathy幫手調教Emma，亦唔肯響我面前開口講得太白。對於佢地既「唔坦白」，我唔敢講到底是否應該，不過對佢地黎講，我明白，只要我唔堅持篤爆佢地，有些說話大家留些少空間，佢地會樂於繼續用如此既方法跟我溝通，令到一d有尷尬成份既situation，大家都比較容易落台。

仲有一件事，我心裡面其實很明白。

當我成日口口聲聲話，唔應該對年輕人有太多歧視既同時，響我心底裡面，我對年輕人既能力，好多時候其實還是充滿質疑。口不對心，或者正正係我慢慢「退化」成一個死老鬼既「病癥」。然而當面對年輕既同事們，我或者要接受既係，今天既年輕人，與我呢一代既人對社會既理解，其實係存在住一定既差異。呢種差異，我諗，其實可能就係所謂既「代溝」。

至於誰人既理解先至係「正確」，邊個對社會既解讀先至係「真理」，至少作為一個如CK般銅臭到極既生意佬，呢類問題既答案，唔應該係「有意義」既。

真正重要既，大概只係點樣幫相方收窄呢個差異。

但老鬼要明白既係，收窄差異，並唔係可以單靠高高在上地向年輕人說教就可以做得到。可悲既係，對此，我有不止不一次既慘敗經驗。

《全話完》

*****

對上幾集：

1) 傳話員
2) 已經係最好
3) 肯跑肯追
4) 傳話員之死

梗係唔可以啦！

2011-12-21T22:37:00.000+08:00

晚上六時零五分。

「唔好意思呀April…」May按著了辦公桌上的speaker phone：「岩岩有個客call in，想問你地條team負責既product，你可唔可以幫忙handle一下？」

「梗係唔可以啦！」speaker phone內傳來一把既兇兼且高八度的聲音：「你知唔知依家過左office hour架啦！」

隨即聽到「拍」一聲，電話被掛斷了。

「過左五分鐘遮，駛唔駛呀…」May小聲跟自己說。

我剛行出了自己的房間，碰巧讓我聽到整段對話。作為April的老闆，聽到她這番說話，不禁搖頭嘆息。

你大概以為我係因為April過左辦公時間五分鐘卻拒絕工作而感到不滿吧？

唔好誤會，同事們在辦公時間外拒絕OT，我反而覺得問題不大。反正佢做的話係人情，唔做係道理，當然佢肯幫忙的話我也許會對佢另眼相看，但佢選擇唔幫，我也覺得冇乜唔妥。

而真正讓我覺得唔妥當既，係April有冇必要用咁既態道去對待自己既工作夥伴？

我理解人人都心急趕放工返屋企，不過要推卻同事一個after office hour既工作請求，有好多方法可以讓大家都舒服一d。

比方話：「唔好意思呀May，依家過左office hour，個call我唔方便接啦。麻煩可唔可以幫我留低個客既contact，我聽朝call back佢丫，唔該。」

換左個表達方式同語氣，成件事會唔會唔同晒？

辦公室裡面，好多「恩恩怨怨」，好多時就係根源於一句半句說話既表達方式。

然而一個人能力既強弱，除左佢本身既工作能力之外，其中一個非常重要既element，就係佢能夠跟工作夥伴融洽相處既能耐。呢一part如果唔掂，其他部份叻到曉飛都係冇用。

祝大家有個愉快既冬至和聖誕。

傳話員之死

2011-12-20T22:24:00.001+08:00

我跟HR Amy投訴Emma表現強差人意既翌日早上，Emma同Kathy一齊到我房搵我。

「做乜事？」我問。

「冇…」Kathy微笑說：「我果邊呢排好忙呀，唔係好夠人用，所以想問你，可唔可以借用你位assistant一個月幫下我手。」

「你話Emma？」我斜眼望了一望Amy，她只是一直微笑，也沒有回避我的眼神：「 Emma新手黎架喎。佢真係幫到你？」

「放心，得架啦。」Kathy自信地點了點頭：「最緊要我借走你既人，唔會影響到你工作囉。如果你冇問題既話，一個月之後既今日，我準時還返位assistant俾你。」

Kathy同我提出呢個要求，其實根本唔需要搵埋Amy入黎。反正問完我話ok的話，跟手同Amy單一聲就可以啦。Amy入黎企響Kathy旁邊但係又唔出聲，成件事既setup，係話俾我聽，呢個「借人」既計劃，Amy係策劃者之一，而佢覺得係「有需要」俾我知道呢個事實。

「OK，我當然冇問題。」反正以現時Emma既表現，佢幫到我既野其實好有限。至於Kathy所講，佢果邊「唔夠人用」嘛，房間裡面既三個人，其實都好清楚呢個係一個大話，只係大家都冇打算將呢個「擺到明」既謊言篤爆。

「總之記住準時還番個人俾我就得啦。」我答說。

Kathy係個聰明人，而Amy就跟我共事多年，一直清都好清楚我既性格同要求。佢地兩個有呢個安排，雖然我唔敢肯定我所諗既係唔係佢地現在所想，不過我相信佢地兩個。

說話講得太多太白，有時仲麻煩。

培養佢乜乜物物

2011-12-14T18:06:00.000+08:00

對於培養囝囝既乜乜物物，不能否認我係抱住一個非常懶散既態度。「是但」同「夠過骨」係我常常掛響口邊既「教仔標準」。

我俾自己懶散既藉口係：如果個仔係唔掂既，就點谷都冇用。但係如果個仔係掂既，就唔駛你谷佢都會好掂。

OK，呢個當然係歪理，有d朋友對我呢個咁不負責任既諗法極之睇唔過眼。不過認真地諗，你其實又可以谷到個細路d乜？俾佢學習八國語言，還是十種樂器？

細細個可以俾人谷既，絕大部份都係一d「技能」。然而身上既技能越多，係咪就等於將來響社會上既競爭力就越大？我自己心入面既答案就一定係「No」。早幾日響報紙道寫過，一個人真正值錢既地方，係佢腦裡面既思考能力，而唔係身上面既一大堆技能。而思考能力，係透過一個人既經歷而培養出黎，並唔係可以「谷」到出黎囉。

有時我覺得最頂唔順既，係有d家長話要「培養」個仔某某方面既興趣，例如音樂咁丫，於是會谷個仔練琴，日練夜練。俾人咁谷法會「培養」得到興趣既話，我諗應該係天方夜譚。谷就係谷，唔好用「培養」呢個詞語黎混淆視聽啦。至於興趣嘛，我成日懷疑係咪真係可以靠個父母既努力而「培養」出黎。真正既興趣，正計係父母唔駛push佢，佢自動自覺都會去做，咁我諗果d就真係叫做興趣啦。emmm，如果要講example，我第一樣野就諗起打機。以前阿爸阿媽何曾有「培養」過我打機呢個興趣？但係即使我到左呢把年紀，都仲係對呢個「興趣」樂此不疲，所以話，興趣，邊駛靠阿爸阿媽出手幫你培養架呢？咁當然，我又相信，查實冇幾多個家長會認同，「打機」係一個值得培養既興趣黎既。

另一個我鍾愛既興趣係「踢波」，同樣係從來冇人嘗試過培養我呢方面既興趣。我其實好屎波，從來都冇乜天份，不過踢波帶到俾我既歡樂，咁多年來絕對係非一般既。其實一件事只要你做得開心，你自然唔需要任何額外鼓勵、又或者一d刻意既栽培，你都會不離不棄咁繼續做落去。對住個幾歲豆丁，你話培養佢乜乜物物喎，當中有幾多其實係自欺欺人既謊言？

OK，咁我其實都不能否認，我都有「培養」囝囝一d野既。我都努力去嘗試「培養」佢成為同我一樣，做阿仙奴既球迷囉。well，老實講，即使係呢樣，查實我覺得都係好自私既，事關佢響呢個階段，絕對係阿爸話事。佢著響身上既波衫一定係阿仙奴，星期六晚既電視節目亦一定係阿記既比賽，小孩子，好可悲地係無得選擇既。只不過，假如我「谷」左佢多年之後，佢他朝有一日話俾我呢個阿爸聽，話佢其實係鍾意曼城又或者車路士的話，我諗我應該會超級失望。

唉，所以話，培養佢乜乜物物都勢係假，所謂「培養」，當中查實有好大部份係父母既私心。

一個人聖誕

2011-12-09T13:18:00.001+08:00

「ok，finally it's done…」我正在跟Kathy討論明年公司的sales target：「終於可以舒舒服服過年啦。」

Kathy點頭笑了笑：「By the way，我訂左機票去上海，同佢地傾埋下年年頭個project既細節。廿三號放工後飛，廿八號先返黎。果幾日香港應該冇乜野做，個schedule冇問題嘛？」

「冇問題啦…」對於身邊幾個management同事出trip的時間，我一向都冇乜意見：「你地話得ok，我邊次話唔ok架？」

咦，咪住。

「Kathy，你呢個schedule，咪即係要響上海過聖誕？」我問。

「係呀，咁咪好囉，慳返d時間。」Kathy一貫淡定：「上面聖誕節唔放假丫嘛。」

「我夠知上面冇假放啦…」我搖了搖頭：「我講緊你呀。有冇需要咁搏呀？話晒X'mas，去玩又好去搵下朋友又好啦，我唔想公司蠶食你既私人生活喎。」

「有乜所謂？」Kathy嘆了口氣：「反正我一個人之嘛。去到呢把年紀，X'mas呢d節日，對我地唔係咁重要架啦。」

oops，Kathy其實仲要比我年輕少少，之但係，我去到「呢把年紀」，我仍然覺得，呢d大節日對我好重要。特別係我家光頭仔出世之後，呢d大時大節，你要我返工，我打死都唔制。

至於仍然單身既Kathy，可能有另一種諗法掛。

老實講，我查實到依家都唔係好明，Kathy點解會係單身既。Kathy黎左我公司做既第一個好處係，帶左「名氣」俾我間公司仔。行家、supplier見過Kathy真人之後，「CK間公司請左個靚女GM」既傳聞就極速響行家裡面傳開。有冇因為咁而令公司多到生意我就唔敢講，不過「靚女GM」個朵，響業內還是幾響既。

Kathy個人，老實講其實亦唔難相處。未識佢之前覺得佢比較cool，但係識落，查實佢都幾nice既。當日我曾經擔心，佢比較cool既外表同作風，會令佢同同事相處有問題，但係日子耐左，反而發覺剛剛相反。佢有d「大家姐」性格，好多時候佢會好攬自己下屬，試過好幾次因為咁同我嘈添。同事們覺得呢個阿頭係「義氣仔女」，相處亦變得融洽。

反而最大鑊既，係Kathy其實周身病痛。據講係之前份工太過辛苦而捱壞左身子。well，事實上，同Kathy相處左近兩年，我成日用「冇brake」去形容佢份人。工作開始左，根本就唔會停落黎，不斷地「透支」自己既體能。oh please，我唔想有同事會響我公司裡面殉職。

好彩佢唔係用同一個standard去要求佢班手下。

我從來都唔敢問佢有關佢感情既生活，或者以前係咪遇過d乜野唔開心既經歷，令到佢變成今日既Kathy。事必總有因，每一個工作狂背後總有一點小故事。

一個人在上海過聖誕，似乎係Kathy堅定不移既決定。單身既靚女GM，對我呢個市儈既老闆黎講，可能係最好既伙計樣版。

祝大家有個愉快既週末。

肯跑肯追

2011-12-01T15:53:00.001+08:00

HR既Amy同我一樣係足球迷。唔同既係，佢捧曼聯，而我卻係死硬既阿仙奴Fans。雖然大家既「選擇」不一致，但「語言」卻相同，所以我地之間既說話，好多時都會借足球黎做一些比喻。

我成日將我呢間小公司，比喻為一間小球會。小球會既現實係，你唔會俾得起請C朗、美斯呢d球星既人工。OK，即使你個袋有大把，真係俾得起錢，呢d球星亦唔會輕易睇得起你隊波，而選擇加入你地。

然而小球會有小球會既生存之道。有d會越打越沉，最後降班收場。有d則會穩打穩紮，穩步上揚。然而後者既球員裡面，偶然會有一、兩個好球員相對比較有talent，但大步份都係偏向平庸。不過呢d穩步上揚既小球會，球員通常都有一個特質，就係肯追肯跑。

作為一個生意人，當然明白乜野叫做一分錢一分貨。然而一件貨同一個人既分別係，貨係一件死物，次貨就係次貨，冇野可以改變。而人卻係有無限既可能，面對唔同環境同情況，能夠作出唔同既適應同配合，縱使唔能夠由平庸一下子變成天才，卻依然能發揮出無比既效能。

我覺得做球員又好，打工仔又好，最重要係知道自己正處於一個點樣既位置。我之前提過，過去既日子裡面，我遇過一d我認為好有potential同質素既「失意人」。之所以認為佢地有potential，並唔係因為覺得佢地能力特別高、資質特別好。呢一班人既共通點係，佢地都清楚自己並唔係C朗、唔係美斯，佢地亦明白自己需要被琢磨，面前仲有好多事情需要學。佢地並唔係特別特出，但心裡面卻準備好，當落場既時候，會努力咁跑。簡單d講，你feel到佢地有火。

記得以前做interview既時候，有好多年輕人介紹自己既時候，都會話自己好肯學。「肯學」兩個字，講出黎作為見工時口頭襌既居多，真正「肯學」既，反而少之又少。小球會唔會奢望，出個平價可以買到球星級既talent返黎，但係縱使手上既talent唔夠大球會強勁，落到場比賽，你同樣會expect你班球員落力跑落力追波。你最多可能跑得慢d，但係至低限度，你係要出力咁去跑。

我能夠接受既現實係，小球會因為財力同名氣問題，冇辦法吸引最頂班既talent返黎，呢一樣並唔麼該怨。不過小球會想recruit既，係一班肯跑、肯追波同爛打既球員。如果一個球員本身talent都已經唔足夠，仲要加埋唔肯跑唔肯追波，你叫個領隊點樣教？

當然，球員唔肯跑有好多原因。有d會因為覺得份波糧唔夠motivating，有d又會因為個領隊乞人憎。呢d問題，我覺得都唔難解決，只要溝通得好d，大家有點體諒，落到場佢自然會肯繼續努力去跑。

最難搞既球員係，佢唔知係聽阿媽講，抑或自己「悟出道理」，以為球員落場踢波係「唔應該」跑同出汗，而「企定定響龍門前面等波到」先至係王道。你同佢講勸佢跑多兩步去追波，佢會質疑返你係咪唔識球例。然而我所認識既足球，係要透過球員不斷跑動走位才可以製造空位同機會入波，但當發覺原來大家其實係各自玩緊兩種唔同既「運動」時，咁點教都係嘥心機。

已經係最好

2011-11-30T12:50:00.001+08:00

當日Emma經過HR面試，係我地公司approve左，Emma係「適合」我地既需要，先請佢返黎。如今麻煩老細覺得Emma唔岩用，責任應該要算到邊個頭上？

負責HR既Amy，係拍板請Emma既同事。

「唔係想怪你…」我跟Amy說：「但係我地響請人同揀人既過程裡面，會唔會需要refine一下？」

「CK，講真今日既事，我其實唔係好意外。」Amy說話好淡定：「請Emma既時候，都知佢有呢d問題。同你一齊做嘢咁耐，都知呢個recruitment你實唔岩心水架啦。」

「係囉，咁點解仲揀佢呢？」我跟Amy共事了好一段日子，我清楚佢絕對唔係果d做野是是但但既人。

「因為佢已經係呢一轉黎interview既candidates當中，最好果一個囉。」Amy一臉無奈：「公司唔夠人用係事實，唔請唔得。我只能夠響手上既candidates當中，揀個最好既出黎。坦白講丫，呢幾年請人既情況，其實好多時都係咁。Emma既缺點係唔主動，反應唔敏捷，呢個problem響interview既時候經已察覺得到。」

「其他candidates有幾差？」我問。

「請Junior，No Show既起碼有一半…」Amy無奈地嘆了一口大氣：「有show up既，又有差唔多一半會令你覺得係騎呢怪。剩返仲算係『正常』既，所剩無幾架咋。」

我其實真係好耐冇參與請人既interview，特別係請Junior post，參與既機會就更加少。響呢方面，我諗我真係Out左啦。我仲有參與interview既時候，經濟並冇依家咁好，當時既失業率亦高企。當時黎面試見工既人，雖然當中不乏騎呢鬼，但係時不時仍讓我撞見一些我覺得好有potential同高質素既「失意人」。今時今日，香港幾乎全民就業，呢一d質素高既失意人，輾轉流落去到我呢類小公司interview既機會，理所當然係變得少之又少。

我公司的會議室，外牆係用玻璃做，所以有時可以睇到裡面既情況。早陣子我見到會議室裡面，無啦啦坐左個一身Rock友打扮既人響入面，檯上面仲放住一對鼓棍。後來問返同事，先知道當日果個「鼓佬」，原來係黎見工既。再早一排，又試過有個阿媽帶住個女黎見工，面試全程企響meeting room既玻璃外牆出面「監場」，千奇百怪，要幾騎呢有幾騎呢。Amy話今時今日請人，剩餘還可以選擇既其實「所剩無己」，查實我信。

中小企招聘，一向都唔係容易。

Amy問我，係咪打算換走Emma。

換唔換一個同事，查實原因會有好多既。但大前題係，換返黎既新人，要比舊人優勝先至有價值。唔同既時間，響市場上搵到「更佳」補替既機會，都會唔同。咁假如Amy所講既現況屬實，Emma可能已經係呢個moment，我地能夠搵到最好既option。如果係咁，仲換？

傳話員

2011-11-25T13:00:00.001+08:00

「Emma，麻煩你聯絡d suppliers…」我將新設計模型既草圖交到去Emma手上：「安排佢地幫呢個模型做個mock-up出黎丫。」

Emma點了點頭，示意明白。

「你睇得明個草圖嗎？」我擔心草圖線條太複雜。

Emma還是點了點頭：「冇問題，我睇得明。」

唔到五分鐘，Emma敲門入我房間：「老細，個supplier話做唔到喎。」

我皺了一皺眉頭：「咁即係點？」

Emma大概係被我反問有點不知所措：「errr…」

之後，Emma就一直企響我書檯前面，冇再出聲，亦冇表情，期望我「出句聲」打破房間內忽然變得僵硬的氣氛。

我只能嘆口大氣。

*****

係咪我要求太高？

一個新既設計，supplier話做唔到。講真我一d都唔覺得意外。令我意外既係，當同事面對類似既非routine性「問題」，所表現出黎既處理手法。

「supplier果邊有冇講，因為乜野原因做唔到？」我問Emma：「係錢既問題，抑或係技術問題丫？」

我覺得當你遇上剛剛這個疑難時，向supplier問一問「點解？」，應該算係最基本既反應。做唔到，總有個原因。要解決問題，首先要知道問題響邊度。點解連呢一步都未行，同事就會拿拿臨返入黎，將個波拋返俾我？

Emma聽完我既說話，又點了點頭示意明白。於是拿拿臨出返去。幾分鐘之後，又敲門入黎：「CK，supplier話係技術上做唔到喎…」

「and?」我心裡面一陣悶氣。

當然又係換黎一段dead air。

我心裡面即時有一大堆問題：技術上做唔到，係邊一part既技術上出左困難？係咪草圖上面某一部份稍作改動就可以過到關？呢個supplier既技術追唔上做唔到，其他supplier會唔會有辦法做得到？有冇試過call其他supplier問一問…

My Goodness.

Emma係個相對新手既同事，你或者會話：「CK，咪要求咁高，冇經驗嘛。」

我都想嘗試用「經驗唔夠」去說服自己唔好對Emma存有偏見，不過，今次輪到我「做唔到」。

「冇經驗」最大既麻煩，係令你面對一些未遇過既事情時「唔識點做」，然而「冇經驗」卻唔會令人選擇「索性唔做」，然之後交返個波俾你。

我相信Emma唔係特登練精學懶，專登將工作卸落黎唔做。但係更大鑊既係，佢真係天真到，以為自己既工作「經以完結」，而且辦得妥當。佢覺得自己既職責，只係幫我按個電話，傳個話。當中運用到既器官，包括手指、耳朵同咀巴，但並唔包括腦袋。

良久。

「errr…總之佢地話係技術上做唔到囉。」Emma將說話重複多一次。

我知道，講落去大概冇乜意思，呢件事，我應該要搵過另一個同事代Emma去處理。正當我諗緊應該搵邊個代替Emma時，佢一直企響我檯前，擔天望地，默不作聲兼且一臉惘然，期待我快快出句聲打破沉寂。

我心諗，小姐，假如你覺得你任務已經完成，至少你都出句聲話「冇事既話我出返去做野啦…」，唔係下下等我開口丫。

我無奈再嘆一口大氣：「OK，唔該晒Emma，冇其他事啦，麻煩你出返去做野啦。」

關上門，我忍唔住call HR部門：「我係CK，我想問，當日到底係邊個同事負責Emma既interview？」

祝大家有個愉快既週末。

忠於自己

2011-11-18T17:51:00.001+08:00

「damn it，我真係唔能夠繼續落去，i want to quit。」

記唔記得，對上一次跟自己講類似既說話，係幾耐之前？

女性朋友面對自己既工作，覺得好煩厭。冇滿足感、冇前途、而且人事關係錯綜複雜。一句到尾，「返工，好唔開心。」

quit a job需要勇氣之餘，更需要既係計劃。冇計劃而辭職既結果往往係，now you have quit it, then what?

因為「頂唔順」而辭工既朋友，往往好快又會去搵返份差唔多既工作。然而當你搵返份差不多既工作之時，從前頂唔順、令你唔happy既elements，響果份性質差無幾既「新」工作當中，同樣存在。於是不久之後，你又同樣再次頂唔順，再次want to quit。從地獄甲，逃到去地獄乙，唔見得會令你得到重生。

「你講到咁，我應該點呀？」朋友顯然對我嚴重掃興既comments感到很冇癮，事實上我懷疑，假如我落力和應佢既想法，稍為推波助瀾，明天佢老細既檯面，應該會放著朋友漏夜打好既resign letter。

寫左近五年專欄，類似既問題，其實收過好多次讀者「查詢」。可惜我唔係社工、亦唔係心理醫生，對於來信朋友「好想辭工」既衝動，我其實並唔太懂得應對。不過經驗話俾我聽，衝動往往令人冇辦法認清形勢，情緒太過高漲亦會阻礙對自己真實感受既評估。我通常會問返佢地：「如果冷靜一點去諗，你到底真係want to quit，還是只想have a break？」

前後兩者既處理手法，我相信差別應該會好大。

年青既時候，want to quit既聲音時不時會響我腦裡面響起。年少氣盛既ＣＫ好幾次順應自己心裡既「呼喚」，真係quit左。quit果一刻，爽到不得了，不到幾日，身邊開始有不同既雜音，話你應該咁咁咁，批評你應該「捱多陣」、再黎一堆三姑六婆同街坊講你有幾唔長進，辭左份工做蛀米大蟲…於是當時冇乜腦既我又琴琴青走去搵番份差唔多既工。待遇依舊，痛苦也依舊。地獄甲同地獄乙，查實冇分別。

今日，小弟人到中年，三姑六婆既說話當然唔再能夠左右到我。然而人越黎越老，發覺做每件事，都應該有一個忠於自己既理由。做一份工如是，quit一份工也如是。

但係點樣先叫做「忠於自己」？你其實諗清楚未？響還未搞清楚如何才算「忠於自己」之前，quit，應該唔會幫到你。

祝大家有個愉快既週末。

7 Years Club

2011-11-10T13:02:00.003+08:00

上一次回來這個以前留學的地方，是差不多五年前的事。那時，大家還很好的。

我走進了Don的新居，感到很驚訝。屋內的擺設，宗教味道很濃。我一直認識的Don，從來也不是這樣虔誠的。

「係宗教救左我…」Don見我一臉驚奇，於是慢慢向我解釋：「離婚之後，我人生變到一片混亂。我以為我應該要死架啦。」

書桌上面有一包封了塵的藥包，吸引了我的視線。

「係抗抑鬱藥。」Don搭著我的膊頭：「呢隻藥我食左差不多三年。直至我陰差陽錯，半年前我參加了一個朝聖團，旅程之後，我就唔需要再食藥啦。係天主將我從地獄裡面拉回來。」

我點了點頭，心裡想：「呢幾年究竟發生左乜野事，令到一班老朋友們搞成咁？」

*****

大學畢業前一年的X'mas。

「拿就咁…」最愛說話的Gray在派對裡飲大兩杯：「出年呢，我就同Lily拍左七年拖啦。我地呢班人，仲有另外兩pair；阿Don同Jessie，CK同Stephy出年都滿七年啦。人人都話有七年之癢，我就放長雙眼，睇下我地呢三pair人，捱唔捱得過呢一年。捱得過既話，出年聖誕，我地搞個大大既party賀賀佢！」

「好呀！」我身邊的Stephy說：「Gary你講得出要做得到呀，你身邊最多女仔tum tum轉，最高危係你呀，今年記住要守規矩喎。」

「車！你少擔心！」Gary一副得戚模樣：「Lily識我果陣都知我多女仔朋友架啦！佢不嬲都唔介意既。要擔心，擔心阿Don先啦！」

「點解要擔心我？」阿Don一臉疑惑。

「你查實日日俾Jessie呼呼喝喝，你唔辛苦架咩？」Gary一向口沒遮攔：「做男人點可以咁冇尊嚴架，咁樣俾個女朋友食住，係你先忍得到架咋。我早就叫你飛左佢你又唔聽，拖下拖下，家陣七年都黎啦。」

「喂，Gary你咪成日咁針對住阿Jessie啦！」Don老沒好氣地回答：「我查實覺得冇乜野喎。我覺得佢管得我幾好丫…」

「你被虐狂牙？」Gary大力拍了Don個頭一下：「呢d野男人講架咩？」

「超！」我忍唔住搭咀：「咁人地一個願打，一個願捱，你理得人啫？」

「Shhhh…」Stephy特然細聲講：「唔好再講啦，Jessie過緊黎…」

「拿，總之大家記得呀…」Gary嘗試急急將說話講完：「出年我地呢三pair仲未散既話，要搞個大party賀賀佢，聽者有份…」

*****

「你響香港有冇見過Gary？」Don問。

「有，飛過黎之前剛剛見過。」我笑了笑：「佢仲叫我問候你…」

「佢幾好嘛？」

「同你一樣，離左婚。」我嘆了一口大氣：「不過你知佢架啦，佢又識左個新女友啦，超嫩口呀。」

「呢條死仔，成世人都係咁。」Don低頭笑了笑。

每個人都有自己治療傷口既方法。Don選擇了宗教，Gary則選擇用一段又一段新戀情去療傷。方法需然不同，但效果則同樣見效。

對於Don同Gary兩個故事，我其實有好多想寫，只係唔知從何寫起。

我結婚都快七年，早陣子同老婆一齊返去讀書既地方探朋友，其中一個被人問得最多的問題係：「CK、Stephy，就快結婚七年啦喎，癢唔癢呀？」

嘿嘿。

查實要癢，點解一定要等七年？

(待續…如果仲有心情寫的話。)

今日是明天的那些年

2011-10-27T17:34:00.001+08:00

「那些年」，你睇左未？

我未，不過近一個禮拜，個個都響度講。公司有同事睇左，話好感動，叫我呢d「老人家」快d去睇，好好去懷緬一下已經逝去左既青春。

「我頂你丫…」我心諗。

響我認識既，而又睇左呢套電影既人當中，我發覺有一個少少奇怪既現象：以一pair男女為例，提議話想去睇既，通常會係個女既，但係睇完之後，對套戲讚不絕口果個，反而係個男仔。唔係話d女仔唔鍾意睇，只係估唔到，男仔會比自己個女朋友對套戲更有共鳴。

另一句我響facebook度見到有關呢套戲既comment係咁既：

「講真套戲並唔係大家所講既咁感動，但真正感動到你既，其實係屬於你自己的『那些年』。」

*****

懷緬青春係老人家既指定動作。對於屬於我自己既「那些年」，我當然懷念。但係諗返轉頭，我其實有點後悔，點解當年我唔懂得好好去享受當時既日子？年輕時候所遇到既痛楚同困難，到你長大之後望返轉頭，往往會一笑置之，覺得並唔係一回事。然而當日身處其中，卻覺得自己好似面對世界末日一樣。我覺得唔抵，係當我睇返轉頭，我發覺年輕時既自己，相比現在係「有條件」能夠開心得多。我冇好好把握那個一閃即逝既時間去盡情享受，反而不時沉溺響自尋煩惱既痛楚當中，我覺得蝕晒章啦。

於是到左今日，我只能夠從「懷緬」當中，再一次享受當年既情懷同快樂，當中被逼夾雜住見證自己「年華老去」既唏噓，幾唔抵？

同樣既錯誤，我唔打算再犯。從前發生既事變成現在腦袋裡的「那些年」，同樣，今日我在做既事，所過既生活，亦會變成將來我回憶裡面既「那些年」。現在，就應該要盡情享受。日後懷緬當年既時候，起碼唔會覺得蝕左。

*****

公司裡面有個男同事，同女朋友去睇呢套戲。男同事話，套戲令佢諗返起從前讀書時果位女朋友仔，感覺幾咁唏噓。男同事睇完套戲後，坦白到同女朋友分享呢個感受。OK，坦白係有代價既。

其實，女孩子真係會因為咁樣而吃醋嗎？

我今晚都約左老婆睇呢套戲。睇完之後，我係咪都應該小心一d講野？

我這個悶蛋的「那些年」，其實還不又是跟她在一起？簡單，有時最幸福。

能跟誰說真心話

2011-10-13T12:28:00.000+08:00

到上海出trip，晚上約左舊朋友Ivan到酒吧聚聚舊。

Ivan七年前左右，被公司派註上海。朋友當日認為自己仲後生，而且男兒志在四方，離開香港咪離開香港囉。調派外地既報酬係升職加薪。幾年間，Ivan既職位升到好高啦。上年本來公司想調返佢返黎香港，點知佢一口就拒絕左。理由好簡單，幾年前佢識左個上海姑娘，冇幾耐仲結埋婚。早幾個月前仲幫佢生左個女。Ivan雖然係香港人，但其實早就響上海落地生根。

「個個留響度唔願走既香港人，都係同我差唔多既故事架啦。」朋友響我耳邊大嗌，但係十呎之外有隊Live Band響度大唱搖滾音樂，令我依然聽得好辛苦。

「不過CK…」Ivan繼續響我耳邊放聲大叫：「覺唔覺，我地人到中年，要開心變得越黎越艱難？」

「點解咁講？」我喝了一口啤酒，出盡氣力在Ivan耳邊大叫：「你有錢有面有靚老婆家陣仲有個寶貝女，仲唔開心？」

「問你一個問題丫…」Ivan一臉認真：「你心裡面既真心話，通常會同咩人傾訴？」

「老婆囉。」我諗都唔駛諗：「唔通同個野都未識講既囝囝講咩。」

「CK，我好羨慕你呀。」Ivan苦笑：「我諗我能夠同你講既真心話，都要比同我老婆講既多。」

「你有d乜秘密唔同得你老婆講呀？」我說：「你好爛滾咩？還是你有感情缺失講唔出口呀？」

Ivan結婚既時候，我都有飛上黎飲。佢太太係個廣告模特兒，當然係樣靚身材正。我當時仲笑佢，唔怪得你唔肯返落黎香港啦。除左外表吸引之外，我其實對佢太太既為人，完全係一無所知。從前常聽到有朋友提醒我，要小心上海姑娘，她們對你可以很溫柔，但婚後卻可變成另一個人。

「有缺失還好…」Ivan嘆了口大氣：「只係婚後先發現，彼此既價值觀可以差距咁遠。」

我冇問Ivan，所謂差距得好遠既價值觀到底係d乜野。我有好多朋友，會話自己既另一半「唔明白」自己。因為反正佢地唔明，所以心裡有咩說話，都廢事同另一半講。其實另一半「唔明」，我反而覺得問題未必係好大。一個人明白你與否，有時要講資質，有時亦要講相處既時間。大家有心去了解，經過時間既累積，唔明，好多時可以慢慢變到明。

價值觀有差距，我反而覺得係個更難搞既問題。我聽Ivan所講，佢果位模特兒太太，並唔係如好多朋友所遇到既「另一半唔明」問題。相反，佢太太聰明伶俐，對Ivan既價值觀能夠充份理解，但理解卻唔等於認同。然而當兩公婆既價值觀差距太大，問題就出現。

「只可以靠包容囉。」我將剩餘既啤酒一口飲完：「祝你好運呀朋友。」

講就容易。包容，需要太多智慧。

兩個唔同既個體，價值觀好難話會exactly一樣。即使我老婆跟我自己，亦有好多細微既地方，響價值觀上係有差別。只係差別既位置唔係咁vital，又或者差別既程度並唔係太大，冇超出到大家既包容能力之外。我有時好難明，當兩個人拍拖打得火熱既時候，到底可以蒙閉到幾多理智，令價值觀本來就南轅北轍既兩個人，都可以走埋一齊？

OK，我係男人我明白。面對樣靚身材正既棟響面前，能夠蒙閉既理智又必然會多一些。

飲完酒，我從嘈吵不堪既酒吧內走出來，街上既寧靜，忽然變得珍貴。

你對人好，人對你唔好呀！

2011-10-08T00:36:00.001+08:00

「你對人好，咁人又對你好囉！」呢句係我時不時都會衝口而出既口頭禪。

做左咁多年人，我當然清楚，呢句說話響好多時候都唔係真既。特別響利益關頭前面，你對人好，人地當然未必會對返你好。

過去當我口快快將呢句說話講出口既時候，好多時都會有好心既朋友提醒我，做人唔可以咁天真，唔可以期望人家對你會如你所願地好。呢個場面，好似一個充滿生活經驗既老人家，勸戒一個初出茅廬，不知天高地厚既年輕人小心世途險惡一樣。但係我有一個有趣既發現，就係曾經對我作出如此「勸戒」既好心朋友，通常都唔係咩老人家，反而大部份都比我年輕，只係二十出頭既大有人在，反而生活經驗豐富既「老人家」，卻從來未對我呢句「口頭禪」有過意見。

奇怪嗎？

大家有冇試過，被自己認定為「朋友」既人出賣？我有，試過唔止一次添。全部都係發生響N年前仲好後生既時候。被朋友出賣既感覺當然痛，而且我亦曾經得出「你對人好但人會對你唔好」呢個答案。引伸出黎既結論係：「為免因人地對你唔好而讓自己受傷，所以你千祈唔好對人咁好。」emm，呢個結論看似理所當然，但係咪真係咁？

受傷既源頭，並唔係因為你「對過人好」。真正既原因，其實係你「投入過感情」。

年輕既時候，「對人好」同「投入感情」，當中有割不掉既關係。假如我唔當你係朋友，我就不能夠對你好。年輕人既世界，黑與白、敵與友對相當分明。隨住年紀既增長，灰色佔人生既比例變得越黎越多，「絕對朋友」和「絕對敵人」既數目急劇下跌，取而代之，係一大班「亦敵亦友」既人。

對人好一點，與投入感情跟他/她相處，長大後慢慢發現原來當中唔需要有等號。對一個「並非朋友」的人好，基本上問題不大。但對人好一點既同時，也會啟動「防人機制」，當中原來也冇抵觸。

人與人之間既相處，係一個又一個既循環。你對人好，「大部份」既正常人通常都會以「對返你好」作回敬。當呢個循環不斷運作，加上長時間既相處同了解，大家既關係可能會昇華變成朋友。年輕人認定一個「朋友」既時間一般相對比較短，然而在對人好之後受到傷害既機會自然亦較高。對人好不會讓你受傷，太輕率投放感情，先至係讓人受傷既元兇。

我諗，呢個正正係，點解只有後生仔先會勸我，叫我「唔好期望人地會對你一樣好」既原因。真正天真既老鬼們其實少之又少，或者真正讓人婉惜既係，年紀大左之後，要從新認定一個「朋友」，有時比中六合彩仲困難。

祝大家有個愉快既週末。

何妨太好禮貌

2011-10-04T14:01:00.000+08:00

朋友到我屋企作客，看見我對家裡那位外傭總係唔該前、唔該後感到很驚訝：「CK，對住菲傭，唔駛咁好禮貌下話？」

「有問題咩？」我反問。

「你有出糧俾佢架，佢幫你，應份架喎。」朋友答。

「即使係應份，講多句唔該都冇乜問題遮。」

「唔係咁講架CK，你係佢老闆黎丫嘛…」朋友一本正經咁講：「咁你下下都唔該前唔該後，佢以為幫你做野係『你求緊佢』，佢遲早會有恃無恐，你只會縱壞佢…（下刪一萬字有關應該如何管教菲傭再加一課如何做個有威嚴既老闆…）」

我其實有時覺得搞笑，我自己係一間商業機構既老闆，但係過去既日子裡面，總會有好多從未嘗試過做老闆既朋友，教我應該點樣做老闆。可能我真係太似一隻綿羊，好心腸既朋友們都擔心我會俾d獅子老虎吞左。

然而有關果個「唔該前唔該後」既問題，我其實真係覺得唔係問題喎。事實上，我返工既時候對住自己既下屬，我都習慣係咁。我一樣有出糧俾佢地，收得人工，幫我做野應該都係理所當然丫，但係咁樣同你講句唔該，有抵觸嗎？你最多話我虛偽丫，但我其實諗極都唔明。我只係覺得，任何人幫你做左野，完成左一件工作，即使係金錢交易，都應該向人表示謝意。Be thankful。

朋友話，對住菲傭太好禮貌，會縱壞佢地，令佢地有恃無恐。我反而響度諗，同我講呢番話果位朋友都係打工仔。當佢老細響佢完成一件工作後同佢講聲「唔該」，係咪都有縱壞到佢，令到佢返工既時候同樣變得有恃無恐？Please…

其實大家都係打份工，大慨只係性質不同。做人老闆既，可以的話，令大家舒服一d，日子好過一d，對大家都好，何樂而不為？何必下下要執得咁正，無時無刻都要remind大家響階級上既差別？

對上果d諗法，對於階級觀念根深蒂固既果位朋友，我知我唔會講得服佢。不過除左上述呢個原因之外，更大既原因係，我屋企裡面，有個尚在牙牙學語，仲未識得分是非黑白但乜都會照學既toddler響度。

終有一日，佢會認知呢一位同自己膚色唔同既「姐姐」，其實係爸爸媽媽用錢請返黎既家傭。咁家傭幫屋企既少主人做野，少主人應唔應該講「唔該」？如果你覺得應該的話，咁我更加睇唔到點解我要特登板起面孔，響個菲傭面前敦起個款。要求個仔做一套，自己又做另一套既話，我怕個仔會俾我搞到精神分裂。

Be thankful to the people who help you。我希望我家裡既光頭仔，有天都能夠感受到箇中既意義。

祝大家有個愉快既公眾假期。

你個仔入邊間？

2011-09-27T15:53:00.003+08:00

你個仔入邊間

我個仔其實仲好細，K1都未入。不過好多朋友都問我：「咁你諗住想個仔讀邊間？」

我以為佢地問我幼稚園想入邊間，原來唔係，佢地經已講緊小學。目光果然長遠，亦令我呢個「唔緊唔要」既家長感到有d慚愧。然而我亦理解點解佢地會咁問，事實上，有部份既小學，你能唔入唔入到同你讀邊一間幼稚園有莫大既關係。咁小學同直屬中學既correlation更加不在話下，而入唔到好既中學又會影響你入大學既機會…OKOK，我其實有d頭暈。

其中一個比較大路，而又成日俾朋友問既問題係：你想你個仔講傳統學樣抑或係國際學校？如果撇除左學費差距呢個因素，你會點揀？

我反問番問我呢個問題既朋友們，佢地既答案絕大部份都係「傳統」。理由呢？有朋友話唔想個仔唔識中文，所以唔諗國際。又有朋友話，讀「傳統」既話個仔/女既根底會打得好d，又有朋友話，驚個仔會變左做鬼仔，所以堅決要揀「傳統」。emmm，to be more exact：係「傳統得黎有名果幾間」。

答我呢個答案既朋友，幾乎清一式都係傳統學校長大既。當中不乏我自己當年既中學同學仔。然而我當年響傳統學校既生活，其實過得唔係好開心。同我傾呢個問題既朋友仔，我記憶所及有部份都同我一樣，經過一段唔係太過happy既校園生活。咁，點解你仲會想你個仔，讀番你以前間學校呢？

先旨聲明，我其實仲未諗過，個仔讀傳統學校好，還是讀international好，主要係因為懶。對於邊一個path會好d，我其實未有preference。不過我其實有懷疑，呢班實牙實齒答我，話個仔「必定」要讀傳統學校 (最好仲係佢地自己當年讀過果間！)，究竟係咪真係有做過research，又或者認真思考過，讀邊種學校先至對自己個仔比較有利？還是只係一d情意結？

我傾向覺得，我地做人父母既，都有一種不自覺既傾向，就係唔希望自己既下一代，響價值觀同生活上，跟我地自己有太大既deviation。正係呢一個原因，傳統學校出身既朋友，響「有選擇」既情況之下，都傾向想自己既仔女讀番傳統，甚至跟自己當年讀同一間就更加好。然而時代不斷轉變，今時今日，即使你當年讀既係名校，但「讀返自己以前果間」係咪就會保證得到，你既下一代響價值觀同生活上，唔會有好大出入？

我就覺得唔會囉。

*****

你要做邊行

我認識有d朋友，自細就被人不斷灌輸，大個要做乜乜職業物物職業。我地呢一代，響細個既時候，阿爸阿媽最鍾意灌輸比我地聽，叫我地去做醫生律師。我早排睇病既時候，同街口個醫生吹開水，佢話自細就俾佢老豆逼佢做醫生。如果做唔成醫生，怕且驚個老豆唔肯認自己做仔。

咁當我地呢一代人都做左父母，我地又會唔會不斷貫輸俾個仔/女聽，大個一定要入邊行？以今時今日香港既形勢，會唔會係金融？

凡事都有另一面。有人會不斷灌輸俾仔女要做邊行做乜工，但有人又會刻意強調，要俾仔女自由發揮，盡展所長，健康成長…(下刪一萬字)。講到個仔做乜都冇所謂既時候，忽然有一年個仔同個老豆講，話想入娛樂圈做演員，個本來話「任個仔自由發展」既老豆當堂黑面，大鬧個仔發明星夢兼冇出息。

我個仔好細，有排都未去到呢d搵野做既皆段。不過自細灌輸俾個仔聽，大個要做邊行，應該唔會係我。唔係話自己冇preference，不過二十年後係乜野世界，邊個會知？早幾個月睇電影《歲月神偷》時有一幕印象好深，對白大概係：戲入面做鞋匠既任達華，同佢大佬好感慨咁話：「當年我地老豆，叫我地學造鞋學剪頭髮，包辦人一頭一腳 (佢大佬選擇左做理髮師)，一定唔會餓死。時代唔同左，我地而家大家都冇得做。」

事實上，當年我地老豆口中既理想職業，醫生律師會計…其實社會地位同我地上一代既時間去比較，算係下滑左唔少。今天當旺既係金融，二十年後，香港，其實有冇可能已經唔係金融中心？

唔好講遠，十幾年前，IT疑似係香港最有前景既行業之一。今日香港既大機構要cut人，IT總係行先。時代不斷變，今日唔知聽日事，何況係個仔大左之後既事？

背後會不同嗎？

2011-09-23T00:31:00.002+08:00

阿仙奴之死

寫呢篇既時候，阿仙奴響英超排名倒數第四，俾曼聯入過八球，上個星期連包尾既布力般都打唔過。

面對咁既環境，邊個要負責？

網上好多評論指向領隊雲加。評論既方向大致係，一個曾經經歷重大成功既領隊，過份沉迷於自己過往既成功模式，以為自己依然有點石成金既能力，於是當時代改變，環境不同既時候，呢位老人家既成功模式變得過時，自己被自己既固執同自負所拖累，一步一步咁步向失敗。

表明立場先：我係阿記球迷，亦都係雲加既支持者。

人既其中一個劣根性，係喜歡睇人仆街。一個曾經威過既老人家，死在自己既自負同固執性格手上，呢個劇本，乎合好多人既口味。但係事實又係咪真係咁？背後既故事，會唔同嗎？

當一個龐大既機構、團體出現結構性既問題時，我傾向相信，係一連串集體性既問題，多於一個領導者既執著。傳媒都喜歡將某d響商業社會上發生既事情「電影化」，令到世界出現左好多英雄般既人物，同時亦出現左好多悲劇角色。正如蘋果既成功，所有人都指向一個Steve Jobs，但Steve Jobs背後，其實有多少個無名英雄？

阿仙奴既問題，早陣子響AM730既專欄曾經寫過，唔再重覆啦。不過以一個老闆既角度去睇，我認為雲加應該係每一個老闆夢寐以求既管理專才，特別係果d要求旗下管理人要用蔗渣材料，煮出燒鵝味道既孤寒老細，就更加會對佢寵愛有家。響如此一個位置，企到15年，唔係一件容易既事。或者作為球迷既我地，會好不滿點解佢唔spend some fxxking money去買人，點解佢要死攬住班未成氣候既小朋友，又或者點解硬係要等到轉會窗最後一刻先至去掃貨...不過能夠硬硬淨淨地企到15年，佢必定係有d野做出黎，好岩老闆心意(只係唔岩球迷如你和我既心意遮…)。至於果d所謂固執、自負、沉迷過去等等…當中有幾多其實係幫佢老闆「硬食」既，我估，應該唔少。

當然，呢d死貓，佢份人工包左既。

*****

假如我係施老闆

蘋果出免費報，有noise係必然既事。估唔到既係，故事既另一個主角，係AM730。

有關蘋果唔肯幫AM730加印既糾紛，誰是誰非，我唔評論啦。不過星期一，施老闆響自己既專欄裡面，投訴肥佬黎冇生意道義，我就覺得奇怪。個style，好唔似施永青。

先旨聲明，我本人完全唔認識施老闆，更加同肥佬黎素未謀面。佢地兩位既私底下既關係如何，我完全係無從得知。之所以話個style唔似施老闆，皆因只係覺得，以佢一個富有豐富營商經驗既商人，唔應該會對一件如此既事有咁大既反應。

文章出街之後，我響網上見到唔少文章同留言，對施老闆有好多批評，批評佢愚昧既有，笑佢唔化既又有，話佢唔識尊重合約精神，講一套做一套既又有，款式多到數唔晒。我傾向相信施老闆並唔係一個怕寫文章會被人批評既人，不過文章內既佢，我一直有懷疑，到底所寫既，係咪真係佢心中所想？

當有關肥佬黎果段「唔幫AM730印會俾人告到仆街」既錄音離奇地外洩後，我就不其然響度諗，佢地兩個，會唔會背後響度夾埋架…比較低B既諗法係，爽報係咪都要出，報業大戰一觸即發，反正蘋果唔能夠幫AM730加印，損失已成定局，倒不如嘗試為自己份報紙加多一些Noise。連日黎施老闆響專欄裡面既控訴，我估多少刺激左香港人對呢套『連續劇』既興趣。網上面除左分別有批評施老闆同肥佬黎既文章之外，有唔少message係話，要買定花生等睇戲。如此一來，佢地會唔會係有心地嘗試將報業戰既焦點，聚焦落屬於佢地既兩份報紙之上，從而得到利益？

又或者，蘋果唔幫AM730加印呢件事，響AM730內部造成好大既怨氣（試諗下，負責賣廣告既Sales，食到埋咀邊既commission，因為蘋果忽然唔肯加印而要跌返出黎。賺唔成佣不特以，仲要分分鐘俾客戶狂丙，唔谷氣就有鬼！），作為老闆，點都應該講返幾句說話，幫同事們消消氣。儘管明知咁講，會遭到讀者批評，但大戰當前，同事們士氣尤關，這些話，還是要講。

文章既表面，係施老闆「被人激親」，感覺疑似在發洩情緒，但背後既故事，會唔會有所不同？

當然，亦可能只係無聊既我諗多左。生意做得耐，被人昆過無數次，於是不自覺就養成左多疑既習慣。

爽報出街，再加埋早前推出既晴報，中文既免費報紙一下子加到五份。以香港一個只得七百萬人口既城市，要同時容納五份免費報，相信都幾難。幾可肯定既係，不久既將來，會有參與者被淘汰。我唔知有冇AM730既同事，會睇到我呢一篇文章，然而我作為730其中一個寫手，自然希望我地能夠響呢場大戰之中勝出。坦白講，論財力，我明白730應該係屬於眾多對手中較為單薄既一員，不過觀乎同事們呢幾年所投入過既心思，我還是堅信，他日大戰落幕時，敗陣下來既，唔會係AM730。

同事們，祝一切順利。

大樹好遮蔭

2011-09-14T17:15:00.000+08:00

MC

今個星期有好朋友結婚。我又被「委派」做婚禮既MC。

講開做婚禮MC，過去幾年，真係做過好多好多次。我其實一直都唔明，點解會有咁多朋友選擇搵我去幫佢地手做司儀？我講野唔係特別叻，行出台前亦唔見得特別有台型，不過自從好幾年前響半推半就既情況之下，幫人捱義氣頂過一次之後，我既「司儀」生涯就唔知點解開始左。往後既婚禮，逢親我有份做兄弟既，MC，必然係我。

我其實係個怕羞仔，對住幾百人講野，雖然做過咁多次，但我都仲係有少少怯場。死充同扮野大概係生意佬既專長，所以做左咁多次，居然都冇人發現我響站台既時候其實係有些少腳軟。其實講野冇問題，最驚既，只係唔覺意「講錯野」，惹黎老人家唔開心。

聞說我既女MC Partner係個高妹，比我高成個頭。我估，時不時串我矮仔既老婆，響台下見到呢個畫面，肯定會忍唔住笑。

*****

大樹真係好遮蔭？

傳統智慧話，大樹好遮蔭，搵公要搵大機構，皆因樣樣都穩定，衰極有個普，唔似得小公司，一個浪冚埋黎，分分鐘執粒都執唔切。

我成日有個疑問，做打工仔，到底應該選擇去間大機構道做粒小螺絲好，還是留響間小公司道做大佬好呢？我有個老友話，呢個問題，最近最佳既演譯係剛轉左會去巴塞既法比加斯。去到巴塞，即使正選都唔知有冇，但「trophy guaranteed」。響阿仙奴做大佬冇著數，你可以輸八粒俾曼聯，咁既大佬，唔做都罷啦。

5號仔呢單裁員新聞，唔知會唔會令我呢個老友改變佢既想法？做螺絲既本質係，冇事冇幹既時候可能運作暢順，但當機器既操作員發起神經要丟走一堆螺絲既時候，架機器通常都係如常運作。所以做小螺絲既命運注定係被人呼之則來揮之則去。當然無可否認，響冇被人「丟棄」既情況之下，做螺絲既待遇可能分分鐘比起做大佬來得要好。就算待遇相若，「大佬」同「小螺絲」一齊拎張咭片出黎，三姑六婆認得小螺絲咭片上面個公司Logo，可能會認為「小螺絲」叻仔過「大佬」十萬八千倍而幫你唱通街。well，講明係三姑六婆嘛。

小螺絲可憐在，人人以為你夠叻仔搵到份好工，大樹好遮蔭既同時，你卻對自己既命運完全冇掌控既能力。上個星期三姑六婆拎左你張咭片之後，仲同班街坊講阿邊個個仔幾咁叻仔，連「大機構」都請佢。轉個頭發現阿邊個個仔原來被列入三千壯士名單之內。師奶智慧話，被人炒既唔慌係叻仔，於是拿拿臨改口，話從冇話過阿邊個個仔係醒目仔，實情係自細識佢就知佢係個蠢仔，如果唔係點會俾獅子行炒魷魚…

廢話講完，其實我想話，我不嬲都唔相信，商業社會裡面，有大樹好遮蔭呢回事。棵樹越大，通常越無情無義。大樹肯為你遮蔭，只因你響樹下不斷努力幫佢施肥灌溉，但係同你一齊灌溉既人太多啦，多你一個唔多。樹蔭底下其實已經好逼，逼下逼下，一不留神就會逼左你出去。

反而細樹之下人數唔多，唔駛爭位避雨，打風落雨之時，可能細樹底下會仲比較安全。

因為佢好蝦

2011-09-12T17:10:00.000+08:00

大機構選擇香港作為裁員既重災區，恕我膚淺，除左因為香港人比較好蝦之外，我諗唔到其他更合理既原因。

我都係僱主。生意唔好，前景唔明朗，要裁員交數，我覺得還可以理解。不過選擇響邊個位落刀，就反映左管理層既勇氣同個性。公司裡面，永遠會有一班最少出聲但多做事，比較能夠逆來順受既人。炒人係個惹人討厭既動作，你搵個多聲多氣又激進既牢騷王開刀，所承受既壓力同困難，必然係比郁果班默默做唔多出聲既員工黎得少。香港既勞工法例比較易話圍，相比歐美對員工保障較少，工會勢力亦不成氣候，環顧種種因素，你班香港人仲唔係最好蝦？話之你幫我搵到最多錢，幫我捱得最辛苦啦…

機構規模擴大到一個位，機構內發生既所有事，都變成只係會計賬目裡面既一個數字。數字本身冇感情、冇對錯、冇道德、亦冇靈魂。一盤生意不斷擴大，往往就會演化成如此既面貌。小生意人響炒一個同事之前會思前想後，諗一諗自己會唔會做得太絕，炒左佢，會唔會影響到一個家庭既生計。諗得再深入一點，會懷疑錯既，其實會唔會係自己，一個跟自己相處多年既幫手，炒唔炒得落手？大家都有感情，因為我地係人，唔係一個數字。小生意人既猶疑，在管理學上稱之為感情用事，又或者被稱之為窩囊。然而窩囊有時都係一個選擇，在選擇「炒邊個」既遊戲當中，居然採取「邊個好蝦郁邊個」既策略，表面係手起刀落，但實際上，比我們這班窩囊的小商人，更窩囊，更冇膽。

祝大家中秋節快樂。

內鬼

2011-09-10T16:16:00.000+08:00

中環租金

身為中環寫字樓租戶的一員，對於租金成本不斷升，其實幾頭痕。

地產經紀話，租金仲會繼續升，皆因需求強勁，供應不足，中環，似終係中環，所以價錢會繼續貴。類似既理由，聽過N次。總之每次同業主傾續租，負責既agent就會搬出類似理由嘗試說服我地班租客接受加租。

我睇到既事實卻剛剛相反。中環寫字樓需求不單只唔強勁，我甚至覺得應該用「疲弱」黎形用。特別係萬呎以上既大size樓面，更加係弱到爆燈。中環既租戶大部份同finance有關，IFC同exchange square一帶既Super Grade A寫字樓，依然係相對之下既搶手貨，但縮到入皇后大道中一帶既大廈呢，情況就不盡相同。我認識有大業主，佢地既單位位置靚絕，物業質素一流，景觀無敵，但苦等一年依然冇租戶承接。如果咁都叫需求勁，我真係唔知幾時先算係差。

環球經濟唔掂，金融機構裁員，都係不利商業租務市場既訊號。中環租金之所以繼續高企，我傾向相信係各大業主拒續降價所致。核心商業區內既甲級寫字樓，除左極少量係分散業權之外，絕大部份都係落入幾個大地產商既手中。佢地個底夠厚，可以抵受得住丟空物業一段時間既損失，價錢可以「繼續」企硬。但係如果真係純粹以供求關係去估計價錢，我諗呢區既租金，其實早就要下調啦。

*****

三千壯士

匯豐響香港炒三千人，以香港匯豐有兩萬個員工黎計，平均七個就郁一個，比例都幾誇。

三千人之中，講明會集中響後勤同IT部門。即是話，資訊科技既，被裁既比例一定大過七份之一。假設比例係三個裡面炒一個既話，香港地做IT，都幾悲。

未做生意之前，我曾經都係資訊科技行業裡面既一員。當年入行多少係受到當年董特首既「慫恿」所致。我認為自己算係好彩，神推鬼擁地離開左呢一行。當日同我同期入行既朋友，其實為數應該不少。今時今日，如果冇轉行既話，大概都應該升得幾高，逗緊份唔錯既糧。正正係因為你份糧有返咁上下高，兼且你又正正係所謂「架構架床疊屋」當中既中層管理階級，所以呢三千壯士裡面，你就變成熱門人選。

資訊科技響政府力谷果幾年，作為一個IT人，頭上曾經係戴住光環。十年之後，一切都改變。香港這個金融中心，響今天除左金融之外，剩下來仲足夠養妻活兒既行業，到底仲有幾多？

我心裡面有個疑問：一間公司，七個人之中就有一個就係冗員，當日夠竟係邊條傻佬設計一個咁既架構出黎？抑或係，今天相信，即使公司冇左七份一員工都依然唔會影響業務質素果件蛋散先至係真正既傻佬？

*****

內鬼

公司最近失左單大生意，生意被行家用比我稍低既價錢Bid贏左。

勝敗本來平常事，不過今次情況有些少唔同。Sales同事L，響入標之前，俾另外兩位同事見到，響某coffee shop同Bid贏我地果間公司既Sales Director見面飲野。消息好快響公司裡面傳開，同事們都認為，同事L係內鬼，將我地既入標價洩露左俾行家聽。

同事L既解釋係，行家搵佢係想請佢過檔，當日約出黎見面，正正就係睇下有冇過檔既可能性。不過同事L思前想後之後，覺得行家出既條件，未吸引到可以打動到佢，所以佢已經拒絕左人地。會面當日，講既就只有咁多，同事L堅稱佢絕冇透露半句有關我地既入標價俾行家聽。

Kathy同我都傾向相信同事L，事實上，即使能證明同事L跟行家見過面，我都唔能夠證明，佢有將公司既機密洩露。行家對我地roster裡面既同事，時不時就嘗試撬佢地過檔。我肯定，同事L並唔係唯一一個跟呢個行家見過面既公司同事。只係佢唔好彩，見面既時間敏感，另到有人懷疑佢係內鬼。

有負責投標既同事認為我應該將同事L辭退，然而如果因為同事L曾經跟行家見面而需要被炒既話，咁一直以黎，其他曾經被呢個行家既高薪package吸引，而出過去傾條件既同事，係咪都應該得到同一樣既懲罰？

或者呢排大家睇得太多Laughing哥，對「UC」這回事都太上腦啦掛。

我唔相信行家真係對我地咁多同事都有興趣，不過當大家係競爭對手時，佢地時常話「想請你過檔」這招數，就的確為我地內部帶黎左d小麻煩。我有時諗，中環有N咁多間Starbucks，點解係要選一間最近我公司既去見面？係咪真係驚約得遠得滯，我其他同事會撞唔到？

祝大家有個愉快既週末。

阿仔將來做乜

2011-07-27T12:34:00.006+08:00

Banker朋友既囝囝同我屋企個光頭仔年紀相若，果日同佢一家人食飯，Banker朋友話：「CK，我對個仔其實冇乜期望啦，但求佢第日大個，千祈唔好好似我咁入Bank做就好啦！」

「好多後生仔都希望可以好似你咁做banker喎…」我話：「你搵咁多錢…」

「有代價架CK…」Banker朋友話：「返工返到冇晒朋友呀，仲有咁多politics，好過癮牙？」

我點了點頭，我明白朋友既意思，另一方面又有d唔認同。

上個禮拜大傷風，幫襯左街口果個醫生。

再對上一次睇醫生既時候，我記得佢同我吹水講起，佢個女就快入大學。咁我就好奇問阿醫生：「喂，你個女入U，揀左乜野科呀？」

「唉，激死我呀，叫極佢都唔聽！」醫生放低手上既聽筒：「叫左十幾年，叫佢千祈咪做醫生，到入U啦，死都話要揀醫科，我真係就快俾佢激死。」

「你個女讀書叻，醫科先收佢遮！」我索左索我個鼻：「你應該開心至係呀！而且做醫生受人尊重又搵到錢，冇乜唔好丫！」

「你講下笑好！」醫生不知幾咁激動：「我幫你睇個症，咪收你一百幾十！賺到幾多呀！你知唔知，讀果陣好辛苦架，實習果陣，d時間會搞到你咩朋友都冇呀！我聽到阿女話讀醫，我不知幾擔心佢會搞到嫁唔出呀。」

我又係點了點頭。有d同意又有d唔同意。

*****

我選擇做生意，不能否認既，係或多或少受到自己老豆既影響。將來光頭仔長大成人，可能都一樣好似我咁，幾十年受到我既「影響」，而選擇從商都未定。

問心果句，我跟Banker朋友同街口醫生一樣，對自己個仔將來做返自己果一行，其實好有保留。因為作為一個行內人，你總係最清楚，風光既背後到底有幾多代價。做老豆，大概唔會希望自己個仔，要承受自己曾經承受過既痛，不過我諗，現實社會總係你睇我好時，我又睇你好。到頭黎你果行難捱d，抑或我份工惡頂d，好難比較既。

我明白做人父母，總希望阿仔阿女條路平平坦坦，搵唔搵到大錢，人生係咪好成功都唔緊要，最緊要係平平安安開開心心。不過，望係咁望，實際會變成點？人生始終係佢地既，我地能夠掌握到既，其實只係極少極少。

*****

唔好意思，請容我賣些少廣告。尋日行過書局，發覺自己本書原來上左架。(係，我查實每次我都係行過書局先知道自己本書已經出左…)。今年出版社call我話會出書既時候，我第一個反應查實係：「下？唔係下話？幫我出書唔駛蝕本咩？仲出？」

寫下寫下，居然出到第四本。其實過去幾年，每次我都諗，拿，呢次應該係最後一本啦掛，點知第二年又有下文。點都好，好多謝呢幾年幫我出書既出版社，冒住蝕本既風險幫我出版。更加多謝參與校對既出版社/AM730既同事們。唉，自己知自己事，平日要你地幫我改錯字改白字，辛苦晒你地啦。我諗，寫手之中，應該好少稿件會錯得好似我果d咁過份。

一如過往，其實我估呢本應該係最後一本啦掛。不過將來既事，的確係講唔埋既。

盛惠68蚊…太貴？唔抵？我呃錢？問我有冇搞錯？

喂，通漲呀朋友。奶粉同尿片好貴呀。

底線s...

2011-07-25T16:33:00.002+08:00

朋友圈裡面，其中一個係個大滾友。大滾友話，佢出去滾，從來都只係錢銀交易了事，冇感情響入面。所以一切乾手淨腳永冇手尾，亦唔會影響到家庭裡面既和諧。

相比起一些有婚外情既朋友，大滾友認為自己聰明得多。婚外情係超級愚蠢既事，既要上身又影響家庭，最大鑊係要付出真感情，而受傷既，包括老婆、自己、情婦，唔好彩既仲包括仔女。

所以大滾友「自豪」地強調，佢既底線係「純金錢交易」同埋「絕無真感情」，免得拖泥帶水芸芸。

*****

聽過幾位有婚外情既朋友講（當中有男有女），佢地「自豪」既位置，剛剛同大滾友所講既相反。佢地都好鄙視大滾友將「逢場作興」視為理所當然。雖然佢地自己都因為婚外情既關係，令自己既家庭同婚姻都出現左許多煩惱同困擾，不過佢地認為自己「至少」係付出左真正既感情，而唔係玩玩下。

emmm，而且佢地話，緣份「逼到埋身」，唔係話想避就可以避。一切，都只係「命運」使然。

但係佢地既底線係，要「認真」。唔係真感情既，佢地唔會開始。

*****

邊個先有道理？還是兩種講法都係冇道理，只係響度自圓其說？

每個人有唔同既底線，對於我自己黎講，最重要係唔好俾自己既人生變得太複雜。簡單是福。

作為一個從商既人，工作上面每天都會講好多大大小小既謊話。然而對住自己既屋企人，依然要為自己所做過既事，千方百計地隱瞞，又或者要一個大話去遮蓋另一個大話的話，我諗就太過辛苦啦。不管家人能唔能夠識破都好，咁樣做，太辛苦，我會頂唔順。

做滾友又好，付出真感情去搞婚外情又好，都牽涉對家人大量既謊言。底線set響邊度自然每個人都有唔同尺度，不過當有一日，你可以擘大雙眼對住至親既人講大話而晚上可以繼續睡得香甜的話，所有底線都應該已經冇意義。

認識既朋友當中，最近又多一pair出事。現代既婚姻，實在真係太脆弱。

流言

2011-06-29T15:21:00.003+08:00

「CK，你可唔可以老實答我…」兩位Sales同事走咗入我間房：「公司係咪財政出咗問題，要賣盤？」

房間裡面我正跟Kathy開會，撞正同事敲門，問我地如此一個問題，當堂打左個突。Kathy同我交換左個眼神，然之後開口問：「呢個消息響邊度聽返嚟？」

「今朝Mandy同我都收到有headhunter打電話俾我地」Sales同事Stella說：「headhunter話出面傳我地可能會賣盤，公司會同買家merge。賣左之後我地既職位可能會被新買家cut咗，所以勸我地不如快d跳船…」

「Stella, Mandy…」我嘆左一口大氣：「放心，的確有人問過我有冇興趣賣盤。不過我冇打算賣喎。如果你方便的話，你將搵你果個headhunter既contact抄俾我丫，等我同佢傾下計。」

Stella同Mandy互相望了一眼。我循例講左d安撫佢地既廢話，佢地聽完之後半信半疑，然後返左出去繼續工作。

「又嚟啦…」我苦笑：「商場如戰場，果真冇講錯。」

自從果位麻煩既行家A出現之後，時不時我公司既同事就會收到一d不明來歷既headhunter既電話，問佢地有冇興趣過檔。同事們本來都不為所動，不過呢班受僱既headhunter所講既說話，越黎越「踩界」，成日跟佢地既「目標」暗示，話我地公司可能唔掂，又或者聽到甚麼甚麼傳聞，話我地要被收購之類。Stella同Mandy已經唔係第一個收到類似電話既人。呢班名不經傳既headhunter，我唔知響邊度請返嚟，我甚至好懷疑，佢地係咪真係獵頭公司，抑或係受僱於某個競爭對手希望搞亂你，從而可以壓價買起你既股份。

「我會處理架啦。」Kathy點了點頭：「或者我地應該開心，當同事遇到呢d事情，第一件事係搵我地問清楚，而唔係諗都唔諗就信左出面既人所講。」

事實上，第一個收電話既，係Kathy。果個不知名既headhunter話，佢手上有幾個Fortune500既公司opportunities俾Kathy，希望Kathy出黎飲杯咖啡見過面。Kathy未黎做之前，本來就響果d公司裡面打滾，而且一貫串咀：「唔好耍我啦。你所講既Fortune500公司，如果要headhunt我的話，唔會係經你手既。」

早陣子我響內地開分公司。公司還未準備好，連招聘既工作都未開始，同一個headhunter就send左幾個candidates既resume俾我，話希望我去見下佢地。我覺得事情有古怪，所以冇見到呢幾個人。然而我有另一個行家就冇咁好彩，Interview左亦請左其中一個。呢位人兄上班之後兩個月就請辭，然之後就去左行家A處上班。上班之後，當中既一班客人就不斷被行家A撬走。最近呢位「不幸中招」既行家同我食過飯，佢話明知俾人「涉透」左入黎，偷走左客戶同報價資料，卻苦無證據告人。所以「特登」提醒我一聲，remind我要小心小心。

響我呢個微小既行業裡面，居然有「商業間諜」，我覺得簡直係匪夷所思。當然我亦唔排除，受害行家可能因為生意被人賤價搶走而「諗多左」，不過無論如何，還是小心為上。

中小企既生意人，做生意其實好務實，只係想搵兩餐養妻活兒，幸運的話可以搞大d，賺多d去改善生活水平。做買賣本來係好簡單既一件事，當事情變得複雜既時候，樂趣同時亦因而大減。做生意遮，何必搞到咁複雜？

麵粉和麵包

2011-06-23T16:20:00.008+08:00

行家A係一個響一年前左右先至入行既新對手。對於行家A既真正背景，大家都唔清楚。唯一知道既，係背後應該有大水喉射住。

近年行業內既成本大幅上漲，理論上唯一保持盈利既方法，係將價錢提高，將成本轉嫁到消費者身上。我響行業裡面好一段日子，呢個情況，以前亦都試過。總之平買平賣，貴買就貴賣。

直至行家A出現，市場情況開始扭曲。行業裡面「麵粉」既價格基本上係公開，冇得呃既。行家A可以將「麵包」既價錢訂響「麵粉」既價格之下，讓我驚訝左好一陣子。換句話講，佢係賣一個麵包，就蝕一個。情況居然還一直持續，簡直令我覺得匪夷所思。

響呢一年裡面，行家A瘋狂擴充，所投入既資金，粗略估計數以億計。「麵包店」既數目響一年間急劇增加，本地既「麵包」供應變得嚴重過剩，即使唔同佢鬥價錢，供過於求既因素令到行業裡面「麵包」既賣價面臨大幅度既下滑。加上麵粉價錢持續向上，今年裡面，有唔少規模較細既行家頂唔住要倒閉。

行家A最近吹風，話計劃不久將來會上市。

我唔清楚佢盤數到底點樣做，但係一盤生意如果長期都處於「麵包」平過「麵粉」既狀態，在賺錢既角度黎講，盤生意根本就唔應該存在。當然，如果盤生意只係一個「表面」，真正賺錢既位並唔係響果度，而係背後某些不為人知既方法支持盈利同現金流既話，咁又另作別論。對於財技，又或者生意以外既賺錢辦法，我係一個外行，唔敢胡亂猜測。只係對於對手既business model，覺得匪夷所思。(又咁講，商業社會裡面，讓人覺得匪夷所思既機構，其實又何其多？)

今日收到行家A代表既電話，問我有興趣將我盤生意賣俾佢地。

嘿。

舊事

2011-06-18T01:00:00.005+08:00

早陣子寫過公司步入需要清理瘀血既階段。有網友追問我，情況結果如何。

詳情唔打算寫啦，總之係，計劃左要做既，最終都硬住頭皮做左。過程係一如預計般痛苦。

呢件事纏繞住我精神好一段日子。還未解決既時候，感覺彷如渡日如年。到後來事情「解決」左之後，渡日如年既感覺轉化為「覺得自己好仆街」。腦裡面總係不停諗，其實我係咪冇盡過力去諗更好既解決方法，今日呢一個「結局」其實係可以避免？

「貓哭老鼠」我認為係一個比「鐵石心腸」來得更仆街既形容詞。到頭黎我發覺其實我都係一個既愛面子而又怕樣衰既無賴老細。事情發生之後，面對還在職既同事們，響兩個形容詞當中，我選擇左後者。我響同事面前害怕自己顯露出丁點兒歉意，會讓我「不幸地」換來前者既標籤。於是我決定擁抱「鐵石心腸」這個相對比較「有型」既形象。反正都係做硬仆街，就讓自己仆街得黎唔好咁樣衰好了。

響鬼佬既生意理念當中，特別係美國佬常強調，it's all about business，it's nothing personal。理性上，係真既。做商業決定既時候，亦只能按照呢個邏輯去思考。但生意佬唔係機械人，office hour裡面，呢句說話係至理名言。但到左夜闌人靜失眠時，呢句說話係廢話中既廢話。事實係，你絕對唔會因為呢句「名言」而可以睡得香甜。

我想要一口新鮮既空氣。

講不出口

2011-06-17T16:36:00.005+08:00

我唔知係我自己個人既問題，還是大部份人到中年既男人都好似我一樣。我越黎越發覺，對於讓自己心煩既事，我越黎越唔習慣同人傾訴。年紀越大，情況越嚴重。

後生既時候，唔係咁架喎。當你有煩惱有鬱悶既時候，你總係會第一時間走去搵朋友傾訴。儘管朋友幫唔幫到你都好，總之你既指定動作就係去搵人講。講完，或者情況依舊，但心裡面還是會舒一口氣。

現在，將心目中既鬱悶，向身邊既家人朋友講一次，要花上好大既氣力。要將問題重覆一次講俾人聽，腦袋裡面好似要回帶重新睇一次恐佈片一樣。於是貫轍生意人做事既邏輯，冇效益既事無謂做。反正講出黎唔見得問題得到解決，所以倒不如算。

唔知有幾多男人同我既情況一樣，我有時都搞唔清，到底係面子問題，還是提唔起勁。只係覺得自己把口，響工餘既時候似乎用得越黎越少，長此落去，似乎唔係好健康。

祝大家有個愉快既週末。

有火的日子

2011-06-05T02:01:00.017+08:00

剛畢業既時候，我搵唔到我想要既理想工作。我當日希望可以身光頸靚出入中環，不過事與願違，我第一份工作結果響工廠區渡過，身光頸靚當然冇我份，最唔開心係份糧比女朋友低一截，對自己冇晒信心，一方面覺得懷材不遇而且時不與我，另一方面亦妒忌果d可以返到跨國大公司，進駐中環既同輩朋友。

膚淺？我認丫。當年後生係淨係識得睇呢d表面野架啦。邊有後生仔一踏入社會就學識睇通睇透又睇化架？

後來其中一個我幾「妒忌」既朋友，居然向我女朋友展開追求。又靚車又名貴禮物再加我買唔起既名貴鮮花，日日狂攻，我直頭覺得眼火爆，頂你個肺丫，家陣有錢大x晒牙！

可能係我靚仔d掛（ok，我知道其實唔係…），女朋友最終都冇離開我。對於女朋友一直以黎既不離不棄，當日我覺得其實有些少受之有愧。「慚愧」係讓一個年輕既死懶鬼開竅既第一步。男孩子係好遲先會思想成熟既動物，冇受過衝擊既話，可能一世都唔會長大。

年少氣盛，心胸亦都狹窄，對於果一次既經驗，心裡面抱住好大既怨恨。我有時諗返轉頭，如果女友當日跟果個有錢仔朋友走左，我既怨恨可能會留到今時今日，而我亦可能一世都覺得，社會係唔公平，而我永遠都會將自己當成受害者看待。不過女友選擇留響自己身邊，對我既震撼亦前所未有地咁大。怨恨及時轉化成發奮既動力，總之唔想有負於人。

一念之差，人生可能就會徹底改變。

女朋友後來成為我既老婆。好多年後一次大班人既聚會入面，撞返呢位當年曾經係我「情敵」既朋友。場面係咁既：我拖住我既老婆同埋剛剛學識行路既囝囝，而佢亦拖住佢太太，身後仲有跟埋佢地一齊出席聚會既一對仔女。

事隔多年，大家見番面其實仲係有d尷尬。寒喧幾句之後，就各自去「扮」湊仔。我心諗，好彩大家囝囝囡囡響度，等大家「懶係」有些少共同話題可以吹下，又等大家都搵到個好似理所當然既exit位。如果唔係，成晚流流長，都唔知點過。

不過雖然尷尬依舊，怨恨既感覺，卻消失得無影無蹤。

或者你會話，響當日既事情裡面，我先係當中既勝利者，乜彩都拎晒，梗係冇野好嬲啦。

我反而響度諗，當日唔係多得佢，自己家陣可能仲係死懶鬼一個。年輕人需要動力，雖然我成日話叫人唔好怨天怨地，不過當怨氣埋藏在心裡，卻又揮之不去既時候，會唔會有辦法，將心裡面既怨氣轉化成一些正面既力量？

一生人有「火」既日子，唔會好長。像我現在這個年紀，想谷啖火出黎都未必谷得到。怨氣與其屈在心中又無法釋懷，趁年輕，嘗試將佢轉化做讓自己發奮既燃料，都係同一句老土說話：一念之差，人生可能就會改變。

十年八載之後，人通常都會被社會磨平磨滑，到時就會感受到咩叫做力不從心。趁住自己身上還有「火」，狠狠地谷行佢啦。

祝大家有個愉快既週末。

有關命運

2011-05-27T15:15:00.014+08:00

同事早前去左搵相士批命，返到公司同一班同事傾開呢次批命既經驗。佢地得出黎既結論，大概係：「嘩，真係準到冇人有！」

好多生意佬都信些少風水命理，我唔知我算唔算係其中一員。當唔順利既時候，風水命理有時就變成係心理治療既一種。

後來我開始study一d有關紫微斗數既既書籍，叫做學懂左當中既一點點皮毛。我估，每一個對呢類術數有興趣既人，都一定會做一件事，就係拎自己同屋企人既時晨八字去做下testing，睇下能夠睇出d乜。

中國古代文化博大精深，我憑住我極有限既術數知識，去verify一下我已知既人生，有一部份的確係非常吻合。特別係，有關兄弟姐妹、父母等等既數據，準確度其高。對於命盤推算出黎既其他事情，例如婚姻同事業，我功力唔夠，唔敢講準抑或唔準。不過跟據命盤當中所展現既形態，我係的確有一種「創業自立」既tendency，so call叫做應驗左我響事業上既發展。

對於命運既主宰，我覺得的確係有一點既定既pattern響裡面。例如有關家庭背景、兄弟數目之類，呢d我覺係hard facts，能夠透過術數既系統而準確計算出黎，我認為並非偶然。不過我相信呢個係屬於先天無法改變既事情。至於往後我既人生，受住我既性格影響。算命師父會就住命盤裡面所顯示出，你既性格pattern，再加上不同流年流月所遇到既機遇，去「推算」響你人生中，會發生既每件大事出黎。

這部份屬於「後天」。有朋友對批命書有關後天既部份深信不過移，認為這些就是宿命使然。我就偏偏持相反既睇法。

你天生既父母、兄弟，屬於人生冇得選擇既部份。性格既「底子」，或多或少都有天生既成份。不過中國人成日講「趨吉避凶」，就我自己既解讀，係當你從命理上面理解到你自己有甚麼強甚麼弱，有那些優勢和那些不足時，你就應該有更多既資訊，幫你去準備好你既人生，讓你改變一d原本係會出問題既環節，亦更好地利用你已經有既資源。

認識有個朋友，早幾年批左命。相士話佢係三妻之命，婚後必有婚外情。朋友結婚不久，佢就戀上左自己公司既另一位同事。我同佢講：「朋友，你結婚一陣咋喎，老婆好地地，做乜要搞d咁既野呀？」朋友反而理直氣壯地答我：「CK，相士一早就批左我條命係咁丫嘛！宿命黎架，唔關我地事呀。」

我聽完，幾乎想dup佢。乜野叫做宿命？相士大概係算到你係個喜歡沾花野草兼天生定力其低既死咸蟲，再算到你呢幾年行既運勢有幾粒壞桃花星，所以就估你婚姻會響呢年出問題。OKOK，當然我都係靠估，不過當一早有相士就同你講：「你婚後會有婚外情呀…」你都唔好好小心避忌，反而將佢變成好似「大條道理」，犯錯只因「宿命使然」所以錯不在自己，大佬，似番個男人丫，咪賴得就賴好嘛？

有人會歸究，咁係self-fulling prophecy，我就相信，同條命冇關，只係俾你搵到個自圓其說既籍口，讓你去縱容自己。

對於命運，我相信的確係有一d，我地無法理解既pattern響入面。不過我更加相信，呢d既定既pattern，並冇百份百主宰住我地既人生。當中後天有好大部份，其實都係靠我地一雙手。

咁岩響寫呢個題目之前睇到呢篇，算唔算都係命運既一部份？

祝大家有個愉快既週末。

天使投資

2011-05-26T23:43:00.017+08:00

對上一次公司遇上風浪既時候，其中一樣最讓我感到難捱既，係面對財團股東既壓力。

當日財團代表阿Ben睇完我地盤數之後，好快就提出要我地裁員同減同事人工以減低成本既要求。當時我既處理方法係發瀾渣，我話全公司人工最貴係我，我同你做半年義工，一毫子都唔X收，咁唔駛裁員減薪啦！財團代表見我兇神惡殺像個癲佬，大概驚我會響褲袋裡面拎把菜刀出黎斬人，所以勉強就範，由得我用我既所謂「方法」去解決當時既困難。

做英雄，係要付出代價既。

自果次之後，Ben同我呢個老闆仔既「拍檔」關係開始變得僵硬。響好多有關錢銀上面既事情，逐漸變得失去互信。上一手幫我管數果位同事，因為頂唔順阿Ben每個月對住盤數既狂追猛打，響事情發生之後大半年終於選擇辭職。頂上既，係Natalie。

Angel Investor之所以咁「Angel」，就係因為佢能夠提供俾你一d，靠你自己本來既人脈同關係，冇可能獲得既財務資助。不過呢班「天使投資者」當然唔係傻既，佢地會盡一切能力唔去做蝕本生意。透過佢地直接或間接所控制既水喉，佢地有足夠power可以迫你行就行，企就企。表面上你係公司老細，佢同你之間係對等既「partner」關係，但實情係，你忽然發覺自己多左班人響頭頂要服侍，自己夾響中間，上要應付新股東既質詢，下要維持同事們既士氣。

當日拍檔同我四處敲門，希望引入這類投資者到我地間公司。對呢個決定，我冇後悔。只係人做每一件事，有得亦必有失。引入左財力足以影響你日常運作既Investor之後，從前作為一個山寨土皇帝既美好日子，自然係要講byebye。

Natalie既proposal裡面，其中一個項目，係需要我同財團果邊講講數。 OK，用「講數」呢個詞語去形容，實在係太過自欺欺人。現實一點去解讀，應該係去「乞求」援助。Natalie既理據係，今年業績好，呢個時候去同財團講要prepare for next year，要求financial support，應該把聲都可以大d。如果拖到明年先開口，當一切成本上漲既困擾都反映晒落盤數度先去call for help，唔知人地仲制唔制。

Natalie既諗法logical，我當然明白。不過我心諗，俗語話「凡事留一線，日後好相見」這句話果真冇錯。再次面對 Ben ，對於當日忽然英雄主義上腦所做既事，雖然今日依然唔算係有乜大後悔，只不過如果可以時光倒流再做一次，至低限度，應該會收起當日響會議室裡面果副惡形惡相，幾乎想殺人既面孔。

生意佬既面皮，其實只要有需要，查實可以要幾厚有幾厚。

走過低谷

2011-05-19T20:39:00.022+08:00

跟同事們計劃好面對明年成本上漲問題既應付方法。成功與否，我當然冇十足把握。我將希望放左響一班手足身上，計劃係佢地諗出黎，我亦唔覺得我會比佢地諗得更好更周長。我選擇相信佢地。

中原施老闆成日掛響口邊既「無為而治」，對我呢d中小企小商人黎講，層次大概係太高啦，到今日我都仲係未能夠全參透得到箇中既精華。不過做生意既日子越長，就越發覺自己既能力越有限。要捱過一個又一個低谷，你就一定要相信同依靠你班同事既幫助。事實上，我呢亭死懶鬼，坐響冷氣房內既時間極多，紙上談兵可能係天下無敵，但落手落腳，我諗同事們其實會比我醒得多。唯一要make sure既，係佢地真係會用心幫你，而唔係敷衍左你就算。唔好睇少呢樣野，我有時覺得，管理最難既地方，就正正響呢個位。

如果你問任何一個做左一段時間生意既商人，佢地都一定會話俾你聽，從商既日子裡面佢地遇過幾多次大大小小既風浪。做生意遇到風浪起跌，幾乎係無可避免既事。有d生意佬，頭一次遇風浪就頂唔住被淹沒，有d生意人，生命力卻強得驚人。抗跌能力既分別，當然好大程度上取決於財力，不過，我認識果d生命力強既生意佬，都有一個共通點，就係唔會怨。

以前寫過好多篇文章，叫人唔好怨。當中既邏輯係，唔去怨，唔代表你要認同現實社會係公平，又或者要你認同現今既遊戲規則。不過大敵當前，你需要既並唔係響「呢一刻」去弘揚真理公義，又或者急不及待地利用自己既挫敗去證明今日既社會有幾咁荒謬。響呢個moment，你既目標其實只得一個，就係去survive。可惜「怨氣」係一樣會響不知不覺間，讓你lost focus既東西。面對衝住你盤生意而來既困局，生意人係需要非常專注地去面對。「怨」幫唔到你解決問題不特止，仲會響你既潛意識裡面暗暗植根，逐漸「說服」你既意志，讓你不自覺地以為，因為奸人當道既關係，如你這般正義純潔卻又落難既小羔羊係冇辦法響當前情況之下贏得到。

生意佬面對既係殘酷同現實既戰場，贏就係贏，輸就係輸。輸，但係因為唔好彩，又或者錯不在你，甚至你輸係因為受到不公平既打壓也好，其實都係冇分別，反正，結果就係輸。或者一個輸家響輸既時候會諗，當好多人陪你一齊輸既時候，其實自己都唔係好難睇遮，自我感覺依舊「良好」…不過唔好唔記得，輸，影響既除左自己同家人之外，仲有跟你搵食既一班伙計。一個生意佬輸，係會累街坊架。偉大既阿Q精神，唔應該響呢個時候出動。

寫呢一篇既時候，心裡面其實係想提醒一下最近唔多清醒既自己。面對困局，最需要既其實係專注。一個唔覺意lost左focus，可以死得好慘。

心諗…

2011-05-12T22:59:00.000+08:00

企業面對成本大幅上漲既困局，最直接既解決辦法，係將成本轉嫁到消費者身上。換句話講，係加價。

中小企冇辦法將成本轉嫁到消費者身上，冇能力為自己售賣既產品加價，係因為市場有競爭。嚴價黎講，你既產品可以賣點樣既價，並唔係由你決定，而係由市場決定。

理論上，經營成本上漲既問題，同行每個人都會遇到。然而響咁既環境之下，有同行有本事賣得平過你但依然生存到，而你如果賣佢既價錢卻要執粒的話，你就大檸樂勒。

發生上面所講既情況，原因不外乎兩個：

1)人家既成本控制能力比你強，公司營運既效率比你高，所以即使同樣面對經營成本上漲，佢地唔需要好似你賣到咁貴，依然能夠生存甚至有錢賺。

2)人家明知係蝕做，不過背景同底子比你厚。商業社會裡面，冇人會長期蝕做，賣價總有一日要調升去維持盈利。但係願意蝕做既人都明白，呢個只係一個過程，過程當中，會趕走一堆底子冇自己咁厚既行家。行業整固之後，對手數量會減少，然而響咁既情況之下，儘管之前蝕左一段，但仍有力留返響度既player，往後既利潤會大幅提升。

情況(1)，問題唔大，只要你夠心思肯用腦，通常搞唔死你。

中小企最怕情況(2)，同大財團鬥有錢，係以卵擊石，找死。兼且你冇能力知道，情況(2)會持續幾耐。時間越長，死得越慘。

擺響我面前既，有理由相信係情況(2)。阿門。

新手insider

2011-05-11T22:16:00.013+08:00

對於下一個年度，公司既開支會以倍數上升既問題，Natalie同我開左好幾次會，商討過好幾個不同版本既財務方案。Natalie建議我不如搵Banker傾傾，睇睇借貸既部份會唔會有得傾下。

Natalie 係個後生女，同Banker交手既經驗尚淺。我同Natalie講：「阿女，你要明白，銀行係點做野既…」

「…？」

「通常呢，當你最唔需要錢既時候，佢地就會走埋黎叫你借錢，但係當你真係需要錢既時候，你就一定借唔到錢。」我半開玩笑地說。

Natalie只有無奈點了點頭。

或者係我對Banker既偏見都未定，但係做生意多年，同過好幾間銀行傾過借貸，呢個係我得出黎既結論。講真，我有時諗，銀行如果自己唔投資埋d古靈精怪既product害死自己，專心做存貸既生意，原則上根本係唔會輸既。每次我同銀行借錢，佢地果份facility letter裡面既terms，基本上係會令佢地完全立於不敗之地。危急關頭如果旨意佢地會幫你手渡過難關，我覺得除左響佢地既電視廣告度見到之外，現實裡根本係唔會出現。

做生意，係成日都會有風浪架啦。打工有樣好，最唔如意既，大不了都係被人炒魷。東家唔打打西家，其實冇乜大問題。有時唔好彩，遇著麻煩上司，搞事既同事，或者多少影響你返工既情緒，不過放左工，還是一條好漢。真係頂唔順，最後一著仲可以揀跳船。

生意佬既困擾係，當有問題既時候，你不但唔可以跳船，反而仲要留守到最後一刻。而當你發現問題既時候，往往其他人都未必會發覺。最近有同事仲同我講笑：「老細，今年revenue咁好，年尾我地份bonus可以加碼啦！」，我亦只好嘻嘻哈哈咁耍過就算。同事冇講錯，今年既revenue的確係好好，不過下年成本一加，你今年既revenue黎個double都分分鐘補唔返。對於前面將要遇到既困局，佢地點會feel得到？

咁多年一路咁搞下搞下，數數手指，每個月原來已經出緊糧俾近百個同事。心理壓力其實幾大，因為你知道你如果make左d錯誤既決定，又或者解決唔到某d重要既問題，會有一百人，甚至係一百個家庭受到影響。當中，還包括你自己果一個。

呢d係做生意人既代價，食得咸魚抵得渴，冇得好怨。只係響壓力之下，面對住同事既時候，仲要表現出一副：「唉，唔駛擔心喎…冇問題丫」既姿態時，有時都幾精神分裂。對於穩定軍心呢樣野，從前既Kelly係箇中高手，今日既Kathy同樣經驗豐富，這些「戲」，佢做慣做熟，演技爐火純青。我呢，過去咁多年，類似既風浪都唔係第一次，交戲，難我唔到，冇問題丫。唯獨是Natalie，後生女，第一次幫成間公司管數，第一次面對類似既風浪，成為左公司既insider之後，心裡好似總係有講唔出既鬱結。我明，明知大敵當前，但對住同事們要繼續若無其事，第一次總係覺得有點周身唔自在。

「Nat，要知道，響同事面前表現到好似淪陷咁，只會嚇親同事，等佢地亂咁傳，唔會幫你解決到問題架。」

凡事總係有第一次，試多幾次，其實慢慢就會習慣。

他們是會進步的

2011-05-10T19:11:00.006+08:00

假期裡面睇左呢篇、呢篇、呢篇、呢篇、仲有呢篇。容我抽埋呢次水，寫埋呢篇，下一次寫第d野啦。

*****

老鬼們鬧宜家既後生仔，其中一句最常聽到既話係：「我當年好似你咁大既時候，就以經咁咁咁咁啦…點會好似你依家咁？」

呢句話，我最唔敢講。

我係個七十後，比依家成日俾人鬧既後生仔，大大話話早十幾年出身。然而我剛從學校裡行出社會既時候，我同樣犯左好多依家呢班後生仔所犯既錯。對工作計較、欠缺熱誠、冇責任心、冇承擔、唔捱得、冇目標唔知自己想點、練精學懶 …我通通做齊。初出道既時候，如果老闆要我星期六OT捱義氣既話，我諗我大概會鬧情緒鬧足一日。

人係會長大同進步既。響出道十幾年之後，如果今日再犯剛才所提過既錯，當然係超低能。但係今日既CK唔會好似當年咁，犯同樣既既錯誤，唔係因為我基因特別優良，而係經過咁多年既磨練同經驗，慢慢領會到，商業社會對一個人工作態度既要求，同埋要用點樣既態度，先能夠應付到生活既挑戰。

我手下有大量既八十後年輕人，我過往亦寫過唔少關於佢地所犯錯誤既例子。然而同一道理，佢地犯錯既原因，並唔係因為佢地個底好唔得。犯錯，係因為佢地踏足社會既時間仲係好少，對現實社會既要求，仲未能夠清楚地掌握得到。但係佢地有既係時間，經過時間既洗禮，佢同我地呢班老鬼當年一樣，一樣會進步，一樣會成長。

當我有時諗番轉頭，由初出茅廬至今日變成一個老練既老鬼，當中冇錯係遇過好多荒死你死得唔夠肉酸既黑心鬼，但咁多年黎，同樣遇過好多曾經對你作出鼓勵同包容既好人。正因為遇到呢d好人，我地先至有機會變成今日既自己，學識點樣做人，學識工作應該要用點樣既態度去應付，佢地既包容，提供左成長同進步既空間俾我地。我地當日有幸遇到呢d好人，今日呢班年輕人，其實又有冇我地當年咁好彩？

今日既後生仔，並唔比你同我愚蠢，佢地係會進步既。坦白講，當我有時覺得佢地有冇搞錯，點解會唔掂成咁既時候，我係不自覺地用左今日既我，同佢地去比較。今日既我比佢地做多十幾年人，當然會比佢地老練同有方向。但如果用番十幾年前既自己，apple to apple，同佢地比一比既話…唉，我記性都仲還可以，記憶所及，查實並唔好得幾多。

做老鬼如果對佢地真係睇唔過眼，倒不如認真地幫下佢地成長同進步。總係落井下石，其實對大家都冇好處。

老鬼們在幫倒忙

2011-05-09T15:52:00.018+08:00

你信唔信「一代不如一代」？

呢句話，我從我阿爺口中聽過，我老豆比較開通，印像中我冇聽佢講過，不過從班叔叔伯伯口中就聽過唔少。

好多上一代既人話，今時今日既後生仔唔捱得，冇心理質素，冇目標，總之負面評價一大堆。我有次同一班uncle食飯，頂Q佢地唔順，當佢地圍插在坐幾個後生仔果陣，忍唔住頂撞左佢地幾句。uncle們既反應係咁既：「CK，我鬧醒佢地咋，佢地生唔生性同我地有乜關係？我地又唔係旨意佢地養我！我地係想幫你地班後生咋。」

嘩，幫我地？多謝晒啦。

我心裡面諗，你地班死老鬼，做左咁多年人，唔係唔知道，一味靠鬧，靠出言奚落，係唔會幫到人忽然開竅架下話？如果你做左咁耐人都唔明呢個道理，咁你一定係死蠢啦。但如果唔係死蠢既話，明知咁做係幫唔到手既都樂此不疲地去做，咁即係你根本冇心幫呢班後生仔啦！咁你不斷對佢地既標籤同奚落係為左乜？為左證明自己叻過佢地，踩佢地去抬高自己？咁，應該算係黑心囉。「死蠢」同「黑心」，老鬼們，你是但揀一樣送俾自己啦。

類似題目，其實寫過萬九幾十次。幾十年前，老鬼們既世界係，物質生活貧乏，但看得見前景。幾十年後既今日，後生仔既世界係物質生活富裕，但卻睇唔到希望。一個人有冇心理質素，能唔能夠捱苦，取決既關鍵並唔係因為某個人既基因有幾優良。當我知道我捱，係會有回報的話，幾辛苦我都肯捱啦。但當你發覺你點捱都係得個桔的話，邊個會咁傻同你死捱爛捱？

當提到有關「後生仔」問題既時候，我成日諗，「睇唔見希望」先至係令到佢地表現不濟既元兇。老鬼們如果真心想幫下佢地，係咪應該朝住呢個方向去做，講多幾句鼓勵下佢地，讓後生仔女們相信，世界並唔係真係想像中咁差，機會雖然少左，但係都仲係有…等佢地起碼仲會有個努力落去既理由？OKOK，我知道講呢d說話，講出口其實好似個白癡仔一樣，因為會相信既人實在太少。不過，老鬼們，你地唔去出聲鼓勵班後生仔，不如出少句聲當幫忙丫？你不斷插班後生仔有幾唔掂，只會令一班年輕人離你越黎越遠…well，如果你只係喜歡繼續陶醉響「你果一代勁過現今一代」既虛榮當中，咁又另計。

呢篇係我近期感受最深刻既一篇文章。我公司裡面既同事，大部份都係八十後既年輕人。對於一d佢地所犯既錯，我有時都一樣覺得「妖！有冇搞X錯。」不過我公司裡面，同樣有部份年紀大既同事。年紀大既老鬼伙計，係咪就冇犯錯，唔會帶俾我麻煩？講真又唔見得喎。實情係，咩年紀既人都會犯錯，都有佢地一d「低低地」既時候，但我贊同黑人所講，後生仔犯錯會被無限放大，然而恃老賣老既老鬼響香港地其實多的是，犯錯和低B既頻率同程度，不見得比後生仔少。佢地表現出黎既工作態度，一樣會令你想大巴大巴咁星落佢塊面度，只係講出黎唔夠煽情唔夠sound bite，所以大家才會唔多feel得到。

但講開又講，今時今日社會發展到現時既模式，要年輕人feel得到「機會還在」，的確係好難。我知咁講，可能像個傻佬，然而社會係好差，好多好唔公平既現象，不過部份傳媒過份渲染後生仔有幾唔掂既同時，佢地亦同時過份渲染左社會「有幾唔掂同幾咁冇希望」既情況。機會雖然係少，不過，應該仲係有既…

總之，千祈唔好俾人睇死。

Plan B

2011-05-07T01:00:00.010+08:00

會議室裡面，除左我，仲有Kathy，管數既Natalie，管Sales既Joe。

「我地有近半既舖，租約會響明年到期…」Natalie皺起眉頭：「我同Agent傾過，如果我地明年全部續租既話，同我地existing既租約相比，租金成本起碼會升一倍。仲未計各位同事依家坐緊既呢個HQ辦公室，呢道個lease都會響明年中到期。」

Natalie既開場白，換來會議室內一段短時間的沉寂。

「OK…」Kathy首先打破沉默：「Nat，根據你既forecast，如果要維持今年既利潤，要做多幾多Sales先夠？」

「如果一切冇變，30%左右啦。」Natalie響佢本notebook度襟左另一個spreadsheet出黎：「30%係假設agent對明年續租果陣既租金估計冇錯。不過家陣個市咁癲，下年既租金會唔會比agent所估計既仲要高，其實大家都冇把握講。」

「反正短期內唔會有更準確既預測…」Kathy一貫冷冰冰地說：「就先assume要將Sales提高30%。Joe，有辦法嗎？」

「一個字，難。30% in a year喎…」Joe嘆了一口大氣：「我即刻答你得你都唔信啦。等我返去同我班sales傾傾可以點搞，然後work out個plan再同你discuss。」

「有冇嘗試過同班landlord早些少傾續租？」我問。

「試過啦…」Natalie回答：「個個都唔肯依家start個negotiation啦。大家都明，個個都睇明年仲會大升，對佢黎講，梗係拖到最後先同你傾有佢著數啦。」

「Landlord果邊冇得諗，唔會有咩轉機架啦。」Kathy望住頭都大埋既Joe：「Joe，依家睇你啦。公司往後落黎既決定，主要取決於你有冇辦法提高30% revenue。有既話，一切依舊。唔得既話，就要焗住行plan B。」

Joe點了點頭。

我也只能抽一口涼氣。面對業主和地產商，我們總是被牽著鼻走。

*****

做生意其中一樣最沮喪既事情，就係每當你千辛萬苦以為站穩左陣腳既時候，你既成本忽然又會大幅增加。當中，最「甘」既，必然係租金。

我討厭「最低工資」呢條法例，不過有人話，真正令中小企經營困難既，並唔係工資問題，而係天價既租金。這一點，我其實也無法否認。經濟好既時候，人工會升，令到經營成本上漲，呢個係必然既事實。不論有冇最低工資都好，響工資方面既成本上升，都必定會發生。不過有關同事們既人工，佢既升幅係一個相對能夠預算既項目，難聽d講，升幅既百份比，按年計其實有限數。最好市果幾年，一年俾你升十個，甚至廿個巴仙又如何？生意佬響有預算既情況之下，總係會有辦法應付得到。但係租金呢？冇準架喎，忽然間話個市好旺，landlord話升你一倍租咪一倍租囉，駛俾面你？佢見你好生意既時候仲大鑊，加多你幾錢重添。你有冇say？梗係冇啦。

地產霸權係一個講到爛既課題，經濟發展到某個階段，自然會出現一些跨行業跨界別，勢力超強既超級巨企。響咁既環境之下，中小企要生存其實存在極大既難度。對生意人黎講，最頭痛既莫過於經營成本既不穩定性。偏偏香港地做生意，由於租金佔左總經營成本既一大截，而呢一部份既經營成本既fluctuation卻又大得驚人，財政稍為唔穩健既中小企，往往就被淹沒。

我親眼見過有起步幾年既行家，做左三年左右，終於企穩陣腳。正當大家都以為佢應該可以繼續發展落去既時候，landlord加佢兩倍租金，原來既business model即時變成一個non-sustainable既生意模式。幾年既努力，即刻化為烏有。

商業社會裡面，每一個business都嘗試去maximize佢既利潤。小弟既公司又何嘗唔係？地主、地產商所做既，同我做既一樣，同樣係去maximize佢地既profit，作為一個商人，我冇得怨話佢地逼人太甚。只不過，本地既商業環境運行到今時今日，一盤生意要好好存活落去，難度的確係越黎越高。當最低工資立法時，好多商人近乎發瀾渣地抗議，好多人以為佢地只係因為無良，想樣樣賺到盡。我就反而明白，響經營環境變得越黎越惡劣既香港地，每日都擔心緊聽日盤生意唔知仲捱唔捱得住既日子裡面，任何再加重佢地負擔既措施或法例，都會觸動到呢班商人既神經，令佢地情緒失控。

其實大部份既商人，都唔係一般人眼中咁掂咁風光。當然，果班大孖沙係例外。

祝大家有個愉快既週末。

新人

2011-05-05T14:16:00.010+08:00

正如CM所講，請靚女高層往往帶來麻煩，決定聘用Kathy既時候，心裡面其實都有點十五十六。一來，Kathy響一眾我In過既人裡面，唔算係特別突出(問題係根本冇乜邊個明顯好outstanding先麻煩…)，二來，Headhunter收費唔平。合約裡面話，幫你搵個GM返黎，Headhunter收費係佢Annual Package既三成。我篤下計數機，條數都幾襟計。

「唔駛擔心喎CK…」Headhunter打電話同我跟進Kathy既僱員合約：「我地份contract度寫明丫嘛，三個月內你如果覺得佢唔適合，我地免費再幫你搵過第二個丫嘛。」

免費再搵過個俾我？唉，你點話點好啦。

請人呢，冇人會喜歡請個又蠢又笨既。今次請GM所見既人，全部都係醒目仔女。不過我發現，有時太過醒目，反而會令你覺得有d唔舒服。特別係行內人果一批candidates，我心諗，你黎我度見工，我問你有關你既工作，你可以咁滔滔不絕咁將你既經驗話俾我聽。其實當中，有幾多係佢老細、又或者ex老細好唔希望會俾我知既呢？今日發生響佢地既身上面，如果我請左佢地，他朝同樣既事情，一樣會發生響我既身上。

Kathy第一日返工，講真，我係有一種前所未有既壓力。畢竟Kelly響度既時間太長，佢同好多同事一齊成長，一切都理所當然。Kelly走，我知道有同事會expect內部有人調升去佢既位置，最後我選擇外聘空降一個新GM落黎，我估部份既同事多少會覺得失望。有時覺得都幾諷刺，以前打工果陣，以為一個打工仔去返一份新既工作先會心情緊張，原來做老細，請一個新上工既下屬番黎，佢返工時你仲緊張。

「呢位係Kathy，你地既新GM…」會議室裡面，我將佢介紹俾我幾位department head認識。大家循例地握過手之後，新既日子就重新開始。

外表冷冰冰既Kathy，估唔到連隻手都凍過人。我握手歡迎果陣，我以為自己渣住條雪條。

同Kelly既落差咁大，我個心不斷響度諗，唉，查實掂唔掂架…

*****

Kathy上班前幾日，我收到Chrissy既電話。

「喂，我收到風喎…」電話中既Chrissy笑哈哈地說：「你請左我個好姊妹做GM喎。」

「係呀…過兩日佢返工啦。」我說：「放心啦，我唔會恰佢既。」

「車，你恰得到佢先講啦！」Chrissy語帶不屑：「我怕你掉轉頭俾佢恰多d喎。」

「點解咁講？」我好奇問。

「emmmm…」Chrissy唔知係咪知道自己多口講錯野，答得支支吾吾，兼拿拿臨轉換話題：「你囝囝最近幾好嘛…佢…今日有冇便便呀？噢…查實我打黎唔係想搵你，係想搵你老婆…」

唉，想點呀。

假象

2011-05-04T16:36:00.000+08:00

朋友Gigi係一個心地善良，好喜歡照顧人既女孩子。之前佢交過好幾個男朋友，不過唔知係佢母性太強太習慣照顧人，抑或係遇人不淑。所交既男朋友，感覺上大都係好似個小朋友咁。總之，起居飲食總係要人照顧，而且當呢幾個男朋友玩到忘晒形既時候，往往就會唔記得左個女朋友。

作為女朋友既Gigi，響熱戀既階段果陣，都還可以忍受得住。日子耐左，就覺得身心俱疲。

「CK，我真係好累啦…我係佢女朋友黎架，點解總係要我照顧返佢？」

後來，Gigi認識了一個新男友。這次拖，一拍就四年。

呢個男朋友係個來自美國既鬼佬，或者係鬼佬既關係，睇落去個樣好似比Gigi大一截，但實情係佢地年紀差唔多。

我最初以為，Gigi終於搵到個可以拍長拖既男朋友，相比以前果幾個，呢個梗係成熟好多啦掛？以前鋪鋪Gigi嗌分手都係因為嫌個男仔太過幼稚，太過需要佢照顧。呢個拍得咁耐，應該唔同啦我估。

我冇將呢個問題直接向Gigi問，不過某日一班朋友聚會既時候，Gigi投訴佢男朋友既日常習慣，聽完之後我地一班朋友全部都眉頭皺，因為呢個人既問題，同佢之前果幾個被佢飛左既男友既問題，何其相似。

我忍唔住向Gigi問：「Gigi，老實講，如果你依家呢個男朋友，唔係一個鬼佬，而係好似之前既男友一樣，係香港既local人，你既容忍會唔會都係一樣？」

我知呢個問題係假設性兼應該唔多受事主歡迎。不過Gigi左諗右諗，都係只能夠答我一句：「冇諗過喎…不過你霎時間咁問，我真係唔知喎。」

我心諗，假如佢真係有一d吸引你，又或者能感動你之處，令你可以「破例」接受佢既缺點，你唔係應該可以好肯定咁答我「會」既咩？

種族既不同，係咪帶黎左一d假象？

*****

表弟係個so call宅男。喜歡打機，上高登，睇漫畫…等等等等。

表弟既屋企人對佢呢堆興趣好有意見，認為佢二十幾歲人仲沉迷埋d咁既玩意，好幼稚。

我同阿姨講：「興趣遮，冇乜分話幼唔幼稚既。做人要有d興趣生活先會開心嘛。」

事實上，打機，上高登，睇漫畫呢d所謂幼稚既興趣，我通通都有做。年輕既時候，身邊既長輩個個都話我咁樣落去唔掂，叫我唔好再咁幼稚啦。後來做左生意，搵錢多左，我都照樣係做返同樣既野，家陣仲多左樣「寫扑」添。不過現在卻冇人話我呢d所謂興趣有問題喎。

係咪又係另一個假象？

當你冇事業既時候，喜歡打機人地會嫌棄你幼稚。當你有點事業既時候，你依舊喜歡打機，但係人地卻稱讚你「有童心」。咁究竟邊個先真係幼稚？

我有時諗，世界上有幾多算得上係「唔幼稚」既興趣？憑乜野可以講，「打機」係一個比「飲紅酒」又或者「打Golf」幼稚既興趣？

只能夠話，興趣本身，冇所謂幼唔幼稚之分。只係當一個人沉迷一樣玩意，令到佢忘記晒自己其他責任，咁先叫做有問題。

尋找新右手

2011-05-03T18:46:00.014+08:00

「老婆，記唔記得阿Fred同Chrissy結婚果陣，同你一齊做姊妹果個Kathy？」我問。

「梗係記得啦…」老婆笑得有點蠱惑：「靚女Kathy嘛，你地兄弟團班兄弟個個都眼定定望到實果個丫嘛，點會唔記得？」

「你覺得佢個人OK嗎？」我問得一臉認真。

「hmmm… 」老婆既答案有點猶疑：「見得佢咁少時間，好難答你喎。不個佢唔係太出聲架。初初見佢個個都覺得佢好cool，不過大家做落野之後又覺得其實佢都幾好人。老公，仲乜問埋d咁既野？」

「冇…」我嘆左一口大氣：「佢今日黎過見工，見Kelly個位。」

*****

唔記得邊個大粒佬講過，企業去到唔同既階段，會需要唔同款色既領袖。

Kelly突然辭職之後，我急不及待去找尋補替佢既人。Kelly入黎做既時候，係個二十出頭既小妹妹。佢係我一手一腳訓練出黎既員工，所以佢處事既手法，同我心目中所期望既好相似。點知到佢走啦，找尋佢既補替時，困難卻出現。

尋找過程既初期，我嘗試去找尋一個同Kelly風格相似既人，因為我覺得咁樣應該會使公司過渡既風險減到最低。不過人係獨立既個體，要搵一個style相似，能力又相若既人，邊有咁易？

Headhunter refer左好幾個candidates俾我，有行內既，又有行外既。因為係請GM，Headhunter send過黎既人，大部份響原先既公司，職位都唔會太低。全部都係醒目仔醒目女，interview表現個個都誇啦啦，而且有track record backup，要揀，其實都幾難。

Kathy係Headhunter refer既其中一人，面試時，第一眼我就覺得好面熟。如果我要講以前Kelly既強項，我諗應該係佢圓滑既處事手腕，同埋平衡各方利益既能力。Kelly俾人既感覺一d都唔aggreesive，而且外表傾向柔弱同親切。我唔知呢個特質係咪幫到佢去處理好多難搞既人際關係問題。至於Kathy，感覺同Kelly實在有好大好大既分別。

Kathy比Kelly樣子更加標緻，我諗佢絕對屬於果種會吸引男人眼球既類型。不過漂亮既同時，感覺卻冰冷得要命。我同佢既interview裡面，佢答我問題既答案，普遍都比較精簡，不過精簡得黎，其實都幾到point。可能Kathy係行外人，對於佢一d對行業既睇法，我事實上係諗都未諗過。響今次請GM既過程，我In過既人裡面，有行內既，亦有行外。行內人既好處係熟手，呢個唔駛講都明啦。不過唔好處係，一切都太過理所當然，亦唔會有d乜野新既角度。In左幾個之後，我覺得個個都差唔多，質素係唔差，不過冇乜驚喜。

後來我要求Headhunter幫我嘗試搵d行外人俾我見，情況反而讓我覺得有點意外收獲。冇錯，佢地對行業既認識或者唔夠我多，不過每次Interview既過程裡面，我卻覺得自己都有得著。一個行外人點睇我地呢一間公司，點睇我地既發展，往往會出現一些讓我意想不到既idea，讓我覺得，呢一堆interview，居然令我學到唔少野。

Interview去到尾聲，我忍唔住問Kathy:「你好面熟，我其實之前係咪見過你？」

呢句對白「老土」既程度，連我講完都覺得自己好樣衰。

「係呀。」Kathy還是冷冰冰地點了點頭：「Fred同Chrissy既wedding上面我地見過啦。我同你太太一齊做姊妹。」

原來佢老早就認得。

相比其他candidates，Kathy係咪特別好，特別適合接替Kelly？我唔敢講。不過當你見左一大堆人，而呢一大堆人既條件同表現又相若既時候，有兩樣野好明顯係會帶來一點優勢：

1)靚女；
2)原來你疑似「認識」呢個人。

睇到呢度，你大概響度笑我，揀GM居然會如此兒嬉？

朋友，就算你唔兒嬉，好科學好認真地選擇呢個人，你其實又有幾多把握，會揀得比我呢個兒嬉既方法好？

請人，其實從來都只是靠感覺。

她們的聰明

2011-05-01T00:46:00.009+08:00

新架坡回程的航機上，收到Stephy WhatsApp過來，囝囝剛剛返playgroup 上堂時既照片。

「先生…」空中小姐笑容很漂亮：「飛機要起飛啦，麻煩你將手提電話關機。」

我點了點頭示意明白，然後匆匆回覆左老婆既message，提醒佢記住等埋我先好開飯，然後關掉iphone，閉上眼睛，期待能夠盡快返到屋企。

我成日覺得，一個聰明既老婆，總係會有點辦法讓自己既老公，每日都期待住「回家」既感覺。

*****

響飛機上面，Kelly既故事反覆響我腦海裡面出現。一個女人放棄自己既事業，為既只係成全老公，希望老公可以成功。雖不至於用「偉大」去形容，不過，點講佢都應該屬於「好女人」啦掛。邊個話香港冇好女仔？

願意為另一半作出犧牲既香港女性，就我認識既絕對唔只Kelly一個。呢種「犧性精神」，我覺得係女人最終極既優點。好多人覺得香港女仔唔掂，但我卻覺得，當一個香港女孩子認定左你係佢既終生伴侶之後，佢地呢一種為婚姻同家庭既犧牲既精神，就會不自覺地流露出黎，而且會不離不棄地同你共渡一切患難。呢一種特質，響好多其他民族既女性身上反而係搵唔到。

唔同意我既講法？

我諗，一個男人覺得身邊既女伴係咪一個「好女人」，好大程度上取決於，女性到底響相處上有幾「聰明」。Kelly係個聰明既女孩子，過去咁多年，佢賺錢能力都比佢老公強，不過聰明既Kelly從來都冇向老公表示過任何埋怨。我好清楚，其實佢一直都為佢老公既事業著急。如果一個愚蠢既太太，遇上咁既情況會點處理？可能佢會選擇日哦夜哦，叫老公生性d，上進d，希望有一日煩到你會生性為止。再愚蠢d既太太，可能會「懶醒」地運用激將法：「你睇下呀邊個邊個既老公，人地同你一齊入行，家陣人地搵多你幾多…」。

Kelly聰明在，佢明白上述既方法不單止冇用，而且對男人黎講仲會有反效果。記得佢仲響我公司做既時候，有一次吹水傾開佢老公事業停滯既問題，佢話：「其實作為佢老婆，冇乜野可以做架喎。嫁得佢就要信佢會盡力，或者唯一可以做既，係俾佢知道其實我心裡面好支持佢，同埋我一d都唔介意佢人工比我低囉。」我認識有一些couples，老公其實事業都唔算太差，不過身邊既太太，總係覺得自己老公返工返得唔夠醒，於是平日總係喜歡對老公既工作方式、處事技巧指指點點，感覺活像阿媽教仔一樣。每次個老公響工作上遇到不如意，返到屋企向太太傾訴，所換來既回應總係一些「阿媽教仔你要聽」式既訓話。久而久之，老公仲點會將工作上遇到既事，帶返屋企同另一半分享（又或者分擔）？甚至因為咁樣而賠上婚姻既例子，我亦見過唔只一單。

講真，我覺得聰明又好，愚蠢又好，佢地既出發點其實都係一樣，只係希望老公能夠出人頭地。為左達到呢個目的，佢地係願意作出犧牲既。不過聰明既女孩子懂得目標為本，睇得通點樣先真正幫到身邊既另一半，唔會做一d冇效益而又惹人反感既事情。愚蠢既人卻剛剛相反，佢地會藥石亂投，而且只懂乾著急。情急之下往往做出一大堆讓另一半討厭既動作。儘管佢地同樣有讓人敬佩既犧牲精神，但效果往往適得其反，達唔到目的不特止，最後連婚姻關係都破壞埋。

囝囝出世既時候，兒科醫生同我講，男仔BB通常會比女BB學習慢一d。呢個係天生既pattern黎既。一直以黎，女孩子比男孩子早熟一d，其實正常不過。女孩子面對一d比自己冇咁成熟既男人，有時可能真係會好心急好谷氣。但係聰明同愚蠢既人既分別，係聰明人會知道有乜野係急都急唔黎，只能夠默默等待機會，唔會過份勉強。一個本來幼稚既男人忽然開竅，變得上進同有承擔，最大既可能，係受到女人長期既溫柔所感動，而唔係被自己老婆不斷以「阿媽教仔」既姿態所鬧醒。

祝大家有個愉快既週末。

嫁雞隨雞

2011-04-28T23:21:00.016+08:00

去新架坡開會，臨離開前既晚上，順道約左Kelly 出黎晚飯，聚聚舊。

「冇見一年，肥左喎！」我講笑：「心廣體胖，即係生活愉快啦。」

「你呢句好明顯唔係讚美喎。」Kelly回敬一句：「老細，你都唔弱丫，咁你又係心廣體胖，抑或中年發福呀？」

「仲叫我做老細？」我老沒好氣：「我冇做你老細好耐啦…」

一年前左右，Kelly有一日突然將一封辭職信交到我手裡面。對我黎講，佢既離開係幾咁驚訝同讓人慌張。Kelly同我共事接近七年，一直係我最得力，亦最出色既同事。一直以黎，我都習慣將公司大小事務交俾佢處理。同佢共事多年，佢既處事手腕俾到我無比信心。我好清楚，每件事交到佢手上面，應該唔會有d乜大問題會發生。公司裡面有一個咁幫得手既同事，係作為老闆既福氣。只不過老闆同伙計既關係，並唔係一生一世，始終會有完結既一日。好伙計最大既問題，係會寵壞老細，讓老細養成依賴既習慣。當老細事無大小都叫呢個好伙計搞掂既時候，到有一日好伙計要走，老細先知道大鑊：「頂！你走左，邊個幫我搞掂果d乜乜物物…？」

我一直強調上司同下屬之間唔應該有太多感情存在。跟上司又好，跟公司又好，講感情係愚蠢既事情。不過我又不能否認，Kelly同我，又或者公司係存在住一d微妙既感情關係響裡面。我唔敢自稱係甚麼伯樂，不過我的確響佢跌得最低既時候俾過一個機會佢。我諗佢多少係有點感激響心裡面，過去七年佢亦努力回報公司。過去既日子裡面曾經好幾次有行家出更好既待遇，嘗試將佢挖角，佢始終都不為所動。對此我亦有點喜出望外。當你以為呢位同事好有可能成為你一路往後，響工作上既長期伙伴時，情況響一年前卻忽然有所改變。

Kelly既老公，被公司調去新架坡。之前不斷既高薪挖角，都無動搖過Kelly。然而當佢老公被調離香港既時候，佢諗都唔諗就同我辭工。

係唔係嫁雞隨雞？我唔知道，不過佢話走既時候，我第一個反應係：「喂，查實你搵錢多過你老公喎。是但一個要放棄事業既話，理性得黎又銅臭一點地去諗，係咪應該係搵得少d果個？」

「CK，我好彩年青既時候遇到你地，你地肯俾機會我遮…」一年後Kelly娓娓道來：「我老公冇我咁好彩，佢既機會黎得遲，去到最近先出現。或者遲係遲左d，不過我唔希望佢要因為我，而錯過左得黎不易既機會。」

「講到尾，我查實都係女人仔一個。事業對我黎講，裝飾品黎既遮。婚姻同家庭，先係我既人生。」

女人既無私，有時的確讓人肅然起敬。

故事原來仲有一段小插曲。話說當日Kelly既老公，知道公司想佢調職新架坡，其實有點進退兩難。佢老公知道，今次既調職係難得既機會，接受調職之後，升職應該指日可待。不過正如我剛才講，Kelly其實搵錢比佢老公多，事業發展得相對比老公順利，佢老公當初其實好猶疑，係咪真係應該接受，要搵得比自己多錢既老婆犧牲事業，去成就自己。Kelly見老公左右做人難，於是就搶先一步，向我遞上辭職信，讓老公冇左猶疑既理由。

「做女人係咁架啦…」Kelly還是一臉滿足：「仲有呀CK，我都唔係後生啦，有d事，年紀大錯過左會後悔。」

Kelly指了一指自己微微隆起既肚皮，然後鬼馬地笑了笑。

「嘩，唔怪得我覺得你肥左啦！」我指著她肚皮：「幾時出世呀？BB要搵契爺既話，不妨考慮下我喎。」

祝你地永遠都幸福快樂。

Exit

2011-04-28T01:53:00.009+08:00

對於自己盤生意，我一向視為親生仔一樣。從來未試過好似今年，閃過咁多次想搵exit既念頭。

好多人對生意感到意興欄柵，都係響遇到困難既時候，又或者正在走下坡既日子裡面。對我黎講，情況卻剛剛相反。公司其實發展理想，今年收到好多有興趣既買家問可唔可以賣盤。以前我既答案係，踩你都傻啦，我仲咁後生，賣左間公司俾你，咁我以後幾十年做乜呀？你買我間公司既錢，係咪夠我過世先？唔係既，公司又賣左，我又要失業，人到中年，唔通去再培訓咩。

人到中年最讓人覺得可怕既，係有時有力不從心既感覺。二十幾果陣，覺得人定勝天，有決心冇野係應付唔黎既。捱夜？冇問題丫，要幾多有幾多。壓力？後生仔怕乜壓力呀？點知咁既心態做左十年，忽然發覺，嘩，家陣唔掂。

有關壓力呢回事，最大鑊係自己其實feel唔到，因為你經已太過習慣。放工後你個腦係咪響度繼續工作？當然係啦，咁多年都係咁。你習慣到唔覺得係問題，只係身邊既人不斷會提醒你：「喂，唔好諗住先啦，俾自己休息下啦…」我成日話，大腦係一個不能自我控制既體系黎既。記唔記掛住某一d事情，係咪有d野可以停止思考，其實我覺得都唔能夠自行控制。

直到你有一日發現，點解今年會花左咁多錢睇醫生？於是你開始懷疑，自己既生活習慣可能真係出左些少問題，一直唔多覺既壓力水平，可能真係有些少超標。

人個腦會講大話呃自己，但係身體會同你講真話。CK，你唔係十八廿二啦，再係咁，你會頂唔順。

有個想創業既朋友問我，其實你都有伙計幫你做晒d日常工作啦，你既壓力究竟來源自乜野？

冇做過生意既朋友，好多時會誤會，壓力係來源自堆積如山既工作。其實工作量對一個生意佬所構成既壓力，我諗其實少之又少。最大既壓力來源，應該係響競爭激烈既營商環境裡面，一間表面好似經營得好好既公司，其實無時無刻都受住隨時瓜柴既風險，只係打工果個自己唔覺。

而一盤生意既生命，又同老闆既財富環環緊扣。當你每日徘徊響「發左達」同「傾家蕩產」既兩極之間，壓力就係咁樣產生。

想逃避所以會諗exit，但更清楚既係，生意玩到咁上下，想exit其實唔係想像中咁easy。

路上

2011-04-25T01:52:00.007+08:00

響香港開車多年，發生過一千零一次交通意外。幾年前響隧道口無啦啦俾架貨Van撞到車尾，我一落車貨Van司機就一輪粗口飛埋黎，又鬧我唔識渣車，又話我阻X住佢搵食芸芸。本來諗住人冇事，求其叫佢賠番幾舊水等我噴返條bumper算數，不過你一落車就出口成文仲要聲大夾惡，我唔報警都對你唔住啦。點講都係你從後撞到我，點計都係你輸，你仲響度同我鬥大聲？

今日，幾乎又撞。我架車上面有個BB，速道自然唔會好快。交通燈前綠轉黃，我自然收慢油準備紅燈前停車。後面有架的士，一路跟得好貼，我收油停車，佢又幾乎撞到我尾。停車等燈既時候條友響後面仲要狂響鞍以示不滿，我幾乎想落車鬧人。身邊老婆拿拿臨襟住我，叫我唔好霎d無謂氣，畢竟小事一樁，兼且BB響車上，無謂惹麻煩。

兩次「意外」既對手都係搵食車。我明白搵食艱難，有時分秒必爭。不過路上點都要講安全，你冇得埋怨你前面架車點解唔衝紅燈架下話？你唔要命，但其他人要呀唔該。

*****

近年多左返國內工作。正當每個人都話大陸變得越黎越先進同文明既時候，有一樣野我每次上去都覺得上面仲係好唔掂既，就係交通安全。每次機場落機後，所搭既果一程的士，都係我每次公幹時最不安既一刻。去左咁多次，我幾乎從未遇過一個令我「放心」既的士司機。國內司機有一個特質，就係對自己既駕駛技術同反應充滿信心。我望住司機前既標板，時速百六、百七公里往往係等閒之事。失驚無神隔離閃出另一架車，司機狂踩brake幾乎將你拋出車外，最大鑊係，你左望又望，響車廂內都搵唔到一條安全帶係work既。

機場去酒店既四十五分鐘車程，感覺尤如生死時速。我有時諗，大佬，即使我信你真係技術了得反應又咁出色，但係你架車有冇定時定候去做maintainence同check up架…

*****

認識有朋友響車禍當中幾乎冇命。講真，九成既意外之所以會發生，都係因為負責渣車既，對自己太有信心啦。我渣車越耐，個膽就變得越黎越細，安全地渣車，係好唔型，呢個我明。不過你好型但係累街坊，你型爆又如何？

婚外情

2011-04-20T16:24:00.003+08:00

It's too common，common到讓我嚇驚。

我有一日無聊響度數一數，我認識既朋友當中，結左婚而又有（或曾經試過有）婚外情既朋友，居然接近四份一，仲未計冇講我知果d。嘩，究竟發生乜事？

唔好以為我講既朋友全部係男人喎，響呢個題目上面，我反而認真感受到，乜野叫做「男女平等」。

有兒有女之後，家庭既責任多左，婚外情既情況會唔會稍為收斂一d？就我眼見，唔會囉。情況好似仲差左喎。

*****

結婚之後，老婆係我精神上最大既依賴。你冇睇錯，係「依賴」。人需要另一個人去支持自己。當自己唔掂既時候，要知道有人依然會撐你，企響你果邊，個人先會有動力去撐落去。曾經睇過有文章講話，世界上讓人感到壓力最大既事情，就係「喪偶」。呢個結果唔難理解，畢竟人既傳統習慣，就係精神上你會「依賴」你既另一半，不管你係大男人又好，小女人又好，本質其實都係一樣。

我同我一d曾經有婚外情既男性朋友傾過，問佢地發生婚外情既原因係乜野？係咪衰咸濕呀？當然，我咁問當然冇一個朋友會答係。不過，我信喎。衰咸濕的話，俾錢就可以解決啦，犯不著要搵件婚外情上身以至後患無窮。

同佢地傾有關問題，得出既結論大概係咁既：「at the end of the day，發覺佢地既老婆(or老公)原來唔能夠俾佢地響精神上依賴。」佢地既wording通常係：「我老婆唔明呀…」，又或者「我老公唔care我呀…」之類。總之，當佢地需要依賴既時候，另一半擺出一副踩佢都儍既姿態。屋企裡面冇人俾佢依賴一下，反而屋企外面又適逢疑似有人肯交個心出黎讓你依賴，有供有求既情況之下，於是一拍即合，中曬招。

咁點解屋企裡面果個，會俾唔到精神上既依賴自己呢？我諗呢個應該係問題所在。我朋友們既答案臨臨種種，不過出現次數最多既，居然係：「其實一開始就唔夾，當初同佢結婚跟本就係錯誤選擇…」。好似好難聽咁，似係籍口多d喎。不過我卻有少少唔同既解讀。難聽d講，現代人好多其實腦唇都未生埋。幾十歲人，唔代表你有足夠既maturity去handle一段婚姻。結婚生仔，當中有好多承擔同責任，但係有幾多人響做呢d野之前，心理上真係做足左準備？好多人自己都搞唔掂，仲要support埋另一半甚至個仔，所需要既成熟根本係超出左佢地能夠應付既範圍之內。風平浪靜既時候情況還可以，一有風浪既時候就見真章。

四份一，對我黎講係個相當嚇人既比例。最大鑊既係，我幾乎未見過（或者仲未見到掛…）婚外情係有一個好既結局。響呢d事情上面，有時爭論誰對誰錯其實意義不大，反正發生之後，不論任何一方都係輸家。

阿仙奴

2011-04-18T17:15:00.005+08:00

趕得切夜機飛返黎睇阿仙奴對利記既直播。作為阿仙奴既死硬Fans，失望，真係好好好失望。

我鍾意阿仙奴，其中一個主要原因係因為我喜歡佢地所給予年青人既機會。今時今日，後生仔最缺乏既就係機會。但係隨住自己都已經從後生仔「過渡」成為中年人，慢慢發覺後生仔最缺既，原來唔係機會，而係心理質素。

我睇過好多有關阿仙奴既評論文章，提到佢地有某些位置球員既質素太差，最obvious既係龍門。中堅又唔夠硬淨，防中又冇cover。係係係，所講既通通都係，只不過佢既對手又真係強得咁緊要咩？錢多到駛唔晒既曼城同車仔或者係，不過佢地成績比阿記仲差，我雖然覺得領隊雲加講黎講去都都係三覆被，但係我卻好認同，錢係買唔到冠軍返黎。至於響榜首既曼聯呢？人腳唔見得特別好喎。你睇佢地條中場線？今時今日仲要靠兩個老鬼輪流撐住就知其實人腳有幾唔掂。不過，佢地卻能夠交出一次又一次，水準穩定既功課。

踢波又好，做人又好，心理質素我諗最大既成份係信心。自信心一唔夠，發揮就唔會流暢。你攻左半場你攻極唔入，你就開始擔心，會唔會又俾人守和。贏緊幾粒打順境波你以為冇問題咩？過程裡面一有乜風吹草動，自信心即時崩潰。紅牌同受傷，響比實裡面成日都有，但當發生既時候，你又即時開始諗：「死啦，衰運黎啦，會唔會贏緊都輸返轉頭呀？」結果明明領先人4粒都夠膽死俾人追平，真個明白咩叫做「波係圓既」。

個個weekend坐定定睇阿記比賽，越黎越體會到Murphy's Law既精髓，乜野叫作「Anything may go wrong, will go wrong」。足球比賽同人生一樣，有好多挫折既時候。一場表面上強弱懸殊既比賽，強隊佔左九成時間攻門，弱隊一次偶然既突擊，可以將形勢徹底逆轉。當處弱勢既時候，人所能展現出既韌力同心理質素，往往先至係笑到最後既關鍵。今時今日既後生仔，究竟有冇呢一種特質，響過程並不如自己所期望既時候，仍然能夠沉著冷靜地去面對？

論能力，我堅信後生可畏。論心理質素，我還是有點保留。

相差6分，以今屆人腳既心理質素，我不敢存有任何希望…除非個波，真係比我地想像中，更圓。

保障嗎？

2011-04-12T23:36:00.011+08:00

我辦公室裡面放左一張我同拍檔響公司開張時所影既相。相片中既我地，將原本掩蓋左大半塊面既口罩，暫時移左落去下巴既位置，好讓照相機能夠影到我地個樣。我好鍾意呢幅相，因為佢除左記錄公司開張時既影像，同時亦記錄低，公司開業時既「歷史背景」。

幫我拿相機既係我第一個自己出錢請既員工。大學程度，剛畢業，人品正正常常啦。當日市況太差，週圍都恐慌，根本就搵唔到工。同事見到我地登既招聘廣告，就黎我地果個當時還未裝修好既爛鬼寫字樓見工。佢當然知道我地新開公司仔唔會出得起錢，佢亦知道唔會響我呢亭爛鬼工司仔度長做，不過作為畢業生，碰岩咁既市況，佢需要一d可以寫落resume上既「經驗」，唔想無啦啦有段blank左既時間響履歷表上面。佢離見工既時候講得好坦白，正值我地又等人駛兼俾唔起錢，難得佢只志在有份工俾佢寫落resume，開價二千，我覺得直頭係姣婆遇著脂粉客，我諗都唔諗就即刻應承。唔夠一個月，疫情開始慢慢舒緩，市民既恐慌亦慢慢減退。我第二個伙計，跟第一位員工理由同背景一樣，經已開價四千，我依舊係諗都唔諗，即請。

明知佢地做唔長，不過小弟創業既頭半年，就係靠呢兩個超級underpaid既員工幫我捱過。冇佢地，我今日所擁有既一切都應該唔會出現。咁我諗，時間假如推遲八年，結果會係點？結局應該係，CK俾人拉左，因為呢條粉皮會俾人告冇俾最低工資兼背上無良僱主既罪名。

朋友係佢住緊果棟大廈業主立案法團成員，佢棟大廈不嬲請左個七十幾既阿伯做看更。阿伯人工好低，佢肯做係因為貪呢份工能夠提供一個夜晚俾佢渡宿既地方。七十幾歲既保安，諗都諗到，其實好打極有限。最近立案法團話要考慮辭退個阿伯，因為最低工資會令佢人工加一大截。立案法團裡面既成員怕，咁貴請個完全唔打得，又唔睇得既保安員響度，住客會唔高興，會質疑佢地亂洗錢。

保障嗎？come on。

我係商人，商人九成九都唔鍾意最低工資。今日我既員工裡面，冇人收緊最低工資既人工，但我依然對呢條即將go live既例恨之入骨。經濟學上佢有幾有效保障勞工，我唔敢亂吹，但眼見到既，係失去保障多過得到保障。

我更加討厭政府既法例唔清唔楚既處理手法。法地價期同飯鐘問題，obvious到無可再obvious啦下話，點解政府可以好似完全冇諗過，冇準備過咁？到翠華同大家樂去減呢d錢既時候，先好似如夢初醒咁？呢d問題，老早就諗到會發生啦下話？政府非正式地呼籲，僱主響呢個問題上面，雖然係自行決定，但都要有良心…我心諗，係咪傻架？最低工資呢條法例之所以會出現，就係大家預設左商人係「無良」既丫嘛，咁立完法之後，忽然你又期望班商人會突然變返「有良心」，究竟係咪有病？

我寧願你立法，硬性規定飯鐘同假期係有薪既，咁個個都要跟住做。好過你立得唔清唔楚，是是但但拋返個波俾班商人。係咪嫌家陣香港人既仇商情緒仲未夠深，想響我地班小老闆身上踩多幾腳先安樂？

囝囝的未來

2011-04-11T15:49:00.004+08:00

對於囝囝將來讀邊間學校，我諗我算係朋友間「相對」冇咁緊張既一個。

我之所以講係「相對」冇咁緊張，一來我個仔仲細，問題未殺到埋身。二來我其實又唔算完全唔緊張。至少相比BB未出世之前，我對呢方面既態度係有些少改變。

話自己相對冇咁緊張，主要係因為我冇好似我一d朋友咁，咁desperate希望囝囝囡囡入到果十隻手指數得晒既傳統名校。心裡面既諗法，都係「咁好彩入到就當中獎，入唔到又唔覺得有乜唔妥」咁啦。我份人好懶，要我好似我有d朋友咁，為左想個仔入到心儀既名校，做無數咁多準備工夫，我寧願唔入算數。或者係偏見都唔定，我總覺得入名校最大既好處，並唔係佢能教到你個仔變得特別叻，而係日後囝囝大個之後既social network。有朋友話，囝囝入到名校既話，自信心會大一d。講真，見人見至啦我覺得。響名校裡面包尾，所建立既自信心我估應該強唔過響間冇咁有名既學校裡面考第一掛。個仔入左名校，自信心會大d果個，可能只係個家長。

我心裡面冇一個心儀名校list，不過我卻有一個「唔想個仔入」既學校名單響心裡面。其實呢個「唔想佢入」既名單，even響BB未出世之前我一直都有。冇，我覺得我唔需要個仔特別叻，但同時我亦怕個仔會去到一d唔好既學校，交到壞朋友又或者沾染到一d壞習慣。都係果句，可能只係偏見，但我對於朋輩對一個小朋友既影響，我卻深信不疑。以前唔緊張，係因為我覺得，要避開呢d「唔想個仔入」既學校，唔係好難，冇道理好似我果班好肉緊既朋友們咁瘋狂。後來老婆大肚，開始慢慢study多左有關香港學制同埋社會現實既時候，先開始意會到，完來我一直以為自己所謂「要求唔高」既目標，都唔係咁輕鬆就可以做得到。effort，原來多多少少還是要付出一點點。

得承認既係，當身邊一大班朋友，都努力為自己仔女既升學努力張羅既時候，自己仲係一碌木咁企響度懶懶閒，多少覺得自己唔係好妥。老土地講，我對囝囝其實冇乜期望，只希望佢能健健康康快快樂樂咁做人。不過快樂，有時還是需要一點事業同成就配合。今日如果我冇出過力去為佢既升學張羅，令佢入唔到好既學校，他日佢長大成人，事業上遇到種種不如意不公平既時候，佢會唔會返轉頭怨我呢個老豆，當年冇好好努力咁幫佢？

想走既唔走，唔想走既走

2011-04-08T22:10:00.011+08:00

皮膚敏感痕癢難頂。食西藥情況即時受控，不過藥力強勁，食左基本上眼訓到連工都開唔到，而且藥一停就發番晒出黎。長始落去唔係辦法，於是唯有轉去搵中醫求救。中醫把完脈，話呢個係壓力病。開幾服藥俾你止痕排毒唔係問題，不過講到尾都係要你學識放鬆心情。醫師話，你再係咁精神緊張，你走黎睇多一百幾十次症都係治唔到本。

屋企人同朋友都話我工作壓力好大，但我自己其實已經感覺唔到。壓力已經成為一種習慣，每朝起身自動跟身，天天如是。感覺已經麻目冇痛苦。正當你以為你handle壓力handle得好好既時候，身體既警號就反而響起。痕到跳舞既皮膚提醒你，你處理壓力既詣藝，根本原全唔掂。

四月係新既fiscal year。早前為上年埋數既時候，有股東投訴我控制成本控制得唔夠好。對於佢地既投訴，我心裡明白。日常營運既經費，其實已經相當節儉。多餘既消費亦欠奉。公司營運既模式亦執過好幾次，將營運既效率改善。最讓股東不滿既，係還未夠精簡既人手，同埋過高既人工開支。

做生意咁耐，我從冇試過大規模地裁員。但係利用自然流失既方法，結果永遠係，你想佢走果d永遠係賴死唔走，你唔想佢走果d就偏偏走晒。道理好簡單，你想佢走果d，十成十都係唔多做得野，能力屬有限公司級數既同事。撇除果班冇料但又以為自己好掂既傻人，呢班同事心知肚明，以自己既能力，出面搵唔到咩好世界。所以既然響度可能混到兩餐，梗係留返響度hea啦。有人稱呢個「做法」叫做loyalty，sorry，有得走你唔走先應該叫loyalty，出到去冇得撈而焗住留返低，呢d極其量都只可以話佢「識諗」，同loyal一d關係都冇。

唔想佢走果d同事，通常都做得野。有料，自然不斷想搵更好既發展，更佳既待遇。佢地走，無可厚非。我公司細，唔係有咁多位可以俾人上，無謂阻住人發達，但求走既時候好黎好去就算。除非我有更好既野可以俾佢啦，打份工，冇得要求loyalty既，畢竟大家都要搵食嘛。

同樣既模式，幾年下來，積下積下，冗員就越黎越多。掂既走唔掂既反而會留，日子耐左，就要諗下辦法大掃除。

以前我成日諗，唔掂既，經過訓練同累積經驗之後，都一樣可以變成掂。人老左，開始向現實低頭。掂既人，通常由Day 1開始就展現出掂既基因。唔掂既，基因點樣改造結果都係冇變。當中或者會有基因突變既出現，讓人喜出望外，不過情況萬中無一，撞到，應該要去買六合彩。

基於呢個「人好難有基因突變」既原則，近年新請既同事當中，過唔到probation既比例相比從前大幅增加。無他，覺得唔掂，家陣早早就斬纜啦。畢竟對於一個對佢能力有懷疑既新同事，如果俾佢順利通過試用期，日子耐左，佢變成一個冗員既機會，遠比變成一個優秀員工黎得大，商業機構唔係學校，唔搏啦。

要搞到去大掃除，心軟同唔認輸，係禍根。

祝大家有個預快既週末。

火星十一人

2011-04-08T00:31:00.003+08:00

好耐冇返過黎，湊仔，原來真係可以好忙。

早兩日趁阿仔訓左，同老婆走左去睇夜場《單身男女》。我估呢套戲既觀眾，應該多數係拍住拖既朋友仔。偏偏坐響我同老婆前面既，係三個二十幾歲既後生男仔。三個男仔約埋睇呢套愛情片，hmmm，都幾難有咩feel。

影片播既途中，幾個男仔有好多好多既comment，好嘈。講足個幾鐘頭，講黎講去都係果幾句：

1)條女又唔係好靚，有乜X理由有兩件咁正既男人爭住溝呀？( 個人意見，查實高圓圓OK靚喎我覺得，咪玩啦，如果你女友係咁既樣，我諗你前世應該做左唔少好事啦。阿高小姐雖然唔算係靚得好驚豔果隻，不過個人認為，最靚爆鏡果批女仔往往冇乜人追，跌低一格果批「都幾靚喎」既女孩子，反而先最搶手。)

2)呢個世界邊有男人咁X好條件架？又靚仔又有錢又有事業仲要情深？挑，呢d咪叫堆砌囉。(電影嘛，唔堆砌就唔好睇啦。要有Fantasy，先吸引到你入場嘛。要寫實既，唔駛睇戲啦，睇下自己就夠啦下話。之不過，對於呢個世界冇咁好條件既男人，某程度上我係認同既。首先要靚仔，經已夠困難。即使你有，兼且要咁事業有成，通常個人冇乜時間。emm，情深呢樣野要講心思講mood，有番咁上下事業既人，通常忙到甩碌，要有mood同心思，幾難囉。有錢反而唔難搵喎，不過有錢又有好多時間既男人通常又冇乜事業，財富多數來自上一代。或者係我偏見掛，戲裡面果堆好男人既條件，要集齊於一身，我覺得機會其實係零。)

3)個個男人都滾？亂講啦，滾唔洗錢牙？冇錢點滾呀！低X能。(本來我覺得，雖然佢地好嘈，不過起碼相信唔男人唔係天生就一定要滾，都似返d人講既說話丫。點知聽埋佢地講個原因，就真係…唉。)

男人睇完呢套戲，通常會係點樣既反應呢？從我響我Facebook裡面所得到既「資訊」，總括黎講分兩批。一批，正係好似坐我前面果幾個後生仔咁，媽聲四起。認為呢d咁既橋段會教壞佢地既老婆同女友。而另一批呢，就爭住確認自己既國籍並唔係中國香港，而係祖藉火星。朋友響Facebook最新既status係咁既：「我係第十一個男人，來自火星。」睇到我隔夜飯都幾乎噴返出黎。

講真，火星人其實唔難做，as long as你對你身邊既人有承諾，有責任。唔滾，同埋唔打算去滾，老實講並唔係d乜野咁神聖既事。不過當你放低男人自私同獸性既一面，只因為你單戀緊一個連名都唔知既女孩子，我就覺得有d匪夷所思。做火星人，我諗主要係因為，你清楚如果有一日你唔覺意返左地球一轉，會對你既另一半做成傷害。唔想另一半受傷，咁就選擇乖乖地留響火星囉。

學行

2011-01-03T17:11:00.002+08:00

好耐冇見，祝大家新年快樂。

最近囝囝開始學行，每日都響屋企裡面跌跌撞撞，感覺好似個醉酒佬行路一樣，好搞笑。

我怕佢會跌親，所以響佢嘗試行既時候，我都企響佢唔夠一尺範圍之內，當佢步履一不穩既時候，就準備扶住佢。學行既過程進展緩慢，直至老婆有一日同我講：「老公，不如由得佢跌下啦。要跌過落地先會學識點樣保護自己嘛。」

我於是放開手由得佢跌，跌親頭幾次，囝囝都會放聲大喊，後來跌下跌下，佢似乎開始掌握得到，點樣跌落地先至唔會咁痛。去到今日，囝囝行路既步履依然係不穩，行幾步就會跌一步，不過跌落地既技考，似乎就越黎越高。當佢開始先平衡既時候，就懂得自己調節去落地。我諗，過多幾個星期，佢應該識得響屋企週圍走。

囝囝學行，唔知點解令我聯想起早排因為大風雪而滯留英國既香港學生。

*****

鑽戒

朋友賣鑽石為生，當日小弟求婚既時候，就係搵呢個朋友幫手，唔該你打個折頭俾我丫。

幾年裡面，介紹過好幾個準備結婚既朋友幫襯佢。果日同呢個「鑽石商人」食飯，傾開呢班我介紹過俾佢識既客仔，發現當中接近一半婚姻已經出現左問題。有兩pair仲準備離婚。

我成日都好感慨，點解大家會搞成咁。買鑽石求婚，除左滿足虛榮心之外，主要取其「鑽石永恆」既喻意。婚結左之後，到底有幾多人真係在乎永唔永恆？

唯一比較接近「永恆」既，可能只係粒石既保值能力。一問之下，發覺相比幾年前，d石既價格真係貴左好多。我同老婆講，好彩我地早幾年結婚咋。如果今年我先黎同你結既話，你粒石，起碼要細一半呀。

*****

心魔

當朋友遇上感情、事業、家庭既問題而搵我傾訴既時候，人到中年既我，會選擇齋聽，with no comment。

其實唔係真係no comment，只係越黎越明白到，一個人受到極度困擾既時候，係會因為朋友既意見而改變。旁觀者清呢句說話其實冇錯，因為旁觀者並冇當局者既心魔，所以能夠冷靜地提供解決辦法。呢d解決辦法其實當局者真係唔知咩？梗係唔係！問題只不過係過唔到自己心魔。

年輕既時候，以為自己真係醒過人好多，會不斷重複教果d向自己傾訴既朋友應該點做點做。自己以為好醒，其實你教人地既嘢，人地老早就諗過。幫唔到人既同時，你既喋喋不休還讓友誼慢慢溜走。

突破心魔，靠既往往係當事人個人既意志，而唔係旁人既說話。作為朋友，有時總希望自己能講出一句驚世既說話，讓執迷既朋友頓悟過來。或者我講說話比較蠢，經驗之談係，事與願違係通常最有可能既結果。

「作為朋友，我可以做既，就只有借出我既耳朵。現實裡面你既問題要點樣解決，其實你自己比我清楚。纏繞住你既心魔，亦只有你自己先可以突破。good luck。」

與隔鄰比較

2010-08-27T23:28:00.012+08:00

週末放工，我同上任不足一個月既新GM Kathy落左酒吧飲野。

「點呀，做左差唔多一個月啦喎，慣唔慣？」我問。

「都ok呀，仲習慣緊。」Kathy：「唯獨係公司裡面，同事之間果d是是非非，比我想像中嚴重。」

「interview果陣我提左你架啦喎…」我飲住一支唔凍既啤酒：「點呀，後悔上錯賊船牙？」

「又唔係。」Kathy搖左搖頭：「只係好難理解，大家點解會有咁多怨氣。其實我地呢度平均人工又唔差過出面，得罪講句，每個同事既工作量其實比出面一般既公司仲低。當我初初黎果陣，見到個個都可以準時鬆人，我不知幾咁驚訝。諷刺既係，同事偏偏埋怨工作量太多，埋怨公司唔體量佢地。」

「可能係大家都太過得閒掛…」我講笑：「同埋我一直以黎領導無方囉。」

「我估係後生女太多…」Kathy：「見得世面唔夠多，未見過出面有幾難捱多d喎。」

我諗左一諗：「hmmm，我以前都好似你咁諗。後來我嘗試請一d年紀大些少，人生經驗比較多既同事返黎。不過情況都係一樣。所以覺得，問題並唔響呢一度。」

「我地公司唔大，但係就有好多唔同既部門。當然，每個部門既工作性質並唔一樣，工作量自然都唔一樣啦。同事們如果只係同自己比較，我諗冇人會覺得自己工作量太大既，反正好似你所講，個個都準時收工，可以有幾忙？問題係，佢地會同身邊既人比較，一間公司裡面，總會有d人得閒d，有d部門少野做d。比較之下，就覺得自己唔抵囉。於是就有怨氣囉。」

Kathy笑左笑，並冇回話。

「覺得我講得唔岩？」我問。

「我唔敢肯定…」Kathy認真地分析：「不過我諗，公司既規模其實影響幾大。CK你諗下，你同我都做過大機構，大機構裡面，一個部門既人唔會因為另一個部門既人少野做過自己就眼紅丫嘛。大家都清楚，工作性質本來就有分別，冇可能直接比較。如果真係覺得隔黎個部點容易做d回報又好d，咁咪諗辦法睇下有冇得internal transfer囉，唔會咁唔成熟響工作上發悔氣丫。不過響呢度，規模比較細既時候大家因為要響工作上互相cover，所以好多工作都似乎有一定程度上既重疊，而且大家坐埋響隔離左近，各種因素加埋，令佢地有錯覺覺得，佢地即使係屬於唔同既部門，但係公作性質埋工作量都應該係睇齊。佢地對自己既角色，以至整個團體既架構都有一個錯誤既assumption，繼而產生左一個錯誤既expectation，引發出不必要既怨氣。」

「係呀，呢個殘局要等你幫手收拾啦。」我說：「依家人數多左，情況其實已經改善左啦。以前人再少d，怨氣同麻煩仲多呀。」

「估得到丫。查實我覺得…」Kathy嘆左口氣：「面對咁既情況，以前Kelly都應該捱得幾辛苦。」

「哈哈，係呀。Kelly佢好tough架。」我點頭。

*****

今個星期響菲律賓發生既事，要過一個愉快既週末，大概比較有難度。星期五既晚上，祝大家有個平安既週末假期。

羊和狼

2010-08-18T00:21:00.005+08:00

有朋友問我，大半年冇見我寫野，我公司近況如何，班女同事仲係咪好似以前咁，一樣咁鍾意搞風搞雨？

呢半年，公司既人數比之前多左一d，我依然係時不時會收到一d有關同事們是是非非既小報告。不過因為人多左，每個人響公司既「破壞力」相對分薄左，所以打小報告既情況雖然依然存在，但行動上我覺得其實係比從前收斂左。我以前成日響度諗，我可以點樣令到公司穩定一d，人事關係上變得和諧一d。或者係我功力不足，不管我幾咁用力去維繫同事們之間既合作關係，麻煩總係無處不在。今日搞定呢邊既矛盾，聽日又到另一邊既伙計同你發難。反而當公司既「人口」漸漸增加既時候，呢d「搞屎棍」既事件反而自然地有所抑制。我覺得，人多左，反而容易管左。

覺得容易管左，係因為每個同事發難時對公司所帶黎既創傷相對輕左，所以令到我並唔再好似以前咁會買佢地怕。或者講得白一d，實情可能係我個人變左，變得唔似以前咁樣會關心每一個同事既感受，希望做到面面俱圓，所有人都可以照顧得到。面對同事，我自覺比從前狠心好多。

幾年前開始寫專欄既時候，我將自己既簡介定為「一隻披著狼皮既羊」。我覺得呢個係當日對我自己最佳既寫照。商業社會裡面，為左保護自己，我千方百計去裝出一副惡形惡相，去掩飾自己其實軟弱既內在。事隔幾年，到底我仍然係一隻羊，還是響不知不覺間進化成為一隻狠心既狼，我自己其實心裡有數。

「進化」，總係發生響不知不覺間。

兼職

2010-08-13T12:53:00.005+08:00

奶粉同尿片實在係好貴，兼且BB越黎越大食，所以決定搵返份兼職幫補一下。係，同之前果份一樣，下個禮拜開工。

*****

想講下我屋企個外傭。

好耐之前寫過一篇有關外傭既文章，好多朋友話我睇得管外傭呢樣野太簡單啦。到你請左用落你就知道有幾難。我屋企既外傭黎左大半年，hmm，工作表現不過不失啦。at least我食飯食唔到大頭針撈飯又或者經血炒菜，我諗都算係ok架啦。

我屋企個外傭係第一次出外工，由於佢之前並唔係住響大城市，原則上係一個村姑黎既，所以性格上比較純品。當然純品既代價係，初黎報到果陣乜都唔識做，要勞煩外母大人悉心調教先至「學有所成」。朋友同我講，你個外傭咁純品，keep住呀，千祈唔好俾佢放星期日，一放星期日，落到中環見到大班同鄉，好快就會學壞，練精學懶架啦。

朋友好言相勸，我就有d保留。

外傭係個成年人，我只係佢既僱主，我冇能力阻止佢「學壞」既。唔好講話佢只係我既伙計丫，即使係我自己個仔，到佢大左既時候，我諗我都未必有能力百份百去阻止佢去接收到一d唔好既資訊。唯一可以做既係，對佢地好一d，同佢地建立一d信任既關係。當有一日佢地真係學識點樣練精學懶既時候，基於同你既信任關係，而主動選擇唔去做得咁衰囉。我朋友笑我硬係將我返工果套搬返黎屋企係唔會行得通，但實情係，管理既style，習慣左係咁就咁，要特登改，其實都幾困難。

*****

由於老婆同我都有工作，外傭其中一項主要既工作，就係響我地返工既時候照顧我地個肥仔BB。

外傭自己有兩個女，都係三、四歲左右。冇錢開飯所於把心一橫，申請出外做女傭賺錢養家，因緣際會黎到CK既屋企打工。我響度諗，佢自己既仔女都仲細，佢反而要放低佢地，隻身走到黎香港打工，去照顧人地個仔，心裡其實好難受。香港人對細路仔既照顧無微不致，個個都係金菠蘿。當呢d外傭響照顧你個仔果陣，連幫個BB抹汗抹得唔夠快都分分鐘俾老細鬧既時候，諗到自己響老家既仔仔女女可能連食都食唔飽，心情唔知道會係點。

前日外傭收到信，係佢老公寄左一張佢個女既近照俾佢。原來佢個女，剛剛幼稚園畢業。我見到外傭成晚不斷拎張相出黎睇，我響道諗，我平時自己公司出trip，最多都係三、五日左右，都已經覺得掛住老婆仔女，急不及待想返黎香港。外傭既contract一簽就兩年，其實都幾難捱。

畢竟每個人背後都總有一些故事。

講英文

2010-07-21T15:24:00.006+08:00

有好一段日子冇參與公司裡面既招聘工作。最近公司開展國內業務，要響國內請返幾個可以幫手管理既員工，令我有機會者再次參與這項久違左既工作。

Head Hunter refer左一堆人俾我見，由於算係管理職位，黎面試既人quality一般都唔太差。我同head hunter講話，我既普通話好唔掂，所以我要求呢一班國內既同事，最低限度要懂得用英文同我溝通，如果識得講廣東話，咁就當然更好。

唔知係咪我呢個私底下既request，head hunter早已經向所有黎面試既candidates通晒水，黎面試既人，都會好落力咁sell自己英文有幾流利。well，我其實並唔需要一個講英文講到好似成個鬼佬咁既staff，反正我自己既英文都唔見得特別好，總之溝通得到就夠啦。

既然大家講到自己英文咁流利，咁面試既時候無可避免既就係，麻煩你用英文同我吹下水啦。

結果係，大部份既candidate所講既英文，我連一成都聽唔明。

你一定響道諗，到底係班candidate英文差成咁，還是係CK既聽力有問題？

查實兩樣都唔係。班candidate其實英文應該係ok既，要講得人明，溝通得到，照計應該應付得到既。平平實實咁慢慢講，照計就可以過到骨，偏偏響面試既過程裡面，唔知係想impress我還是甚麼，說話既過程裡面硬係要加入一堆「扮鬼佬」式既口音，然之後仲要刻意將說話速度加到有咁快得咁快，講到「Lur」埋一舊咁，藉以顯示出自己外語既流利程度。結果係點，唔駛我講啦。

我既朋友之中有一位旅港多年既美藉英文教師。我同佢講起最近面試時遇到既情形，佢話類似既情況，響香港同內地其實好嚴重。佢既學生當中好多亦有同樣問題。佢話，中國人學語言既最大障礙，係太過愛面子。假如你大大方方承認，英文係你既second language，甚至第三、第四語言，你即使唔係字正腔圓，又有口音，又或者慢慢講，根本就唔會有人介意。情況就等於，一個鬼佬對住你講中文一樣，佢識得講同夠膽講就已經夠勁啦，邊個仲會介意佢地既中文發音其實係唔咸唔淡？香港人既英文程度，一般都有個底，至低限度都「識得些少」。不過識得些少既同時，香港人又知道自己其實講得唔係咁流利，但係礙於面子又未必夠膽承認。於是乎，言談之間就會不自覺地嘗試掩飾自己既不足，例如不自覺地加入一d「扮鬼佬」既口音同語氣，又或者刻意將說話速度加快，又甚至響說話內用加入一d「懶輕鬆幽默」既句子，但其實根本冇人會識得笑之類。本來說話只係用黎溝通，講得明白就得架啦，加入左咁多無無謂謂既東西響簡簡單單既說話裡面，最後連最基本既目的都達唔到。

我諗，講英文其實只係冰山一角。當人太過緊張面子既時候，往往就好似講外語咁，不自覺地加鹽加醋去掩飾自己既不足，到頭黎不但弄巧反拙，假，仲丟得更多。

好多野，在意既都只係自己，其他人跟本原全唔會介意。

做左人老豆阿媽之後

2010-07-09T23:53:00.003+08:00

兩件小事。

我公司部LAPTOP內置左一個Cam仔。以前一直都冇用過。直到最近幾個月，用量突然大增。我成日都話，做人總係好似俾人整蠱咁，以前單身寡仔既時候，工作永遠就留響香港，想走都走唔甩。好啦，到成家立室生埋細路既時候，又偏偏飛到你嘔。

好在有互聯網。透過internet同web cam，我「總算」仲叫做可以日日見到個仔。不過，幾個月大既人仔，透過阿媽個Mon望見裡面果個不停郁身郁勢既傻佬，查實知唔知係自己老豆？

咁樣形式既「親子」，查實都係自欺欺人居多。

*****

世上既煩惱，好多時都係源於選擇。

我同老婆做左人地阿爸阿媽之後，其中一個需要選擇既，係老婆出唔出返去做野，還是疊埋心水做全職媽咪。

平心而論，呢個其實係一個happy problem。我同朋友提起呢個問題既時候，朋友串我話：「你好彩搵到下錢，老婆就話可以揀做或者唔做，大把人冇你咁好彩，兩公婆生完仔都要齊齊出黎捱先夠養家啦。你有乜好煩？」

朋友當然講得冇錯，不過呢個就係人性嘛。

我唔知算唔算係女人天生既母性，老婆話，出去做野意味住湊仔既責任要交俾家傭代勞。即使家傭其實都尚算可靠，但總覺得好似有d對個仔唔住。

當然，除此之外，仲會miss左好多見證阿仔人生既第一次。

老婆喜歡工作，這個我心裡面其實好明白。只不過針冇兩頭利，始終都要二擇其一。

我諗起，認識好多上一輩既阿爸阿媽，會怨佢地自己既仔女，令佢地人生失去左好多樂趣。佢地既埋怨同脾氣，經過多年不知不覺咁發洩左響自己既子女身上，甚至響子女既心理上做成一d陰影，即使子女長大成人依然揮之不去。

我俾老婆既建議係，如果想子女健康成長，首先要make sure佢地會有一對happy parents。假如出返去做野會令呢一個新手媽咪開心，能夠讓仔仔有一個happy mom，咁樣我諗遠比你夾硬「委屈」自己留響屋企做全職媽咪，但係變成一個唔開心既媽媽會黎得更好。親子既時間或者會少一d，不過計番條數，對阿仔我估應該會更好。

有人或者會覺得做人父母咁樣諗未免太過自私，不過我相信一樣野，就係自己都唔happy，跟本你就唔會有能力帶到快樂俾身邊既人。要人開心，首先要make sure自己唔好有委屈既感覺先得。

失意與奇蹟

2010-04-23T17:14:00.016+08:00

每次睇完留言，總係有點說話想講。

我比較幸運，響事業上浮浮沉沉，鬱鬱不得志既日子並唔算太長，hmmm，大概五、六年左右啦。果段日子距離今天已經越黎越遠，不過當時既感受還是記得蠻清楚。

好多成功左既人會同你講：「機會係自己爭取」，又或者甚麼「機會係留俾有準備既人」之類既說話。我當然唔能夠話呢d所謂「名言」係廢話，不過當你失意徬徨既時候，你所面對既現實往往係，我幾咁努力爭取都好，但就硬係爭取唔到我想要既機會；又或者係，大佬，我明明準備好晒啦，但係d機會就硬係唔留俾我，反而留晒俾班冇準備過既二世祖呀！

所謂際遇同命運，大概都係佢玩你既時間居多，你掌握到佢既時間其實甚少。

以前寫過，我老豆係個賭徒，成世人既際遇都大起大落。我事業上最浮浮沉沉果幾年，正值佢又生意失敗面臨破產，不過當時佢同我講左d野，雖然我估佢其實係隨口up居多，不過後來我又覺得幾受用：「阿仔，你知命運鍾意點樣玩你呀？拿，佢永遠唔會一鋪玩死你架，不過佢會不斷不斷咁打擊你，慢慢咁陰下陰下陰乾你，等你對自己冇晒信心，對呢個世界冇晒希望，等你慢慢相信，你呢一世都唔會有機會翻到身，到時候呢，佢就真係贏左你啦。」

「仔，等我話你知啦，你要贏到命運，一字咁淺，死唔認輸就得架啦。奇蹟總係會響最後關頭出現既。」

同我講呢番話果陣，老豆係個面臨破產，天天俾人上門追債，幾乎仲要禍及妻兒既過街老鼠，呢番說話響當時對我黎講自然係好冇說服力，我覺得佢跌落地想執返渣沙多d囉。不過後來佢又再一次奇蹟地翻身，令到我心裡面又有d唔同既體會。

命運同際遇要贏你既方法，往往唔係要一鋪清你袋，一鑊過收你皮，而係透過恆久不斷既打擊，慢慢磨滅你既心志，令你唔再相信你會有希望，誤以為週圍既環境唔會再容得下你，令你相信你一定鬥佢唔贏。

命運贏你既方法，係折磨到你捱唔住自己選擇扯白旗投降，而唔係一刀統死你。

徬徨失意浮浮沉沉有幾難受，我明既。隨住年紀慢慢大，我開始理解到，呢個世界真正既遊戲規則，其實並唔係去鬥大家到底有幾「叻」，而係鬥大家到底有幾「韌」。鬥韌力既遊戲係一個好難玩既項目，原因係，永遠唔會有人話到俾你聽，你韌力既水平要去到幾多先能夠打贏際遇同命運，而且「打爆機」既「分數」要幾多，每個人都唔同。

唯一可以講既，呢個遊戲既特色係，只要你一日唔主動投降，你依然係未輸。

或者我講得太多。

常懷希望，祝大家有個愉快既週末。

叫價

2010-04-22T15:10:00.010+08:00

經濟好轉，失業率跌到4.4%，打工仔又開始搵工跳糟啦。

我以前覺得，市道好既時候請人特別難，原因係打工仔既叫價能力強，做老闆既要用更多既錢去搶一些「心儀」既伙計返黎，成本好高。不過日子耐左，又經歷過經濟既起起落落，發覺，原來又唔係咁喎。

假如，請人既原則係唔理乜野崗位都好，總之要請個質素最好既人返黎，咁我剛才所講既情形係絕對成立既。問題係，唔同既崗位，對同事質素既要求其實都有分別。以我自己既公司為例，部份既崗位，我認為係比較有前途，責任亦比較重果d，所需要既人既質素普遍要求較高，at least要佢肯思考，有責任心，同埋響事業上要有些少野心咁啦。另一些崗位則剛剛相反，可能來來去去只係抄抄寫寫執頭執尾，所負責既野亦相對無關痛癢既呢，雖未至於我要特登請個冇乜責任心既同事返黎，但係礙於工作性質沉悶兼冇乜前途，請個有料既人去做反而會覺得浪費，咁我就會傾向搵d質素比較低既伙計，無乜野心，能力亦較差既人去做，但求佢應付得到就算。

市度唔好既時候，市場上質素好果批人，因為普遍價錢平左，所以老早就俾人搶晒，手快有手慢冇。響果d時候去搵質素高既伙計，其實並唔係咁容易。市道唔好，市面上最多既，反而係質素較低既candidates，公司cut佢出黎既有，失業多時既有，無心戀戰賺錢買花戴既又有，總之supply太多，佢地可以好平。老闆要執呢一類「平貨」去fill一d唔需要咁高quali既崗位，果陣係最好既時機。當然呢堆supply裡面，時不時又會搵到d好野，不過呢樣就講運氣啦。

好啦，到市道好既時候又點呢？質素好既candidates，市場上數量永遠都係少既，但係質素好既人通常有一個共通點，就係「知價」。佢地既價值來源自自己，知道自己值幾多錢，當然響市道好既時候佢地亦會為自己提價，但係幅度通常合理。市道好，公司賺錢多左，俾貴些少買一d質素高既同事返黎，其實冇乜問題，所以供求其實幾平衡。只不過，不管市道好抑或市道唔好，有d比較冇前途又重要性偏低既崗位依然係要人去做既，但係原先做開呢類崗位，「質量」比較差既candiates，往往會響呢d時候加價加到遠離現實。你可能會話，嘩，衣家好市都唔加等幾時呀？

個問題係，當唔知價既人，「集體地」叫價叫到比果班「比佢地自己質素仲高幾皮」既candidates還要高既時候，作為僱主會點選擇？

比較obvious既選擇係，梗係請個質素高d既人返黎好過啦。不過請個質素高既人返黎做個唔多等駛既崗位，一來係錯配，二來佢地未必肯做，三來，即使佢肯做，但作為老闆，將個有料既人，擺響個冇前途冇發揮既位置上，其實個心幾唔安落。

咁餘下落黎既選擇係，用「超唔抵」既價錢，請返果個質素較低既candidates返黎啦。反正個post幾冇前途幾多餘都好，似終都係要人做丫嘛。不過一諗起，請個「勁你十倍」既人，叫價居然仲可能平過你，條氣真係唔順到呢…

最近我請人既時候，我所面對既人力市場，就係咁既面貌。

我希望上述情況只係短暫，又甚至只係我既錯覺。

窗外面落住大雨，我望住檯上面既一堆resume，發現好多有料既人，比一大班冇料到兼一年可以閒閒地轉幾份工既黃毛小子，叫價居然仲要低既時候，不禁抽左一口涼氣。

家陣，真係乜野世界呀。

升呢

2010-03-31T16:18:00.008+08:00

早陣子仔仔出左世，CK升左呢做老豆，Thank God，母子平安。

朋友問我做左老豆既感覺係點，老實講，除左唔係好夠訓，有陽光既時段總係有d精神萎靡之外，基本上同平日分別唔大。朋友話，乜你生左個仔唔開心咩？開心，梗係開心啦。不過我既亢奮程度響唔少朋友眼中似乎並唔「合格」。事實上我認識好多朋友，添丁既亢奮程度其高，父母對初生BB既「關注」份量亦超乎想象，對初生子女既愛護程度達到「爆炸性」既級別。相比之下，我呢個新手老豆卻彷似有點兒冷漠。

對於呢個情況我冇把握解釋，不過我傾向相信，人對人既感情，細水長流既形式似乎會比較「耐用」。同老婆既相處如是，同朋友既亦如是，同仔女，我「斷估」都應該係一樣掛。隨住同仔仔越黎越多既相處，我幾相信，感情應該會培養得越黎越多。

老婆同我既情況相若，不過佢好懷疑自己，係咪對BB既愛心唔夠呢？人人都話做媽媽既點樣愛自己既仔仔，果種愛心有幾咁「爆炸性」，反而佢覺得自己既情況就傾向慢熱，令佢懷疑自己係咪好唔正常？世界上有太多「阿邊個邊個話」，同埋「阿三姑六婆係咁樣講」，總之多人咁講就好似一定係硬道理，就連跟自己仔女既「感覺」都有一個應有既standard，多左d啦掛？

我其實最怕佢會不自覺諗多左。「產後抑鬱」四隻字經常響我腦裡面閃過。畢竟有唔少人中曾經過招，做老公既，還是小心一d，睇緊d去盡量避免發生會比較好。

CK做左老豆之後，有d長輩既朋友就同我講：「拿，CK仔，家陣你做左人地老豆，你就知道我地以前做人阿爸阿媽幾咁辛苦啦。我地以前，邊有你地家陣咁輕鬆咁幸福…(下刪一萬字)」

三幾十年後，到我既仔仔或者都做左人老豆既時候，我唔知會唔會都同佢講番一堆類似既說話。人好得意既，總係習慣覺得一代不如一代，自己果代人係付出既一代，而對落果一代就永遠係坐享其成。某晚BB訓左覺，我呢個嚕嚕梳梳既老豆又響BB既耳邊吟吟沉沉：「BB，記住你黎到呢個世界上面，係因為爸爸媽媽『邀請』你黎同我地一齊既。你冇欠我既。假使將來有一日，你老豆我真係short左發起牢騷上黎，埋怨當日你細個果陣大家幾咁辛苦養大你，記住唔好擺響心，當我發up瘋就得啦。」

如果做人子女既，永遠都要背負住「欠左老豆老母」既包袱，幾咁無謂。我一直相信，孝順係要因為彼此既感情先有價值，而唔係為左「還債」。

對住自己個仔，我都係咁話。

二零零九

2009-12-29T17:08:00.008+08:00

黎緊兩日打算放假，呢度再有update既時候，應該已經係2010年啦。響度先預祝各位2010年事事順利，新年快樂。

*****

今年聖誕假期同往時最唔同既地方係，今年同朋友既X'mas gathering，多左好多BB仔同小朋友。唔知係我錯覺抑或敏感，我總覺得呢幾年多左好多人生仔。市面上既廣告，亦多左好多同BB仔相關既linkage。

以前既朋友聚會，通常都係玩到三更半夜，而且往往飲到爛醉。有小朋友既friends gathering自然好唔同，以往既late night drink全部改為early dinner, 酒精飲品當然亦欠奉。各位朋友同檯食飯，其實傾計都有些少困難，事關講唔夠兩句，坐隔離既BB覺肚餓即時喊到收唔到聲，將本來講緊野既爸爸媽媽所有attention都搶去。當BB爸爸媽媽安排好BB既膳食之後，準備catch up返之前講緊既topic，oops，同檯另一個BB忽然又放聲大哭，噢，有d臭味喎，應該賴左：「阿waiter哥哥，請問廁所響邊？我要換屎片…」

「好快到你啦喎。」朋友拍拍我膊頭：「頂得住冇？」

ok既，我估。

*****

我有好幾班朋友，其中一班我認為係比較close，又或者比較primary。

每逢大時大節，大家都會出黎聚一聚，多年來已經成為左習慣。

只不過，好多時聚會既過程當中，好多時都有d相對無言。我曾經覺得，同朋友相處既時間係quality time，大家出黎聚會見面，你眼望我眼，又冇乜話題冇乜交流，咁既gathering，冇乜value兼浪費時間。反而同其他冇咁熟既朋友見面，仲多話題傾，氣氛仲好似熱鬧d開心d。

最近我又有d唔同既體會。

今年，朋友間多左BB仔，多左小朋友，可以預期，今年既聚會，應該比往時仲要沉悶。

不過去到節日既時候，呢一班朋友依然係大家搵出黎見面，一齊過節日既首選buddies。

一班朋友由細識到大，其實每個人都好清楚，大家其實都唔只得「呢一班」朋友咁少。我諗佢地同我一樣，都會覺得，其實同其他既朋友出黎，可能會更加熱鬧更加有趣好玩。但係點解明知同呢一班人出黎hang out，會比較沉悶架啦，響大家都有得揀既情況之下，我地依然會揀每年都同同一班人出黎過節？你或者覺得係一個習慣，不過我反而諗，係咪朋友之間既關係有些少昇華左？大時大節，大家最希望見面既依然係呢一班人，盡管明知聚會既趣味可能不及其他gathering。

我將呢種感覺同關係，relate到「屋企人」。

同阿爸阿媽食飯，對好多人黎講應該唔會係最有趣最好玩既節目，但係大時大節，正日夜晚果餐飯，其實還是想同兩老好好食一餐。

朋友之中有部份既世伯伯母已經唔響度。幸福如我相親依然健在既，響同屋企人食飽晚飯後，想即刻見到面既，仍然係呢班老朋友。

*****

寫呢一個post之前，剛剛將最後一篇《人在中環》既報紙稿send左去報館，正式為我作為「報紙寫稿佬」既生涯劃上句號。

畢竟同一件事，不停咁做左幾年，到停手既一刻，都總係有些少唔捨得既。

2009年，呢一年，都幾好丫。

2010，應該會再好d添。

祝大家有個愉快既新年。

轉移

2009-12-28T15:15:00.009+08:00

隨住年紀既增加，我越黎越感受到，自己響工作上既能力響度不斷轉移。有d能力響度不斷地增加，但與此同時，有部份既能力亦響度不斷地退化。

emmm，例如對整盤生意既分析能力，又或者係人事上既手腕，我自信我應該係響度不斷進步當中。然而另一方面，好似對市場既觸覺，對客人所需求既敏銳度，我卻感到自己響度不斷退化。幾年前可以創到業，多少係因為自己對市場還有多少觸覺，不過我響度諗，假如換轉係依家，要我再創多一次業，憑我自覺已經退化晒既市場觸覺，我大概應該乜到搞唔成。

我諗，人既能力就係咁，響唔同既年紀，就會出現唔同既轉變。我對此既策略係，當我覺得我響某d部份既能力經已開始出現退化既時候，就去請一d仲係at their peak既同事返黎代替自己做果部份既工作。well，到有一日我覺得自己所有既工作能力都響度退化既時候，如果公司能力許可，我諗應該搵返個全職既CEO返黎代替自己，將自己對盤生意既damage減到最少，可能咁先係最化算。

可能呢個算得上係做生意既其中一個好處，就係當自己開始發覺自己能力上有轉移既時候，可以按住情況去搵人代替自己做一d自己能力正在走下坡既項目，而自己又可以轉過去focus返一d自己仲有把握既工作之上。不過我響度諗，如果係打工仔，可能就比較麻煩啦。隨住年紀、經驗、際遇上既改變，一個人響工作能力上既轉移我覺得有時係無可避免。而且轉移既過程可能仲係不知不覺添。能力既轉移未必係自己所願，但打工仔既工作崗位亦唔係隨心所慾地可以話變就變。當能力慢慢轉移，工作崗位不變既情況底下，年紀稍大既打工仔要面對年輕一輩有氣有力既追趕，其實困難都幾大。

有朋友同我講，三十歲前就要鋪好路幫自己轉型啦。前線既工作，唔夠d後生仔黎架啦。

三十歲係咪一個實在既死線，因人而異啦。不過聽完朋友既呢個comment，我突然之間覺得，部份白領既職業生涯，原來同運動員居然差別唔大。

為自己力挽狂瀾

2009-12-23T12:54:00.013+08:00

之前提過啦，金融海嘯期間，公司曾經係一度好貼近死亡既。

情況最壞既時候，的確諗過放棄，甚至有一刻覺得，如果執左公司唔再揹住盤生意，可能響思想上係一種解脫。

反覆思量之後當然冇咁做到。不過我響度諗，當日堅持繼續捱，背後既動力，其實係d乜？

我可以懶偉大咁話：「我有幾十個同事跟我搵食，我唔可以因為我自己想解脫，就要打爛佢地既飯碗…」又或者「我要向我既股東交代，一走了知對俾錢出黎投資既股東好唔公平，即使繼續留響度，我會捱得辛苦，但為咗向佢地負責任，幾辛苦都要留低繼續捱…」

聽到都覺得牽強啦下話？

真正既理由其實清楚不過，堅持背後既動力，其實係因為自己得益。捱得過呢一次海嘯，最後得益既，會係自己。如果唔覺得自己會係其中一個受惠者，我好懷疑，我係咪真係會選擇堅持。

*****

朋友既婚姻出現危機，認真地諗緊離婚。

對上一次聽佢講，佢話即使幾辛苦幾唔開心都好，佢都會為佢個得果幾歲既女，聯同埋so call已經冇乜感情既老婆合演一場一世既戲俾個女睇，等個女有一個完整既家庭。

只係事隔幾個禮拜，最新既版本係，佢地想搞離婚。

呢件發生響朋友身上既事，我一直唔敢向佢地表達太多既意見。我心裡面當然有一d想法，只不過每個人既價值觀都唔同，去到呢個年紀，價值觀早已成形，亦唔容易一時三刻作出改變。或者作為朋友，可以做既，大概只係借出一對耳朵，做一個沉默既聽眾。

*****

對於挽救一個家庭，又或者一段婚姻，我既諗法係，如果要挽救，就要救得徹底。我明白係好困難，但救得唔徹底，同冇挽救過既分別可能唔大，有時甚至會有更多副作用。

最初朋友同我講，話要做一場一世既戲俾孩子睇，等佢可以有一個完整既家庭去成長。我明白朋友用心良苦，但係我唔能夠接受既係，響決定「做呢場戲」既過程裡面，你一直覺得自己係「受緊委屈」，覺得自己係付出同受苦既一位，至於個小朋友先至係唯一既「受惠者」。我唔能夠說服自己，響一個咁既心理狀態之下，呢一場戲，會有機會能夠好好地咁演。事實上，當你響度堅持，響度力挽狂瀾既時候，你覺得即使力挽狂瀾成功，但係最終唔係自己受惠既話，我好難相信你可以堅持到幾耐。

今次，堅持既時間ends up只係幾個禮拜。我心諗：「你唔係諗住堅持一世既咩？幾個星期就打退堂股？」

*****

家人既幸福，等唔等於自己既幸福？

我相信當中有一個等號。

當你響度為家庭同婚姻力挽狂瀾既時候，如果最後成功的話，子女健康成長，老婆亦有返一個完整既家庭，佢地幸福既話，等唔等於你自己都幸福？

你如果覺得當中冇等號，辛辛苦苦咁繼續維持一個家，又或者放低自我咁去挽救一段婚姻，到頭黎幸福既只係你既家人，而自己冇份得益既話，呢個「力挽狂瀾」既project，應該係由開始既一刻就已經宣報左失敗。

當你感覺到自己既偉大又委屈既時候，往往可能係自私時刻既條件反射。

*****

祝大家有個愉快既聖誕節。

瑣碎事

2009-12-18T16:02:00.004+08:00

對於「能屈能伸」既能耐，我越黎越傾向覺得，女人比起男人，其實係更強。

金融海嘯之後，有幾個朋友都失去左高薪厚祿既工作，當中有男有女。女仔可能比較容易搵工掛，認識既人當中，女性既朋友似乎pickup得比男性朋友快一d…儘管，佢地都要放下身段，新搵既工作大部份都冇佢地以前果份咁好pay，title似乎亦冇咁好聽。

至於男性朋友嘛…

自尊心果一關，有時係幾難過既。我都係男人，我明。

*****

女仔比男仔更「能屈能伸」，甚至更加「捱得」。作為僱主，請一個普通文職，我絕對會傾向請女同事。唯一一樣缺點令我會有所卻步既，係女孩子對其他人既「包容」問題。

公司早陣子增聘人手。新同事返工自然上手需時，唔明點做既時候亦都要問。

我明白同事工作好忙（如果唔忙都唔駛增加人手啦…），新同事未上手，transition period多多少少會煩到舊同事。作為舊既同事，總唔可以下下話新同事好唔掂乜都唔識乜都要問丫嘛。

只係佢地自己都唔記得，當日佢地自己都仲係新手果陣，咪一樣係要每事問，一樣係乜都唔識？咁係咪代表左，你自己都一樣好唔掂先？

人呢，有時總係會善忘既。(抑或係選擇性失憶？)

*****

小弟響am730既專欄，寫埋二零零九年就會停啦。(係呀，即係寫埋呢兩個星期就會摺埋…)。

唔知730果邊既同事會唔會睇到呢個blog既文，不過好想多謝一下佢地，響過去幾年俾左一個發up瘋既場地我為所慾為。仲有每次收到我d錯字百出既稿件之後，幫我逐粒字執番正既校對同事(我肯定如果冇佢地幫手，我d文章既別字一定比stephy本書仲多…)。過去幾年既幫忙同包容，小弟感激不盡。

亦祝am730會越做越成功。

*****

最近幾個朋友都相繼做左老豆，探唔同朋友既BB最近成為左CK兩公婆既weekend慣常活動。一來俾個籍口自己同d老朋友見下面，二來又去「實地考察」下，照顧初生BB既情況大概係點，當係為我呢個準老豆做些少心理準備。

越黎越覺得，做人老豆，真係唔容易。

同做生意相比，我諗，生意其實易好多。

祝大家有個愉快既週末。

P.S.我想問，有冇人知道邊度有得賣BB仔既阿仙奴波衫？

噪音

2009-12-11T13:34:00.004+08:00

對於雷曼苦主既故事，到底邊個岩邊個唔岩我已經再冇興趣深究啦。只不過，對於佢地長期響中環搵個大聲公，repeat又repeat咁鬧人賣毒債快d還錢同埋小心老千銀行既「例行公事」，講真，我開始忍受唔到啦。

我既寫字樓已經唔算響低層，但係每日仍然清晰地聽到呢d用錄音機加埋大聲公所播出黎既口號。我明白投資失利，(又或者加埋有點「被騙」？)所受既打擊並唔輕，只不過，抗爭既過程當中，佢地所製造出黎既聲量，老實講，我覺得都對附近寫字樓既租戶同工作既人，查實都幾滋擾。

至於其他位處低層既租戶，日日office hour八粒鐘不停俾人狂轟俾人大叫「還錢」，我諗真係精神分裂都似。

我知咁講到係冇用，不過同各位苦主有過節既，係銀行。你追討既對像亦係佢地，而唔係響佢地樓上又或者附近既寫字樓租戶，唉。大佬，唔關佢地事架，唔該。

CK以前做過債仔，試過被人「職業地」追過數。收數佬既技倆之一，係去滋擾埋個債仔身邊一班唔關係既親戚朋友，等班無辜既親朋戚友驚起上黎，一齊俾壓力個債仔，又甚至不堪壓力索性幫個債仔還鬼左佢算數。個債仔亦因為佢一班無辜既親友受到自己既牽連而「良心發現」，會盡多些少力去settle欠款，等受影響既親友免受無謂既滋擾。

收數佬收錢做野兼且職責所在，有時踩些少界我明白。不過我傾向一人做事一人當既處事原則，事實上，夾硬拖人落水，讓無辜既人受到無謂既滋擾，我覺得查實都幾陰質。

我唔期望苦主們會停止抗爭，我只希望，佢地長期放響中環鬧市既大聲公，聲量可以稍稍調低一d，讓坐響寫字樓裡面既同事，可以安靜一點工作。

祝大家有個愉快既週末。

海嘯回顧

2009-12-02T18:01:00.015+08:00

有朋友問我覺得自己響金融海嘯期間既表現如何。emmm，講真，我唔知應該點樣評估。以公司今日既狀態黎講，我會用「死唔去」黎形容。事實上，我認為公司響過去一年係曾經貼近死亡邊緣既。

海嘯期間我冇嘗試明顯地節流，我既理據係，即使節，都節唔得幾多。我唔會因為慳到些少食飯錢文具錢，而令到公司過得到難關。去到呢一刻，我都認為呢個諗法並冇錯，因為同事越見到你節流，心就越寒，士氣會越差。裁員減薪更加係多鬼如。或者我既公司仲響發展初階，人太少，仲話再減人手？咁搞可能連基本既operation都維持唔到喎。

同樣我響海嘯期間嘗試開源，搞新項目。新項目響海嘯期間其實未回得切本，要到最近先達至收支平衡。然而我對呢個新既項目前景係樂觀既，我亦預期佢響不久既將來會帶俾我更好既利潤。不過講真，新項目真真正正響海嘯期間對我公司既幫助，並唔係項目本身所帶俾我既營業額，而係透過呢一個新既發展項目，俾到一個借口等我同銀行傾多一d貸款。真正救左我公司一命既，係一筆及時既貸款，而唔係呢個新開源既項目響過去一年既盈利能力。

我係一個經驗極之幼嫩既管理人，經濟困境期間，老闆可以做既野我覺得基本上得兩樣：四圍撲水同埋維持同事既士氣。呢兩樣野都係響過去一年我最focus去做既野，成績嘛，well，自問可以再好d啦。撲水既一part自問算係合格啦，維持同事士氣呢一科，我自己對自己表現就唔多滿意啦。

其中一個最搞唔通既係，一方面要同同事講，公司財政穩健，唔駛擔心，藉以希望佢地既信心同士氣可以維持，但另一方面同事們又要面對凍薪一年既現實。兩個自相茅盾既立場，講唔通。

發花紅既日子將近，同事們開始議論紛紛，到底今年既花紅會有幾多？同事旁敲側擊咁問，凍薪既日子係咪已經結束，來年會唔會resume番正常既人工調整？

我心裡面既答案係：會，人工會加，花紅會發。只係我唔想響呢一刻答出口。not until the very last minute，一切都唔敢百份百confirm，儘管我自認為改變既機會甚微。不過海嘯俾我既教訓係，幾估唔到既情況都有機會忽然發生。黑天鵝其實可以出現得好頻密。

做給孩子看的一場戲

2009-11-30T15:43:00.009+08:00

Case#1

朋友Y帶住兩歲既仔仔從澳洲回港探親，老公並冇同行。我多口問：「同老公最近都幾好嘛？」

朋友Y話，冇乜感情啦。大家既關係，完全係維繫於個BB身上。咁既關係，將會直到永遠。

咁我又問，點解會搞成咁呢？唔係大家本來好地地架咩？

「未結婚前大家拍拖果陣梗係甜蜜啦。」朋友Y搖了搖頭：「結婚冇耐，就開始覺得大家越黎越多野唔夾。大家一路拖一路冇正視同解決問題，到後來有左BB，之前既問題，唔駛解決啦。呢個狀態，將會直到永遠架啦。」

理由大概係，希望個小朋友會響一個完整同正常既環境底下長大，所以兩夫婦既呢一場「戲」，將會做足一世。

我心裡有個疑問。小朋友家陣得兩歲，父母既呢一場戲梗係呃得到佢有餘啦，但小朋友一日一日咁長大，對感情世界既領會自然會越黎越多。呢一場戲，係咪真係可以呃到個小朋友一世？到小朋友有朝一日發覺被騙既時候，果一刻既震撼又會有幾大？

*****

Case#2

男性朋友M，女性朋友W，本來係一對關係好好既中產夫婦。

朋友W兩年前因為公司裁員而失業，冇左份工之後，一直搵唔番一份同之前待遇差唔多既工作。

中產家庭，突然收入減半，朋友M獨力更支持，自然感到吃力。朋友M認為，馬死就應該落地行，唔好再發夢可以搵返一份同以前一樣咁好待遇，status一樣咁好既工作。大家成年人，有家庭有負擔，冇得有呢d無謂既堅持。

W對自己老公既呢個諗法一直都抗拒，為左呢個議題，兩公婆既關係開始轉壞。男既覺得女既唔現實，女既覺得男既唔體諒。

又係響呢個時候，兩夫婦發現有左BB。

有BB令到W下定決心做全職媽咪，決心唔再搵野做。盡管佢老公話，唔掂呀，大家都咁大洗，除非肯減少開支，否則得佢自己一個搵錢，支持唔住頭家。

日子一日一日咁過，M既越黎越覺得，自己老婆因為搵唔到以前待遇既工作，唔肯面對現實同挫敗。於是「有BB」俾左一個最理想既借口佢，去逃避現實，去解釋點解唔需要再去搵工。亦因為咁，夫妻之間既感情，一日差過一日。

十個月之後，佢地既BB出世，樣子趣緻到不得了，人見人愛。

冇聽見朋友M響我面前提起同太太既問題好一陣子，我仲以為呢個趣緻BB既出現，最終可能挽救左佢地面臨破滅既婚姻。

「為左BB，等佢可以響一個健康同完整既家庭裡面長大…」朋友M說：「呢場戲，幾難捱都要演落去。」

又係同一場既戲，為既目的又係同一個。come on。

*****

sorry，我唔認為為左小朋友，兩公婆合演一場一輩子既戲，係一件甚麼偉大既事。

小朋友終會一日長大，終會有一日佢會知道，過去既日子全係一場戲。小朋友亦一定唔會喜歡，自己係讓阿爸阿媽「所謂」痛苦一世既「罪魁禍首」。

三幾十年之後，某日小朋友既阿媽向已長大成人既小朋友埋怨，當日唔係為左你，佢早就同你老豆離婚啦，洗屈住屈住幾十年，過埋d行屍走肉既生活？類似咁上下既埋怨，響過去十幾年不斷重覆又重覆。講完又講，鬧完又鬧，鬧到人見人怕。至於個老豆，為左逃避老婆既埋怨，番屋企可免則免，家中太太so call早已冇乜感情，維持夫妻關係全因個仔/女，於是為左如此「偉大」既委屈，可以名正言順拎正牌響出面大滾特滾四處留情，一個唔覺意再搞出多幾頭家出黎。

咁上下既故事，有冇些少似曾相識？

所謂一個「健康同完整」既家庭，well，每個人既演譯同理解，其實都可以幾唔同。

埋黎賭

2009-11-18T15:52:00.005+08:00

網友留言話，你冇本錢，跟本就冇人受你埋檯賭，更加唔好話「晒冷」啦。

對於呢個comment，我又有另一番既體會，就係我覺得有時係我開左個賭局，希望你地一齊黎陪我賭，不過大部份人都不屑響我呢張賭檯上面賭多d。

呢個感覺，響做生意初期，希望請人幫手打江山之時，感受至深。

唔好柴台住，我明既我明既，創業初期，寫字樓又樣衰，公司又未響朵，入黎做分分鐘要驚月尾有冇糧出，你要人陪你一齊去搏，過份d掛。我都做過打工仔，一樣搵過工，點會唔知大家點諗呢？

我公司既呢一張賭檯，當日冇乜人肯埋黎賭架，因為大家都會覺得，輸既機會太高。所以跟本不屑走埋黎落注。

******

事隔多年，你問我當日最終肯走過黎陪我一齊落注賭既同事，到底今日睇返轉頭，算係賭贏左抑或賭輸左？我諗真係要問返佢地自己先知。我當然希望佢地睇返轉頭既時侯，會覺得自己係贏左。不過贏同輸既標準，每個人都唔同，比較困難去一概而論既。

公司裡面，kelly應該係其中一個覺得自己賭贏左，入黎呢間公司仔做算係冇搭沉船既同事。佢入黎做既時候，公司得幾個人，佢自己後來講返，當年入黎做既時候，其實都有左最壞打算，就係我呢間公司可能不久就會執粒收場。不過佢話自己知自己事，以佢自己既background，唔會入到外資大公司做，就算入到，都唔會有乜機會上。冇路可行既時候佢撞到同樣兜踎既CK，與其入大公司做個small potato (佢話事實係你即使肯做個small potato都未必一定有人肯俾你做)，倒不如去間細細間既startup做個話得下事既職員，可能仲搏得過。最大鑊頂多係公司執粒拖你一頭半個月糧，然後失業要搵過份工。反正仲後生，不如搏下，冇所謂囉。

公司後來托賴發展順利，之後再撞到有財團入股，全部都係運氣。kelly係最早入黎做既幾個同事之一，公司發展順利之後，人工加得最多最快既，亦都係佢地呢幾位。我覺得kelly本身自己係個聰明人，只要俾機會佢，其實佢去到邊都一樣會掂既。happens to be當年有d賭檯根本唔受佢玩，佢唯有埋黎CK呢張又殘又樣衰既賭檯度搏一搏，當係一個起步。贏面可能唔高，但係搏贏左，賺左所需本錢既話，再去第二個賭廳玩，就會有人受你落注。

早陣子有現模比我大既行家嘗試撬kelly過檔，開出好好既條件。我雖然唔想阻佢發達，但更加唔想失去一位合作多年既左右手。於是唯一可以做既，就係加多d人工去match人地既offer。

選擇留返響度還是過檔隔離，對kelly黎講又係另一場賭博。

*****

kelly係少數響我呢張賭檯上，算得上「賭贏」既同事。我響度諗，當公司一直發展，之後陸續所請返黎既同事，係咪一定能力上會俾kelly差呢？我諗又唔一定。kelly有機會賭贏，其中一個最大既原因，我覺得應該係「時間」。佢入得黎早，所以當公司進入上升軌既時候，能夠食住頭啖湯而得益。比佢遲入黎做既同事，能夠enjoy from公司發展既得益就相對比較少。當然我覺得，kelly既reward之所以比其他同事大，除左運氣之外，仲有佢夠膽死響公司起步初期，個款好似就快執粒既時候入黎搏一搏。

夠膽既原因，佢話果陣年紀細嘛，一d事業既基礎都冇，都冇野好輸。即使輸左再黎過又如何？有乜所謂？

賭檯有好多種，華麗既賭檯，睇落去贏面似乎比較高，但賭檯既主人未必睇得你起而俾你埋檯落注。剩低一d樣樣衰衰既賭檯，佢地不知幾想受埋你一齊賭，不過你又可能睇呢d賭檯唔上眼，人家受你玩時你反而不屑行埋去落注。

諗返轉頭，我還是萬般感激，當日冇嫌棄我呢張賭檯樣衰，依然願意埋檯落注既同事們。

賭運

2009-11-16T21:53:00.006+08:00

對上一篇文出街之後，又有朋友寫email鬧我，話，你地呢d上左岸既人，總係習慣抬到自己上天，講到乜野成功都全靠自己努力，上唔到位既就講到一定係自作孽咁，淨係響度踩低其他人。

講之前，我查實想話，我呢個老闆仔同「上左岸」都仲有一大段距離。做老闆，好多時候都唔係想像中咁風光。特別係當你揹到一身街數既時候，你回頭計一計自己副身家，分分鐘係負數。相比起穩穩陣陣既打工一族，我地同「岸邊」既距離，有時可能離得仲遠。

不過話分兩頭，我認識一d上一代真係「上左岸」既前輩，的而且確會將所有成功歸功於自己既努力。畢竟佢地經過過獅子山下式既奮鬥歷程，佢地對「上岸途徑」既體會，同我地呢一代，自然會有好大既分別。

*****

我呢，就比較相信運氣同膽量。至於頭腦、能力、努力、眼光諸如此類既items，個人認為通通排響後面。

唔知關唔關CK老豆既賭徒性格事，我成日有個感覺，就係人生其實只需要贏一次。贏一次之後，你日後既人生，就可以build on果一次「贏」既結果上面。乜野叫做贏左一次？emmm，我覺得可能係做左一次比較搏既事業決定；又或者係揀左一個合適既太太；emmm，轉行、創業、讀書既決定，通通都可能係人生既轉捩點。只不過響你make呢個影響一生既decision之前，你其實好可能唔知道呢個決定對自己既將來會有咁大既影響力。大部份時間呢d轉捩點既出現，唔係逼到埋身，就係響糊裡糊塗之時所作既決定。做呢d決定之前，自己到底有幾多把握？

老老實實，我覺得其實通常都唔多。糊裡糊塗之間能夠make a right decision，通常都只係因為運氣，再加一點點膽量。

上左岸既人誤以為自己既成功全賴自己努力。我既解讀係，當你既「努力」可以運用得其所既時候，其實響你「出力」之前，你既「運氣」經已預先幫左你踏上「上岸之路」。

我老豆曾經同我講過一句話，我覺得幾岩既：「成功人仕應該引以自豪既野，唔係佢地既努力，而係佢地當日既膽量。」

呢句話我其實認同既，當隱約見到「岸邊」，定得到方向既時候，幾懶既人其實都肯努力既。in a way我相信努力係有condition既。你知道努力之後有回報，所以你先會搏命。咁樣既所謂「努力」值得自豪嗎？我就覺得唔值得囉。反而佢地當年有膽響冇足夠把握既情況之下make一個影響一生既decision，果份膽識反而比較值得引以為傲囉我覺得。

值得自豪既，或者仲應該包括佢地當年果份耐性同韌力。能夠堅持對人生同將來保持希望，冇俾不堪既際遇同身邊既冷言冷語打沉，繼續等待「decision time」既來臨(當然佢地後來係等得到…)，其實都唔係想像中咁易。

咁make到一個成功既decision又值唔值得自豪？做一個冇把握既決定，根據CK老豆既講法，即係去賭囉。又講真丫，響賭檯上賭贏既人，又有幾多個真係靠眼光？afterall，都係運氣啦。

「好運」呢家野，就更加冇野值得自豪啦下話。

響賭檯上面贏到錢，然之後誇獎自己因為努力同有眼光，所以能夠贏得精采，當然唔會得到掌聲同埋後輩既認同。

我相信一個人其實冇能力控制自己既運氣，可以做既，只係儘量將自己expose to多一d讓你「做決擇」既處境。人生有好多決擇既時刻，到決擇既時候，盡量拎出多一d膽量去make a decision，唔好逃避去選擇，其實，就係咁多。

每人都會怕輸，如CK老豆般既賭徒，永遠會認為「有賭未為輸」，所以佢長賭長有，贏完又輸，輸完又贏。而作為佢既下一代，我既體會係，所謂「命」，其實關乎你輸唔輸得起。你或者會話，有錢仔通常籌碼較多所以比較輸得起。但另一個角度去睇，假如你身無長物，你可能先至係最厲害既賭徒，因為你係最有本錢去「晒冷」。

最「不幸」既賭徒，我覺得通常都唔係搵個銀刮沙都冇果d，而係你手上有些少籌碼，籌碼既數目縱然唔夠「上岸」嘆世界，但卻足以讓你害怕賭輸既一群。

要改寫「不幸」，我諗，唯有從心態上作出改變囉。

賭徒

2009-11-10T16:19:00.014+08:00

我成日笑我老豆係個賭徒。每次過澳門既時候，佢總會擺低多少錢響賭場裡面。雖然同病態賭徒既程度佢仲差好遠，不過我係實實在在咁感受到，佢係多少享受緊，賭博過程之中果種可贏可輸既刺激感。

CK老豆一生人大起大落，試過賺好多好多錢，於是一下子帶領我地一家幾口舉家搬上半山豪宅，但係轉個頭又會變成生意失敗破產收場，讓當時仲年紀輕輕既小CK見識俾人封屋封舖既震撼場面。人生如戲，不停起起落落，「人生好玩丫」呢句我成日掛響口邊既說話，正正係佢自細教我既，根深蒂固。

CK老豆成日話，人生有好多場大大小小既賭博。你當然可以揀唔賭，但係除非你好知足啦，否則想贏你就要落注，落左注你就要接受有機會輸。願賭，你就一定要服輸。如果選擇唔賭既話，就要接受贏唔到大錢，唔好響度阿支阿左。

老豆係個膽好大既賭徒，原則上我係同意佢既「賭徒人生觀」。有目睹佢大起大落既親戚曾經問我，佢既賭徒性格究竟係點樣形成？咁我話，老豆係個幾十年前，搏左條命游水落黎既偷渡客，命都試過幾乎冇啦，仲有乜野會怕呢？做CK老豆個仔，其實幾得意既，由細到大一直目賭不下唔知幾多次起起落落，人生好似忽然變得豐富左，雖然我時有微言：老豆，你自己賭就好啦，硬係要拉埋阿媽同我一齊陪你賭…

*****

我公司裡面，幫我做信差既係一個同CK老豆年紀相約既人。我地個個都叫佢做榮叔。榮叔係個精神好緊張，兼且成日愁眉苦面既人。佢初初返工果陣，對我好避忌，直至我刻意同佢傾多d閒計，慢慢熟落左，佢先放低警戒，慢慢肯講下自己既野。

榮叔同CK老豆一樣，係幾十年前搏左條命走落黎既偷渡客。不過佢同CK老豆唔同，就係冇果種「賭徒」性格。佢話咁辛苦先落到黎香港，要好好珍惜眼前既生活。所以，工作同生活上都唔想冒咁多風險。一直以黎，佢都期望得到一個有人賞識既機會，希望可以憑住一次機會扶搖直上。不過佢話自己命唔好，一生勤力盡責，卻又一直遇唔到一個好伯樂，以致佢潦倒半生。

榮叔有個離左婚既老婆，有個同我差唔多年紀既仔。佢既婚姻唔好，佢歸咎佢人生既際遇唔好，令佢俾唔到好既生活屋企人。至於個仔，離婚既時候跟左佢阿媽，之後就好少再見面啦。最近一次見面，係個仔娶老婆擺酒。不過榮叔去飲既時候，發覺除左少量親戚認得之外，其他既賓客一個都唔識，自己作為新郎既老豆，同一個跟主人家生疏既賓客，一d分別都冇。

「老闆，人生本來就係苦架啦。」榮叔同我咁講。

「唔係喎，我老豆教我，人生應該係好玩架喎。」我笑住答。

「你咁好命，你既人生就梗係好玩啦，點同我地丫。」榮叔搖了搖頭。

我懷疑，大家既分別，可能只係你有冇落注，為自己既人生豪賭一場。

或者咁講有d政治不正確，不過響呢個大家都認為機會越黎越少既社會裡面，穩穩陣陣唔去賭，同賭輸左既分別，其實可能並唔太大。

好命

2009-11-09T17:01:00.004+08:00

有網友留言話我個BB好命，有個做老闆既老豆，呢個世界真公平。

每次遇到類似既留言，我總係唔知應該用乜野態度去面對。

作為一個準老豆，我當然希望將來我既仔仔，條命生得好一d，行少一d寃枉路。無可否認，錢係一樣「可能」令孩子將來既路變得平坦一d既工具，所以做父母既會努力搵錢，希望俾一個理想d既環境個小朋友成長。只不過呢個動作，係咪就突顯到世界既唔公平？我又唔能夠認同喎。

我只係覺得，凡事都有因果。只不過，因同果既關係，並未必發生響同一代人既身上。上一代人種既因，個果可能要去到我地呢一代人先會出現。同樣我地呢一代人所種既因，佢既果亦可能要去到往後既幾代人先會展現出黎。

唔公平嗎？最老土既講法係「呢個世界從來都冇公平」架啦。只不過，當你話自己條命生得唔好，覺得今時今日響香港地再冇機會上位發圍，呢個世界對你好唔公平果陣，世上仲有好多人兩餐都食唔飽。如果你係都要用呢個準則去衡量世界公唔公平，sorry，呢個世界仲有好多人，會因為你仲有兩餐食落肚，而抱怨你條命生得好過佢。同一個準則放落我既BB身上，到佢長大既時候一樣可以抱怨，點解佢老豆唔係Richard Li而要係CK，呢個世界真係太唔公平啦。

冇得咁諗架，係咪？

我從來都唔會反對，今時今日社會上既機會變得越黎越少，貧富差距變得越黎越大。怨氣大，似乎係理所當然。我既唔係政客，亦唔係社會學家，面對呢d社會問題，我唔知道應該點樣解決。《人在中環》寫左就快4年，寫呢個扑同am730既專欄，最開心既時候就係收到有網友同讀者既來信，話俾我聽因為睇到我某一篇文，然之後諗通左唔再浪費時間埋怨，決心努力諗辦法去改變現狀。然而4年裡面，我亦收過好多讓我唏噓不已既來信同電郵。有d朋友鬧我天真白癡，有d朋友會鬧我條命生得正所以講乜都係廢話，上左岸既人係永遠唔明白掙紮中既階層有幾痛苦，諸如此類。

我無意去爭辯我究竟明抑或唔明佢地有幾慘同有幾frustrated，不過對於網友話我自己條命生得ok，我一直都只可以感恩，同埋盡量去飲水思源。世界本是唔公平呢一個事實，我一直都認同。只不過，認同呢個事實唔代表要日日企響度嗌慘，唔代表要仇視果d條命生得比你正既人，因為當你不停做呢d野，以咁既態度做人，唔會令你既人生變得更公平，唔會令你生活得更快樂。

我係一個銅臭到極既生意佬，思維永遠都係要以實際為主。人生公唔公平呢d咁abstract既範疇，對我黎講冇意義既。天天同人比較亦都唔見得對自己有乜實際意義，反而諗下，點樣可以讓自己活得比昨日開心愉快，可能黎得實際一d。

向前望啦，朋友。

肚裡面

2009-11-04T13:39:00.004+08:00

當最近望見老婆個肚開始變得越黎越大既時候，我得承認，我係開始想將腳步放慢落黎，返少d工，唔好咁搏命做野，見多d屋企人，然之後等待bb出世。(俾好多朋友講中晒…)

唔少朋友問我準備好做爸爸未，我唔知點先叫做「準備好」，知道老婆大肚初期，感覺一直比較抽離，直至最近一齊去買bb床，感覺先忽然出現：「咦，係喎，真係要做人老豆啦喎。將會響呢張bb床上面訓覺果個，係我個仔黎架喎…」

過去一段時間，有好多人同我講左好多好多意見，由點樣餵人奶去到小學點報學校都有。我心裡面當然多謝朋友們既關心，不過呢一刻入到腦既訊息其實並唔多。反而老婆經已好有系統地將呢d意見分門別類，做好晒準備，而到左呢一刻，我仲依然好似盲頭烏蠅一樣，完全唔知應該點搞。

我老豆同我講：「唔駛緊張，打到黎果陣，你就自動波會識得點搞架啦。」

醫生話bb係個男仔，我自己對男抑或女其實並冇preference。不過當醫生話俾我地知bb既性別之後，老婆就同我講：「拿，bb係個男仔，佢會睇住個老豆黎學習，你要教佢多d啦。」

我笑老婆咁講其實係響度推卸責任，不過我諗，的確又係事實既。即使係我自己，有唔少既價值觀同做人既原則，又真係由ck老豆果一度「承繼」返黎。bb將來變成點，以一套點樣既人生觀去行走江湖，好可能都會受我呢個老豆影響。咁我心諗，查實響bb長大既過程裡面，我會嘗試給予一套點樣既價值觀俾佢？點樣先可以讓佢將來逃離每日「怨天怨地」既魔咒？

醫生響step既肚皮上塗上cold gel，手握住超聲波儀器響肚皮上碌黎碌去。果個黑白螢光幕上面呈現左一個我唔係好睇得明既隱隱約約既「bb圖案」，老婆同我一直屏息靜氣，直至醫生開聲：「ok，好好丫，bb健康丫。」

whew…

每一次做產前檢查，直到聽到醫生開聲confirm母子平安健康，先會懂得鬆一口氣。

thank god。

感謝上天讓我既人生繼續好玩。

加薪同步（三）

2009-10-26T13:22:00.014+08:00

提早加左同事人工之後，kelly提醒我：「喂，提早加俾同事，budget會爆架喎。」

我話，一個半個同事提早加，爆都唔爆得幾多，冇問題既。不過提到budget，又有另一個問題響我既腦袋裡面閃過。

我唔知大家點睇生意佬做野。好多人都以為，老細做野多數都係睇心情，加人工係因為心情好，想加咪加囉。唔想加你人工，係因為孤寒囉。

生意佬run一盤生意，冇得成日講心情架喎。我認識既生意朋友，大部份每年都有一個budget跟住去做。人工花費有budget，宣傳費有budget，濕濕碎碎乜都有個budget跟住去做。覺得明年前景好既話，去plan下年既budget果陣，自然會plan得鬆手d。

咁即是話，每年加人工既range，其實響年頭既時間已經plan左。舉個例講，假設A公司有一名員工，呢一名員工既salary係一萬蚊一個月。如果A公司響年頭所set既人工budget係13萬2千的話，咁即是話，呢個員工有條件將人工提升到每個月萬一蚊。

萬一蚊，係咪一個合理同滿意既人工水平，只有該名員工先會feel得到。不過如果以加薪唔同步既方法去處理呢個問題，到最後結果係咪一樣呢？budget話有13萬2千，你選擇響六個月之後加人工，員工既人工會由一萬跳升到萬二（instead of 11K）。冇錯，加人工之後既第一年，overall所收既人工總額係一樣，不過一年之後，兩者既starting point就會有1千蚊既差距，查實，邊個著數d？

當然，選擇響年頭升職一刻就加人工既老細，一定唔會同個伙計講，其實你份工升職之後係可以去到萬二蚊，又或者話，其實我覺得你呢既人工，應該係萬二至真。呢個情況，老細只會同你講，將就下啦，經濟唔好，只可以加一千咋。員工覺得，自己一升，老細即刻就加人工俾自己，俾足面自己啦，相比果d拖住你，升職之後仲要等成半年先肯加人工既孤寒老細，好得多。

其實咁樣做老細最著數，budget冇爆到不特止，但係下年同事既起薪點，又襟低左，預留左更多空間俾個budget去做野。員工又覺得老細冇拖糧冇孤寒，一升就加人工夠晒尊重自己既能力同價值，一舉幾得。員工永遠都唔會知道，其實係有方法，自己既人工可以再提升得高一d，下年既starting salary，係有辦法再高一d，甚至響老細既心目中，你所值既人工，根本唔止你所得到既。

當然，剛才既例子，個assumption係，個老細會盡量跟足個budget做野，而且會盡量用盡個budget啦。

講清楚先，我之前傾向加薪同升職有時間上既差距，同剛才所講既原因，一d關係都冇。我當然冇咁偉大，情願自己做個衰人都要幫同事諗同爭取更好既待遇，你估真係傻既咩。只不過，當kelly提醒我有關budget既問題時，我腦裡忽然閃過左呢一個咁既情況遮。

我有時覺得，一切都係presentation啦。除非你知道，你老細個budget裡面，條數究竟係點樣計，否則，係糖衣抑或係毒藥，你估唔到既。打工仔有時心裡面諗野會有一種慣性，而呢一種慣性，往往會令佢地睇唔到事實既全部。生意人多少會有d奸狡既，卑鄙起上黎既時候往往會利用同事們睇事情既慣性，去「愚弄」佢地，去搵佢地笨。我自己有時都會為管理上既方便，去搏取一d同事們既掌聲。然而搏取掌聲既背後，往往隨之而黎既先係真正既毒藥。當你覺得你老細好似都對你幾好喎果陣，往往係佢搵緊你笨既時候。反而當你覺得你老細好PK果陣，背後反而可能冇乜壞既動機。呢方面，我係過來人，自己幾時卑鄙幾時正人君子，同事們既感覺好多時都會掉轉。

加薪同步（二）

2009-10-15T13:46:00.004+08:00

先多謝各位朋友既意見。

兩個鐘頭前，我決定將想升既同事即時升左，而佢既薪金調整亦同步生效。

覺得突然嗎？所以我話要先多謝各位意見囉。有時一件事情諗唔諗得通，過唔過到心理關口，多幾把聲音，會令事情有好大既改變。

對我黎講，每年salary只會adjust一次呢個system，係我響幾年前訂出黎既。訂呢個制度既原因太長篇啦，前因後果有太多，唔響呢度詳述啦。不過因為呢個自己當日「懶強勢」咁訂落黎既rule，往後同事們既調動同升遷，就多左好多限制。好似之前所講，為左避免同事覺得俾我搵笨，所以人事調動既時間，我只好留響年尾salary adjustment果段時間做，其餘既時間，即使時間合適，我都往往錯失時機。

黎到呢一刻，在我立場黎講，我都唔認為升職同加薪必須要同步進行。當中有幾個月時間上既lagging，我覺得係可以接受。不過我亦都好清楚，呢個係我個人既價值觀問題，而去到錢銀問題上面，我冇權去逼同事去接受我呢種向資方傾斜既價值觀，從而要佢地接受一d公認為唔為唔公平既薪酬方案。所以一直以黎既妥協做法係，salary adjustment響12月，我就會刻意安排人事調動都響12月，兩件事情seems to be同部進行，於是大家都好似冇蝕底到。

呢個做法當然on居，特別係呢個禮拜，我自覺公司好需要轉一轉一部份既structure去面對新既環境，但structure一轉，有同事就即時要升職。現時離開12月既salary review仲有兩個月，但structure要轉我覺得唔可以等，於是矛盾就出現。不過如果逃避呢個矛盾，反而錯失一d時機既話，我諗咁就會更加on居。(too bad響過去幾年一直響度on居緊…)

所以多謝各位朋友俾左好多好清析既意見我，當跌入死胡同既時候係需要提醒既。多謝你地既幫忙。

餘下落黎，係點同其他同事解釋，何以今次我又可以越過之前我自己一手一腳訂出黎既制度去做嘢。或者我可以學下之前董伯伯推翻自己所訂既政策一樣：「乜你地唔知咩？八萬五已經唔存在啦！」

management呢，每日都充滿挑戰。

anyway，thank you everyone。

雞蛋與雞

2009-10-15T00:16:00.005+08:00

每次講起有關人工既問題，都總會有d朋友同我既意見唔同，畢竟處於唔同既位置，自然會有唔同既觀點與角度。我響度諗，當大家都響度講緊邊個岩邊個唔岩，合理還是刻薄既同時，會唔會有另一個角度去睇呢個問題？

我係一個老細。我既立場好自然會係，你想得到高一d既人工，麻煩你show一show你有幾勁俾我睇。你做得好，表現好，俾我睇到你掂之後，我自然會加大你既回報。

作為一個打工仔又會點呢？拿，你加多d人工俾我，我自然就會做得好d，表現好d。總之出黎搵食，都係為個錢既遮，你肯出高d人工俾我，我收錢之後，自然就會表現得更好架啦。

於是結果係，做老闆既響度等待伙計交表現，然後先至加人工，而打工果個，又響度等待老細加人工，然之後先去交出更多既表現。大家都響度等，結果做老細永遠等唔到個伙計表現回升，打工果個又永遠等唔到加人工既一日。

都要是但一個做先架。

咁下一個問題係，點解做先果個唔係對方，而要係自己先…

比較common既答案係，我唔信佢囉。

打工仔話，d無良老細見到自己做到野，只會繼續壓榨，唔會因為你做得好而俾多d錢你。

咁d老細又話，d伙計唔縱得，響未交表現之前就加人工，佢地只會覺得係老馮，係咪都覺得自己係應得，唔會感激你之餘，亦唔會因為你加佢人工而交多d表現俾你。

我有時覺得，係一個雞同雞蛋既問題。留響死胡同入面既，可能有你份，有佢份，又有我份。

每次當我有類似問題諗唔通既時候，我總會聯想到，歸根究底，可能都只係勞資既互信出現問題。當任何一方唔相信，自己既付出係會得到對方報以合理回報時，一切都只會原地踏步。

勞資關係如是，人與人之間既相處呢，有時都可能係咁。

加薪同步

2009-10-14T17:38:00.011+08:00

我成日有一個疑問，就係升職同加人工，係咪必須同步進行既呢？

我做打工仔既時候合共升過兩次職。呢兩次經驗之中，升職果一刻，都係冇人工加既。不過升左一級之後，而又真係響果一級企得住既話，真正感受到升職所帶黎既「金錢」好處，往往係公司之後annual薪酬調整既時候。去到果陣，你又會feel得到，oh，如果唔係升左，肯定就唔會加到呢個數啦。

我覺得咁冇乜問題，反正遲幾個月加同早幾個月加，冇乜所謂。最緊要係有得加。

仲有另一個問題係，當上頭話升我果陣，我當然覺得開心。不過響乜都未做，乜野成績都未做到之前，我真係唔係好敢嗌話要加人工喎。我唔知呢種諗法係咪好落伍，不過如果我想要求一個更高既回報，at least我會先做到一d見得人既成績出黎，有左呢d做籌碼，我先會夠膽開口要求加人工。

升職同加人工，對我黎講當中並冇等號既。不過「升職」係一個機會，俾你一個舞台去表現自己，去做一d成績出黎。或者咁講，「升職」係俾你累積加人工既籌碼。籌碼一夠，你要求乜都得。

我既同事，當然又唔係咁諗啦。

我自己既公司，沿用左人工每年會調整一次既制度。即是話，今年做左幾多野，表現點樣，又或者職位上升左幾多級，響薪酬上既反映，我都會響果一次annual adjustment裡面反映出黎。假設正常一個表現好既同事，會加5%咁計，你響呢個年度裡面升過職，according to個salary scale，你呢個post應該又要有let say 10% adjustment既話，咁你響annual adjustment之後所收既人工，就會比之前有roughly加左15%囉。

我有同事覺得，咁樣等於搵佢地笨，因為佢地覺得，假如升職係年頭既事，而每年既annual adjustment又係年尾既話，咁佢咪蝕左好多人工俾我？

所以加人工，同埋升職，佢地覺得應該係同步既。升職又唔加薪，分明係我呢d奸商壓榨員工既技倆。

或者係都唔定，哈哈。不過我咁諗，呢個薪酬制度，每個同事starting from day 1都好清楚。咁如果我真係想響年頭升你職，你又會唔會因為覺得我搵你笨，而放棄呢個機會，拒絕升職呢？

於是為左避免呢個「搵同事笨」既問題，咁我一貫既做法係，人事調動我唯有儘可能都響靠近年尾既annual adjustment果陣做啦，令到升職同加人工既時間近乎同步進行，免得跟同事們有無謂既爭拗。不過，呢種斬腳趾既做法，下下都用現實既調動去夾硬遷就呢個由自己一手一腳訂出黎既「annual adjustment制度」，自己有時都覺得多鬼餘，搞到調動既時候縛手縛腳，自己搵番自己笨。

六月前後（二）

2009-10-08T15:52:00.006+08:00

經理甲要從原因一又或者原因二當中選擇，你係佢，你會點揀？

有朋友話經理甲只能夠揀choice#1。咁我既經驗係，呢種情況同事一定唔會親自開口揀一或者二。佢會揀死唔出聲，又或者人急智生地講出第三個選擇。

經理甲選擇左後者，亦都係我覺得最正路既回答。

答案大概係咁既，經理甲話可能人夾人緣，所以自己既style可能同員工乙同員工丙唔多夾，咁所以唔關大家既能力問題。只要調一調人，例如將員工乙同丙調過隔離team，隔離team既員工丁同戊調過黎under佢自己，應該就冇問題。如果因為咁而要炒佢地是但一個，咁佢話就對大家都唔公平，因為既然唔係能力問題，我之前所講既原因，就唔成立囉。

我對呢個講法，ok喎，最驚你唔係咁講。

不過咁，經理甲話想調隔離team既員工丁同員工戊過黎試試，我就唔多接受啦。佢地兩個都係已經train好晒，proven左係fit既同事，試唔到你真工夫既。我將會新請兩個新同事返黎，由你一手一腳去帶佢地囉。其他manager培訓一個新人既時間平均係三個月，咁我又俾三個月你囉。得既，就proof到你依然有價值，能力亦跟得上，值得繼續留低。唔得既，走都無話可說囉。

on the other hand，遲遲唔到standard既員工乙同丙，分去其他team裡面，俾其他既manager train下，又睇下佢地唔響經理甲指揮之下，係咪一樣咁唔掂囉。我又係果句，三個月時間，very last chance，如果under其他既阿頭，情況依舊既話，要走都無話可說啦。

我相信不同既環境、壓力之下，同事們既表現會有唔同既高低。調下，會有驚喜都唔定。不過，我有時覺得，當你好一段日子唔去捽下班同事，捽下d manager，佢地會不自覺地變得是是但但，以為是是但但都過到骨。

炒人係手段，扮話要炒都係手段，不過以前都講過，炒一個人付出既成本其實好高，慳得過都唔想做。不過作勢扮「炒人魷」係做老細最後一道防線，出到呢一招，再唔掂，都真係投降架啦。以前試過玩大左，明明係作勢「扮炒」，最終焗住變成「真炒」，記憶尤新。

燦sir話，可以將唔得既manager降級，做返個普通跑數既sales。可能有d誤會，經理甲既工作，同sales冇乜關係既，所以冇得叫佢去跑數。不過類似做法，以前做打工仔既時候都有見過，一時三刻問題唔大，不過被降職果個，面對同事既時候，面子好難過得到，到頭黎，變左佢一樣係做唔長，甚至不自覺發放負能量。我諗呢樣反而involve另一個問題，就係有d人，根本就唔應該升做管理，不過呢個係後話啦。

六月前後

2009-10-07T22:57:00.006+08:00

六個月前，經理甲同我講，佢條team裡面既員工乙同員工丙水平未夠，能力未合乎公司既standard，所以某類型難度較高既project不能交俾佢條team做。

我話ok，我願意俾時間我既員工develop，去讓佢地develop到可以追到其他同事既水平。不過我俾同事develop到達標既水平既時間，唔可能無止境。假如我從新請一個全新既同事返黎，由零開始咁培訓既時間，仲短過等果d未達標既同事develop到去合乎standard既時間的話，咁花時間去再培訓呢兩個未達標既舊同事，就變得唔化算。

呢一個grade既同事，我地由請到train到達標上手既時間，on average係三個月。

六個月之後，我再將同樣難度既project交俾經理甲所supervise既team去做，同樣，經理甲話，佢條team裡面，員工乙同員工丙既能力未足，未達到所需要求，仲需要更多既時間。所以個project，唔可以由佢條team負責。

咁我問經理甲：「新同事上手到達標要三個月，員工乙同員工丙用左雙倍既時間都仲未能夠達標，咁你覺得我應該點做？」

經理甲冇出聲。

我睇到問題有兩個可能，第一，兩個同事能力根本同公司要相距太遠，即使時間再多，都唔可能可以跟得上。如果個問題係咁的話，兩個同事就唔應該留低。第二，就係負責lead呢兩個同事既人能力唔夠，其他leader可以用三個月將一個新人帶到合乎水平，呢一個leader卻用double既時間都完成唔到。同樣，能力唔夠既manager，一樣唔應該留低。

我同經理甲講：「如果你有呢個問題既第三個可能既答案，你不妨提出黎。如果冇既話，麻煩你響剛才第一或第二個原因之中，二選其一。」

商業社會，多少有d殘酷既。

*****

我有時諗，一個manager既價值，究竟應該點計？

以一個sales manager為例，如果一班sales，響冇人manage之下可以每個月賣出10件產品的話，咁如果我將一個manager加入去管理佢地，同一班sales響有人管理之下，依然係賣出10件產品，咁呢個sales manager，仲算唔算有價值？

我就覺得冇價值囉。

manager係要令你下面既一班同事，比起冇人manage既時候perform得更好。做唔到既話，呢個manager，形同一個紙版，冇存在既價值。

我既一班女仔同事，以前因為搏升而爭崩頭。升左對佢地黎講，除左人工稍為多d，仲有一種「榮譽感」。有d升左冇耐就開始同下面擺款，扮阿姐。我看在眼裡，心諗，升職表面上對你係一件開心既事，但唔好唔記得，升左職之後，除在「權」大左、「地位」高左之外，你既責任都一樣大左，老細對你既要求亦一樣高左。你係必須要交出比升之前更好既表現，而且仲要經常咁保持你響公司裡面既價值，咁你先可以繼續留低。

你下面既人唔得，唔好諗住可以置身事外。

唔好以為升左，就一定前途無限。唔留神既話，分分鐘死得仲快。

Moments

2009-10-04T12:42:00.004+08:00

有冇覺得，年紀越大，個人反而越黎越眼淺？

大學同學選擇響太平洋既小島上面舉行婚禮。我起初聽到呢個消息既時候，心裡面還是媽媽叉叉的。有冇搞錯，要我地班同學山長水遠走去飲你果餐？

大學同學係個靚女黎既，我認識佢對上果個男朋友，hmmm，幾麻麻地既老實講。據說個男仔好花fit下，偷偷地瞞住大學同學搵左等二個女朋友而搞到分手既。果次，好似都幾傷下。或者因為咁，反而令我覺得，同學今次嫁俾衣家呢一個老公，感覺有d「守得雲開」feel。

係呀，我覺得呢個新郎哥，幾好呀老實講。又踏實又錫老婆。

好多人話婚禮係例行公事，主要係做俾人睇，甚至係一場show。我曾經都係咁諗，不過參加婚禮參加得越多，反而可以感受到不同人不同婚禮既分別。係呀，有d真係一場show，分明係交差做俾人睇。但一樣有好多婚禮，讓我留低深刻既印象，甚至感動到有些少眼濕濕。

至於係咪一場show，還是一個真心而且讓人感動既moment，關鍵響兩位主角既態度果道。賓客其實係感受得到既。

婚禮既感動位，除左係新郎新娘本人之外，往往仲有包括雙方既父母。養兒多年，睇住佢地成長，到呢一刻長大成人成家立室。有時呢一部份既感動位，比起新郎新娘交換盟誓果一刻黎得仲震撼。唔知大家有冇同感，好多婚禮之上，新郎新娘都會講番幾句多謝既說話，往往佢地講到屋企人，爸爸媽媽既時候，往往都係最忍唔住喊既moment。佢地既speech未必好動聽，可能係條理不清而且好唔專業，但係當你見到台上既人講起屋企人會激動起黎既時候，自己又總係有些少講唔出既一刻感動。

我細個既時候，參加婚禮並唔會有呢種感受，反而去到老左，好多moment都會響你腦海裡面既database之中，recall到一d屬於自己感動既片段同感覺出黎。所以我話囉，年紀越大，我反而覺得自己眼淺左。

山場水遠去飲，本來我心裡面仲係媽媽叉叉既。直到一個又一個讓我有d眼濕濕既moment出現，而且仲見返一班好耐冇見既舊同學舊朋友，hmmmm，雖然山場水遠兼且好貴，不過都值得丫。

step因為大肚舟車勞動唔太方便，所以今次並冇隨行。我坐響wedding chapel裡面，感受住一個又一個令我有些少眼濕濕既moments，心諗，如果老婆都響度就好囉。

近來

2009-09-30T17:16:00.004+08:00

sales同事收到風，又有行家執粒。佢地覺得係件好事，因為又少左一個競爭對手。

少左一個競爭對手呢個諗法或者係岩既，不過我更加concern，係我身處既行業正進行整固。強既越強，弱既越弱，三幾年之後，我估成行應該只剩低三幾個行家。CK公司到時仲會唔會健在，其實都係未知之數。

我突然之間諗，假如上年冇遇到財團既注資，其實我間公司仔，又係咪真係有本事捱得過之前既金融海嘯呢？諗返轉頭，其實我好保留。儘管被注資入股後，壓力同工作量都以倍數上升，但係如果當日冇呢件事發生，公司可能已幾消失左都未定。

努力以外，適當既時候遇到適當既人同適當既事，係運氣。 thank god。

*****

過兩個禮拜要去上「學做人老豆」課程，一連幾個星期，放左工之後去。上過同樣課程既朋友向我作出預警，話個course，將會悶到飛起。我係一個連抱BB都唔識既傻瓜，我諗課程裡面既野，幾悶我都應該會覺得新鮮掛。

朋友知道step有左BB之後，第一個問題就問，諗住幫個BB報邊間學校？

咁我話，至少都要知道係仔係女先只道報乜學校掛？

對於做人阿爸，要有乜心理準備，我其實一d idea都冇。我亦唔清楚，我衣家心裡面所有既preparation足唔足夠。講真，入邊間學校，又或者個細路叻唔叻，我心裡面查實冇乜期望。咁如果真係唔叻既，唔通你唔要佢咩？生個B出黎又聰明又可愛咁梗係好，不過at this moment，我淨係希望個BB會健健康康咁出世，step又唔好陀得太過辛苦，大家都平平安安，咁就夠晒啦。

仲響個肚裡面，咁快要諗佢讀書？唔駛啦掛。

又或者係我闊佬懶理掛。

*****

祝大家有個愉快既國慶假期。

Because you are a man

2009-09-23T00:14:00.002+08:00

朋友：

對於最近你所遇到既不幸，我深表同情。準備落筆覆你既電郵之時，我本來打算向你多講幾句安慰既說話，希望你個心會舒服一d。

不過響最後一刻，我改變左主意。

因為我突然醒起，你同我一樣，都係一個堂堂大男人，流住同一樣既男兒血。

*****

我明白，人生有好多事都會好痛好痛。有時呢d痛楚同遺憾甚至可能會留響心裡面一生一世。我知道我冇可能叫你忘記痛楚，不過當不幸已成事實，痛楚即使不能忘記，你卻必須要忍受。

要忍住，唔好嗌痛。男子漢冇嗌痛既權利。

你或者會話我守舊，不過每個人都有佢需要肩負既責任。你既家庭裡面，有未成年既細佬妹，有需要你照顧既老人家，佢地都需要你，需要你既勇敢，需要你既長大，更加需要你既承擔。將悲痛留響自己既心裡面，然之後努力長大，勇敢咁行出黎，同你既屋企人講：「唔駛怕，因為有我響度。」

唔好期望會有人走黎呵你，做細路既日子，要讓佢成為過去啦。今日開始，做一個有承擔既男人。因為你屋企裡面，有太多人需要你。

你會做得到既。

ck

幾件事

2009-09-14T16:59:00.012+08:00

朋友Y介紹未婚夫俾老婆同我識。朋友Y既年紀俾我細幾年，而佢呢位未婚夫，以年紀黎講，勉強都可以做到我老豆。

類似既事情發生響我一d比較熟既朋友身上，係最近既第二次。

我無意對「老夫少妻」有任何歧視，事實上即使兩個人既年紀相距二十年，亦唔代表大家一定會有問題。我只係覺得，市面上呢一類咁既combination，數量比我想像中多。

聽過唔少女性朋友話，香港地後生既男仔太過幼稚，太過唔識照顧人，個人能力又低。要揀做終生伴侶，揀唔落手。於是乎佢地尋尋覓覓，搵到一個心智成熟又懂得照顧另一半，又有經濟基礎既男人可以付託終生，唯一既缺點係…老囉。(如果呢個係缺點的話)

香港地後生既男仔係咪真係咁差？我唔敢講，不過我諗，後生仔未經啄磨，事業上既成就亦未有咁快成形，要響一眾年青而又未婚既男仔當中，揀中一粒明日之星俾自己，風險太大掛。於是女仕們把心一橫，索性揀一個以經見到「結果」既現成男人做伴侶，風險會變得細一d？情況好似買樓咁，買樓花唔穩陣，所以寧願買「二手」現樓，樓齡舊就舊d，但勝在有板睇，夠安全感？

我又諗，如果你硬要將一個只係做左七、八年野，三十左右既「後生仔」，同一個飽歷滄桑既人比較心智成熟既程度，同一個響商業社會上奮鬥左三十幾年既人比較事業上既成就，其實我覺得並唔係太過公平。個「後生仔」響此時此刻，真係冇乜可能鬥得贏架喎…

查實認識一個年紀做得自己阿爸既「新朋友」，總覺得，有一點尷尬同唔多自在。

*****

寫呢一篇文既時候，天文台話，兩個鐘內會掛八號。

公司異常平靜，冇人響度嘈住要返屋企，雖然我知道，大家都不停reload個天文台網頁，一見掛八號，即閃。

有關天文台既颱風pre-warning，上年呢個時候曾經響我公司引起過幾大件事。上年既情況係，有一次天文台發出左警告話，兩個鐘內會掛八號，kelly於是安排住得比較偏遠既同事先行離開，然之後再分批俾住響市區既同事放工。點知有同事唔服發爛渣，大吵大鬧投訴點解有人可以走先又話管理層唔公平，諸如此類。

於是我一怒之下，就話從今日開始，office hour裡面假如再有天文台既pre-warning，我話之你住響蒲台島都好，所有人一律唔俾走，直至天文台真係掛起八號風球為止先準放工，咁唔駛再討論我公唔公平啦。

窗外一片陰陰沉沉，我心諗，世事往往係咁。一年前以為好心俾d住得遠既同事放工先，反而意想不到地令到有同事會不滿。我有時好唔鍾意，芝麻綠豆既事都走去上鋼上線。到左今日，大家都係輸家。

輸既，仲包括埋呢一刻其實好想閃既我。

*****

表弟個女今年兩歲，早幾日同佢同檯食飯，席間佢好感概咁話：「CK表哥，你遲下就唔會好似依家咁搏架啦。好似我咁，做左人老豆之後，一切都會以個女為先，其家既野，求其過得去就算架啦，點會好似你家陣對工作咁執著架。」

我不以為然，或者係真都唔定。只係，此時此刻我真係仲未感受得到喎。

「你衣家就講得口響…」表弟話：「過多幾個月你就知！」

人生果真時時刻刻都充滿新既挑戰同驚喜。

打風日子返屋企，祝大家都平安抵步。

咪又係自己受番!

2009-09-04T18:23:00.020+08:00

幾年前做生意冇耐，有一次咁既經驗…

同事幫我報價俾客人，點知響報價單上打少左一個「零」。一單本來有錢賺既生意，變成要蝕大本。當時心裡面梗係好嬲果個同事，點解會咁唔小心，搞到要我蝕咁多錢。

朋友就安慰我啦：「ck，都唔關你事，都唔係你既錯，唔好太勞氣啦。」

我聽到d友朋友話，錯不在我，唔係自己既責任，果一刻我個心，的確有d舒服番既。

不過到我月尾埋數果陣，痛楚依舊。即使自我安慰話錯不在自己，但損失依然係響自己既荷包度拎出黎。就算責任響人地身上，受既，咪一樣係自己？

（況且，又係咪真係完全錯不在自己呢？點解出報價之前自己唔跟下眼…）

*****

生意同做人，好多時都有好多相似之處。好多人工作事業不如意，會埋怨因為自己有個衰老闆有眼無珠，有班靠擦鞋上位既衰同事阻住地球轉，有個搞到香港冇晒機會既無能衰政府，諸如此類。ok，我就當所有既控訴，所有既埋怨都係真既，犯錯同責任並唔響你既身上，之但係，咁跟住又點呢？

錯不在自己，但你既事業同工作，依舊係唔如意，即使係人地錯自己「真係」冇責任都好，受罪既，依然係你。

或者係我偏見都未定，有時我會覺得，衣家有好多人，好習慣將精力同焦點，放晒去搵到底「邊個有錯」，又或者「個責任響邊個果度」。當發現錯不在自己，責任響某某度，甚至響個社會果道，咁佢地就可以close file啦。「大佬！都話錯不在我啦，咁仲可以點丫！」

只不過咁，個問題係，錯不在你之後，受苦既依然係你喎。將精力放晒響「搵責任」果道，除左短暫地可以幫你舒緩一下鬱鬱不得志既心情之外，「止痛」效力一過，痛楚依舊。甚至可能因為覺得黑狗偷食白狗當災，不斷感受到果種唔公平，而令你既「傷口」變得越黎越痛，你既日子變得越黎越難過。

一生人精力有限，將energy放得太多響呢個「搵邊個錯」既遊戲當中，afterall對自己冇乜好處丫。到精力用得七七八八，年紀又開始大果陣，再冇精力為自己作出改變，之後一切就唯有認命。

我明白有時真係好難既，不過做人有時應該take one step forward。得個知字咁知道錯不在自己就算啦，無謂將精力再放響同一個死胡同裡面兜圈啦。將精力放響幫自己諗下點樣逃離眼前既困局，應該會比較實際。問題出現係應該去解決問題，而唔係放任地浸淫響問題所帶俾你既痛苦之中嘛。

有時諗，係你錯又好，係你既擦鞋仔同事錯又好，係你個又賤又蠢既老細錯又好，係公司錯、行業錯、甚至係整個社會既錯都好，真係咁重要咩？反正邊個錯都一樣，受苦既，咪都係你自己。

真正重要既，係你之後打算點做呀朋友。

祝大家有個愉快既週末。

最近聽到的話，之二。

2009-09-02T22:25:00.025+08:00

其實都幾估唔到，會為呢一個題目寫第二篇。

首先呢，幾位睇唔過眼(又或者係睇我唔起，哈)既朋友，唔駛勞氣。大家都係呻下遮。老細同打工仔都一樣，都係普通人一個，一樣有情緒，一樣需要發洩既渠道，脾氣發完又係新既一日。你覺得我呢個老闆仔小器，唔夠道行，又或者露晒底？其實都係架，我唔會否認架喎。事實上，有一直睇我呢個爛扑既人都知，過去呢幾年我一直都有響呢個「半虛擬」既世界裡面發洩呢種情緒。我選擇響呢度發左出黎，反而能夠幫助我響真實既世界裡面脾氣好一d，而我班伙計又「受」少我一d。一家便宜兩家著，而且呢個發洩渠道同方法，對我黎講一直行之有效，我亦冇打算改變。如果我最近寫既野令你睇得好唔舒服，又或者令你把幾火既話，我又只可以同你講聲唔好意思，同埋勸你唔好再返黎俾我激囉。

講返正題。

講真，做得老闆，就預左會俾伙計插架啦。不過我就自問未練到去「永不動氣」既境界。不過心裡面條氣唔順還唔順，九成既老闆都有一d接近既原則，就係即使你插得我幾行都好，你交得到貨既話，我就忍你囉。個大前題係，你要交得到貨囉。怨氣呢樣野，我既經驗係，一個好地地既人，任由佢既怨氣積累呢，工作表現會慢慢咁被影響。當中或者會有例外都唔定，但我見過有好多例子，當你越黎越多怨氣既時候，情況就好似跌左入個窿度咁，走唔返出黎。而工作既表現呢，又會不知不覺咁逐漸被呢種怨氣饞食。直到有一日，饞食到連貨都交唔到，老闆響呢個時候就唔會再忍，會出手黎個了斷架啦。不過事情發展到咁既地步，對大家都冇好處。到真係俾人炒果陣，被炒既又往往會以為，自己係因為曾經「講過個老細壞話」，所以個老細要報仇先至炒左佢諸如此類，反而會容易忽略左，工作表現同質量已經慢慢被怨氣饞食呢個事實。

另一個問題係，怨氣太大，會傳染既。又即使你真係依然交到貨都好啦，但係你「影響力」大到影響到隔黎左右果d交唔到貨既話，咁唔郁你都唔得啦。你自己定力夠，怨氣沖天都依然交到貨，咁係你叻仔。但係你隔離果個未必有你既定力架喎。總之有心又好，無意又好，又或者你會話最終個責任都係個老細仆街都好，你d怨氣搞到隔離左右既話，個老細唔做野至奇。

我唔係話，打工仔唔應該呻，正如我一樣會響度鬧呢個鬧果個一樣，冇得有口話人冇口話自己。不過我就覺得，打工仔放任自己去積累一d怨氣，對佢自己冇乜好處，對老闆更加冇好處，係個雙輸既局面。拿，唔好同我拗，呢個係邊個既責任啦，反正雙輸既野，就唔值得做，係咁簡單遮。不過你係都要話「俾我呻下都唔得咩！」，咁我就冇辦法接到落去囉。

朋友話，唔應該講到老闆加你人工，好似係恩賜咁。我贊成。老闆同伙計既關係，我從來唔覺得有甚麼恩賜唔恩賜既成份響裡面。相反，我覺得係明買明賣既一單交易。我加你人工，係因為我覺得你值，同埋我希望用更高既人工留住你繼續幫我。當然，受果一個絕對有權覺得滿意又或者唔滿意。不過咁，假如你既答案係唔滿意既話，最好既辦法係，出去出面搵一個願意支付你認為滿意既薪酬俾你既僱主囉。冇必要講d傷大家感情既野，又或者「勉強」自己留響度，然之後走去影響其他滿意自己工資既同事囉。如果你又係果句：「唔通呻下都唔俾咩！」emmm，唔係話唔俾，不過，可以的話最好唔好囉。

又，有關effort既問題。由於我係一個仆街既老闆，所以我去reward一個同事，唯一既理由，只會因為佢能夠成功完成我交俾佢既工作。完成唔到，過程當中佢幾咁努力，付出幾多effort，我都唔會俾任何既reward。朋友話，呢d係一個「普通」員工都會講既說話。我對呢個講法，有好大既保留。我認為一個「普通」既成年人，都應該明白到，自己現正所身處既並唔係屋企又或者學校，老細對自己既要求亦同你阿媽又或者你既小學老師有所分別。商業社會係一個講求結果既地方，如果最終結果係mission incomplete，任憑過程你幾咁努力，都唔會得到報酬既。我諗呢樣，應該係一個「普通人」應有既common sense，岩嘛？所以能夠理直氣壯咁提出，要求上司、老闆單憑佢既effort而去reward佢既，得罪一句，我相信並唔係一個「普通」既員工，而係一個既幼稚而且一直都響溫室裡面長大既員工。又係果句，如果你話：「挑，咁呻下都唔得咩！」ok，我又唯有收聲囉。

我比較覺得心煩既係，公司裡面開始有呢種「久違」既氣氛出現，示意我有d野必須要處理。任由呢種氣氛發展落去，時間長左，我可能會面對更大既麻煩。你係一個打工仔既話，或者會覺得我小題大做，挑！老闆你小器之嘛，員工呻下都要介意同放響心上。經驗反而話俾我知，事出總有因，呢d往往係更大問題即將發生既先兆，掉以輕心既話，後果往往比想象中黎得嚴重。

同意嗎？

唉。

想點唔該開聲

2009-08-28T17:52:00.007+08:00

早機回到新城市既辦公室。

走開左一段時間，steve向我匯報返過去幾個禮拜發生左d乜事，各樣既進度如何。

匯報既內容當中，其中一項著墨甚重既，係講有關其中一個同事，工作表現好差好差。

差既範圍包括做野唔小心、冇心裝載、態度不佳、同其他同事相處有問題…諸如此類。

我越聽越唔耐煩：「喂steve，得啦，我知道呢個同事好唔掂啦。冇其他事既話，我想返酒店沖個涼擺低行李先再返黎啦。」

「唔係喎ck…」steve面有難色：「咁佢真係好唔得喎…」

ok，我唔係傻既。我心諗，steve咁樣評價個同事，佢心果句，梗係想我炒左佢啦。佢所講既同事唔係好掂，我多少都知道係真既。不過，steve就硬係講唔出口，話佢想炒佢魷魚。以前kelly未黎之前，佢上一手既manager都有呢個問題。有同事激到自己半死，工作表現又唔好，明明個心好想佢消失，但係就永遠唔敢向我request，正正式式咁問我炒唔炒得佢。我明，炒人係個difficult decision，而且做決定果個人，有時仲要揹起一d道德責任，唔好彩傳左出去完來係你make decision話要炒既，大圍同事唔鍾意分分鐘會變成萬箭穿心。於是乎，佢地唯一可以做既，就係響我面前，係咁complain話呀邊個邊個有幾唔掂，「期望」我會「自動自覺」提出去炒Ｑ左佢，咁就一天都光晒。

只不過咁，你揹得起manager既title同人工，就要承擔得起佢既責任至好。個staff係work direct under你既，我根本就唔會知道佢真正既工作表現係點。你係佢既manager，炒又好留又好，個decision應該係你去make。如果你覺得你對自己既decision冇信心，我頂多可以俾些少意見你。又如果你驚自己authority唔夠，驚隨便炒個人我會詐你型，咁你at least submit個request俾我，話你想炒左阿邊個邊個，我自然會approve或者唔approve架啦。

你一味響我面前打個同事毒針，咁查實你想我點？女人想男朋友買野比自己就話要特登唔講出口，等個男友自己識做遮，男人老狗，唔係黎呢套下話？

仲有，我係你老細，唔係你老公。唔該。

「佢掂抑或唔掂，你自己知道就得啦。」我老沒好氣地說：「我真正需要知既，唔係個staff有幾唔掂，而係當你呢個manager知道個下屬好唔掂之後，你打算點樣做同點樣處理呀，understand?」

「我返酒店。諗掂之後你話我知。」

祝大家有個愉快既週末。

安慰獎

2009-08-27T22:02:00.004+08:00

「可唔可以將Kay個title升做senior？」放工時候，office裡面得返kelly同我：「當係對佢呢三年既工作態度既一d肯定，得唔得？」

架構重組之後，因為冇得升職而願望落空既，除左搞風搞雨既candy之外，仲有Kay。唔同既係，Kay並冇好似candy咁到處中傷公司同管理層，佢既做法係，主動走去搵kelly，要求想調去一d比較有career path同前途既職位。

我對Kay既認識唔深，工作上其實好少接觸。all I know，係佢極少極少放假，而且返工永遠係準時。平日做事亦好抵得諗，係個可靠既好員工。

由於佢既年資相對比較長，好多人都估架構重組之後，佢應該會有得升。不過響選擇升級人選既時候，kelly好快就將佢rule out左。原因大概係，kelly認為佢冇乜management既quality，雖然紀律好好，但比較怕事，遇到相對「危急」事情發生果陣，表現得好唔鎮定。如果要佢lead人，應該會有麻煩。

Kay有希望晉升既期望，我覺得可以肯定。響kelly眼中，Kay做跟佢原本既位置，工作做得好好，好稱職，不過要再上既話，就應該唔得啦。at least，呢個moment未得。

Kelly對於自己冇選擇升阿Kay，其實一直耿耿於懷。一方面佢覺得Kay既工作態度同責任心，響現有一班同事之中係數一數二，好值得獲得一d回報，但另一方面，kelly亦好清楚，kay有一d人性既弱點，另佢冇辦法再往上爬。升錯一個人，往往會有更大既麻煩跟尾，所以kelly最後都係揀左另一個佢認為更適合既人去升。

至於senior既title呢，當係一個安慰獎啦，工作性質冇改變，人工著量加些少，佢依然冇做到任何management role既工作，唔駛lead人，即是唔會對公司有破壞，但係話晒都叫做升左，at least settle到佢些少希望向上既「野心」，佢自己過往既工作表現so call叫做得到肯定，kay自己個心都會好過d。呢個就係kelly既「如意算盤」。

「kelly，我知你心地好，唔想kay失望。」我嘆左口大氣：「老實講，你其實覺得，如果阿kay要上，仲差幾遠？」

「hmmmm」kelly想了想：「其實都仲有d距離。」

「又老實一句，」我問：「你覺得佢其實有冇potential丫？」

kelly搖了搖頭：「不過可能係我睇錯都唔定呢。」

「我會選擇，坦白同佢講…」我說：「話俾佢知，佢響我地呢間公司未必會有前途，如果佢真係想響事業上仲更上一層樓既話，佢可能要考慮出外面闖闖。佢係一個好好既員工，只不過你同我都睇唔到佢響呢度可以再上，佢年紀唔細，要轉工可能係最後機會，我反而覺得，我地唔應該俾一個假希望佢，等佢繼續留響度，但其實係冇將來架囉。」

我係咁諗，響我既眼中，唔係每個同事都有potential向上既。果d我覺得有既，我會盡力留住，至於果d我覺得potential較低既，如果佢地甘心求個安穩，唔望事業上要更上一層樓既，我當然樂意佢地繼續留響度。但係如果佢地好想上，但我又已經認定佢地係「唔得」既，咁既時候，俾個安慰獎佢，對佢一d好處都冇。冇錯，或者我會買到一d時間，等佢繼續留響我公司，做公司裡面其中一個齒輪，但與此同時，我其實亦響度浪費緊佢既青春。我得到佢幾年既勞動力，但佢卻損失左幾年既寶貴青春。為既，只係因為僱主所俾既假希望。

「你頒個安慰獎俾佢，」我說：「其實等於欺騙緊佢既青春，可能會好心做壞事。」

我寧願坦白一d。

給自己的解釋

2009-08-26T15:31:00.002+08:00

我公司大約有四十人，假設我將佢分組，以五個人一組計算，而每組又只有一個組長的話，換句話講，公司裡面會有八個manager既職位，三十二個ground level既員工。

咁最理想既combination係，四十個人之中，有八個「特別」有領導材能而且比較有野心，咁呢八個人就順理成章咁成為manager，而另外果三十二個人呢，全部都係安份守己並且知足常樂既員工，野心唔好太大，但又有足夠既責任心去完成手上既工作。如果係咁，團隊應該係最穩定，效率亦都係最高。

咁當然，發夢都冇咁早。現實當然唔會係咁。事情好多時往往係，有能力果個未必想升想背負太多責任，冇能力果個又以為自己好有能力然之後好恨升，有野心既同事又未必代表佢一定肯付出，冇野心唔想升果個偏偏係最肯承擔，諸如此類。

ok，簡化一d，我假設所有員工都其實eventually會希望公司提供到career path俾佢，希望向上爬既。咁以現行公司既structure黎講，四十個人裡面，只會有八個得償所願，其餘三十二人都會得唔到自己想要既回報。

事實就係咁，咁當你所希望得到既回報，同你真實你所得到既有所出入的話，你會點樣自處？你會俾一個點樣既解釋自己，話俾自己聽，點解我得唔到我想得到既野？

我同同事講，如果你喜歡將個解釋放響我呢個老闆身上，認為係我既責任，咁諗你開心d既，我冇問題。不過，你要搞清楚兩件事：第一，將責任推落我身上，將我作為「你得唔到你想要既回報」既「終極解釋」，你係咪真係覺得開心左，覺得好過d先？唔係既話，我俾你打我小人就變得好唔抵。第二係，即使你將責任推響我呢個老細身上，心裡面鬧到我幾體無完膚，笑我白癡低能有眼無珠都好，事實依然唔會為你改變，直至你自己肯為自己既將來作出改變為止。

響自己既心入面，搵一個落台階等自己有覺好訓，唔難既。不過有時一個落台階好似一粒止痛餅咁，藥力過左，痛楚就會返番黎。心裡面短暫地落左台，但事實並唔會因為你心裡面「落到台」而為你改變。於是一切依舊，痛苦依然。

現實

2009-08-21T11:43:00.006+08:00

oh well，呢個世界有好多好難聽好難接受既現實，其中一個，係「你既同事比你更優秀，所以今次升職果位唔係你。」

面對願望落空既同事，係我地呢班所謂管理層其中一個最大既挑戰。點解升阿甲唔升阿乙，下面班同事往往想知道箇中原因，而原本諗住自己應該「眾望所歸」既阿乙，其實更加需要一個落台階。

經過一個禮拜既「實地觀察」，呢篇本來應該叫做《辦公室實驗(3)》…如果你仲記得之前果兩篇係講乜野的話。

*****

人既天性係喜歡得到別人認同自己既能力既，包括小弟本人。不過一個mature既人同一個唔成熟既人，其中一個最大既分別，我覺得在於當你既能力唔能夠得到身邊既人以行動表示去認同既時候，你對自己既信心會有幾大既動搖。

作為一個仆街既老細，同事同我既關係，係一個明買明賣既交易。我俾人工你，買我認為值得既工作能力同才能返黎。你收得我既人工，你就offer你所承諾既勞動力俾我。假如有一日，你認為我睇得你太低，冇俾足夠既機會你，ok，then let's go back to the contract，按照合約訂明，大家係可以「和平分手」，你離開我既公司，出去證明ck唔識貨，我既眼光係錯既。

事實上，老闆亦不過係一個平凡人，睇錯人又或者低估左某某員工既能力，係經常會發生既事。如果你覺得我睇錯左你，你出去闖一闖啦，please prove me wrong。

*****

老細唔俾機會自己上既感覺，我試過丫。問題係，你點回應囉。

假如你因為今次升職冇你份，然之後心生怨恨，響同事之間搞埋d抹黑呀、無中生有既是是非非出黎，咁我就更加認為自己係冇睇錯你。唔揀你去升，係正確既選擇。

一生人裡面，時來運到之餘仲要講人夾人緣，唔係每個人都會係自己既伯樂。正如我此時此刻就未必係你人生之中既伯樂咁囉。如果你嬲我睇你唔起，其實問題唔大。事實上我可能真係睇錯你都唔定，不過如果你想為自己「上唔到位」去搵一個落台階既話，please，go somewhere else然之後去證明自己既實力，用事實黎打甩我既牙骹，用事實黎證明我有眼無珠。

你選擇用把口，無中生有咁搞是搞非，只會話俾我聽，你根本連自己都唔信自己掂。你只係響度搵落台階俾自己。將未能更上一層樓既責任推去老細、上司同埋比你爬得高既同事身上。

只係你以為你個心會好過d。但事實依然係冇改變。睇你唔起既人依舊係睇你唔起。習慣自己呃自己既結果係，一生人只有繼續原地踏步，到人生去到盡頭既時候含住一大口怨氣入棺材。

*****

「candy，你係呢四個人裡面，年資最耐既同事。」放工後我約左candy單獨見面：「另外果幾個，都係小妹妹，入世未深。佢地既環境都麻麻地，冇你屋企環境咁好，手停口停。工作對佢地黎講，比對你重要好多。但係事情發展到今時今日，你覺得我應該點樣處理？」

candy冇出聲，面上一副深深不忿。

「你一向響班姊妹當中，聲稱自己最講義氣。」我說：「你有本事將事情搞到好似今時今日咁既局面，你應該都有本事收拾返呢個殘局。我想你知道，如果呢個殘局你唔親自收拾返，佢地三個將來我根本冇辦法再用。你一直以黎口口聲聲話自己係義氣仔女，就唔該做返義氣仔女應該做既事，唔好淨係為左自己條氣唔順而去連累自己班姊妹。」

「我有一個星期既耐性，點樣做由你自己決定。」

*****

祝大家有個愉快既週末。

就係咁囉。

2009-08-21T09:40:00.005+08:00

燦嫂話：「我地呢一代，係焗賭焗捱既一代，賭贏肯捱未必收到錢，但唔賭唔捱一定係咁先。」

燦嫂英明。

其實，現實就係咁囉。世界難捱搵食艱難，呢個係鐵一般既事實。機會既數量比以前果幾代人少，呢個亦都係事實。唉，咁點呢？再怨再鬧再媽叉，事實依然係事實，並唔會因為你怨多幾句就會改變，而你鬧多幾句，又唔見得真係會令你釋懷左開心左丫。

剩返落黎既選擇係，安安落落地接受現實，選擇知足常樂，又或者接受承受風險，打死罷就咁搏同捱囉。

偏偏大部份人，都會揀呢兩個選擇以外既choices。

我其實一直懷疑，呢兩個選擇以外既choices，其實係咪真係存在。

*****

燦sir篇文講起真人show，唔知點解，我對呢類「有錢仔體驗窮人生活」既橋段，覺得好反感。ok，有錢仔有錢女食慣嘆慣，突然之間體驗左大拿拿幾日窮人生活，然之後有甚麼甚麼得著，又有甚麼甚麼體會。come on。

我反而覺得，類似既節目，拍得幾用心同真實都好，只會將社會仇富既情緒升級。

我首先覺得唔明既係，點解果班有錢人要「親身體驗」先能夠知道窮人生活有幾難捱？咁俾佢地體驗完之後，你又想佢地之後點樣做人？好「同情」班窮人？大佬，窮人要既唔係同情呀，係脫窮既機會呀。

又，我響度諗，生活體驗或者可以話到俾班有錢仔女知，有人既生活「真係」比自己辛苦好多，「大拿拿」體驗百幾粒鐘喎。生活體驗既盲點係，你由開始果一刻，就知道呢個唔係你真正面對既現實，而且即使個體驗過程looks like幾咁真實都好，你依然好清楚，響不久之後，係會有「完結」既一刻。咁我就諗啦，你知道唔係真實，又知道會完結，咁查實你會feel到d乜？體驗到d乜？

窮人生活艱難，唔駛講都應該知。但最慘既，唔單止係日常生活質素唔好咁簡單喎，而係佢地見唔到將來，感受唔到有改善既機會果一種無助感，而且呢種感覺，永遠好似睇唔到盡頭咁。你去體驗百二粒鐘，明知時間一過你既生活就可以回復奢華，咁我好難相信，你會feel到班窮人果種絕望既感受喎。

我時不時就會聽到有d有錢既朋友，又話去甚麼甚麼三十天生活體驗，又話去邊度feel下生活困苦既感覺係點，又話送d仔女去體驗下乜乜物物，陪養佢地乜乜精神之類。或者我響呢方面比較偏激，我總覺得佢地係冇事搵事黎搞，錢多得滯唔知做乜多過真係想體會d乜野返黎。

小插曲

2009-08-13T21:45:00.012+08:00

三個星期前。

「ck我放棄啦，我真係諗唔到辦法。」june坐響我前面：「我其實有時真係覺得，我可能永遠都冇能力上到你要我上既位置。我唔係你諗果種資質…」

除左kelly之外，june係我響中環office裡面，work得最close，又跟得我時間最耐既同事。june好努力，好committed。係個可靠既好員工，不過相比kelly既圓滑世故，june就顯得比較唔識變通同直腸直肚。或者咁講，kelly係個好好既decision maker，而june呢，佢既能力就反而響execution之上。要佢諗策略同諗橋，往往係佢較弱既一環。

june冇讀過大學，對此佢一直耿耿於懷。我覺得佢對自己呢一個background，一直有一種講唔出既自卑感。曾經唔只一次june同我表示過，佢樓下班下屬，個個學歷都高過佢，令佢覺得好唔安落。有時甚至覺得，因為學歷上既背景，增加左佢管理既難度。

最近我既脾氣變得比較大，我對june最近負責幾件事，都有些少微言。或者我語氣真係太重啦，不但幫唔到june去解決問題，反而勾起佢心裡面既一d自卑感。

「放棄拿？」我問。

「嗯。」june點了點頭：「我覺得我真係冇你要既能力。未夠班就係未夠班。」

房間內只有我地兩個，june講完之後，大家沉默左好一段時間。

「你同我一齊工作左就快六年…」我嘆左口大氣：「記得嘛？」

「記得。」june點了點頭：「我過probation果一日，kelly就黎見工。」

「仲記唔記得，六年前你入黎果陣，公司係點樣嗎？」我問。

june微笑點左點頭。

「六年前你黎見工果陣呢，我地仲響工廠大廈，我地既客人全部都係d唔三唔四，交完貨俾佢分分鐘會走佬唔俾錢既人…」我得戚地笑了笑：「家陣就唔同啦，我地響中環甲級寫字樓，同我地拗手瓜既對手，全部係行業裡面最頂班，規模最大既跨國企業。衣家就算係我地呢行既龍頭都要忌我地三分呀，哈哈。」

「單係一個大學學位，唔會有能力令呢個轉變出現架。」我拍左一拍june既膊頭。

我並冇講出口，但我心裡面其實仲有下一句：「不過你卻有份製造呢個轉變喎。」

哈哈，好老土。

唔係每個人都有好好既出身，又或者好既學歷。afterall並唔係你既背景或者學歷決定你既價值，而係你所做出黎既野，所achieve到既東西。

同june一樣，kelly入黎做既時候，一樣係一個冇讀過大學既小妹妹。或者你會話，以當日公司既規模，你只可以請得到好似佢地「咁上下」quali既員工。但事實係，公司呢幾年能夠向前行同不斷長大，所依賴既，亦係佢地。如果換左一班學歷好d，背景同出身都好d既同事，作為公司起步時既cornerstone，成績係咪會更好？

may be…may be not。

但係我覺得，佢地經已做得好好。

比好多人都更好。

*****

祝大家有個愉快既週末。

辦公室實驗（二）

2009-08-11T23:48:00.009+08:00

「CK，唔駛特登飛返黎啦…」長途電話傳黎kelly既聲音：「你想落branch視察一個禮拜，不如等我幫你去啦…」

「no no no，kelly你唔明我用意呀…」我襟著speaker phone：「架構改組係我離開中環之前搞出黎既，佢地好清楚我先係始作俑者。佢地目標係我呀，你代我去既話，冇效果架。」

「但係你想observe d乜野result先？」kelly問：「講真，我唔覺得你落場坐足成個星期，會得出一d同management data有太大出入既結果囉。」

「其實你同我都好清楚…」我說：「真正既問題，並唔係佢地口中所講既『工作量』增加啦，呢個『工作量』既議題，係佢地用黎借題發揮既煙幕黎既遮。真正既問題，係仲未清晰浮出黎既心病。講真，如果真係如佢地口中所講，係『工作量』令佢地反感既話，解決反而容易，輕輕減少少佢地既daily work，就已經回應左佢地訴求，短期可以阻止佢地既麻煩。不過太obvious啦，你同我都睇得到，真正既問題根本唔響呢度。」

「不過坐一個禮拜有用咩？」kelly又問：「你知佢地，聽到老闆話會返黎坐鎮，好似監視佢地咁，其實仲反感呀。」

「哈哈，呢個我預左，不過事情並唔係佢地所以為咁既。」我嘆左一口大氣：「你同我都知道，所謂『工作量』只係佢地借黎發洩既煙幕。我返黎坐，亦無興趣監視佢地，更加唔係打算想觀察到d乜驚人發現。要observe既，你都observe左啦。你既觀察能力比我仲強啦，你都話冇問題，我其實又會observe到d乜丫？」

「下？」kelly大概被我搞到一頭煙：「咁即係點呀？」

「我想好好地，同佢地傾下。」我吞了一大啖口水：「不過事情發展到衣家呢個地步，要setup一次有效果，大家都願意坦誠既對話，事前要做多一d功夫。否則佢地只會繼續借煙幕黎發洩不滿，你同我永遠都唔會知道真相。」

「所以你先要擊破佢地既煙幕？」kelly似乎開始明白。

「嗯。我一日唔棟響佢地面前，唔俾佢地feel到我曾經親眼目睹過佢地既工作量有幾多，佢地呢個煙幕，都仲有條件繼續成立。煙幕一日響度，都唔會有機會可以聽到真說話。一個星期係我『估』應該夠既時間既遮，到時睇情況啦，唔好彩既話，可能仲要耐d都未定。」

「唔怕佢地反感咩？」kelly有點擔心。

「唔怕，我未返黎，佢地anticipate緊我返黎『監視』佢地，感覺越差越好。我反而覺得，開頭既感覺越差，往後既工作反而越容易做。當佢地發覺，老闆坐鎮之後，都冇乜認真管束佢地，afterall並唔係佢地想像中咁差，反而對抗既心態會容易慢慢鬆懈落黎，之後既對話反而會容易一d。」

kelly嗯了一聲。似乎已經明白我響度諗緊乜。

「我需要用呢段時間，同呢幾個同事建立一d關係。」我說：「要build一d trust。否則問題解決唔到。afterall，呢次係心病多過實際工作問題。我心裡面對問題起因有一d idea，即管睇下我有冇估錯啦，我覺得，只要佢地有勇氣響我面前，坦白咁親口講出黎，佢地既怨氣先能夠釋放，問題先會得到解決。」

「查實你下個月都返黎啦…」kelly：「真係有需要提早飛返香港處理呢單野？」

「setup既一部份黎既。」我話：「一來我掛住屋企人，想早d返黎，二來，consider同事接收到既message丫，老細『特登』飛返黎處理呢單野，多少反映左要解決呢件事既決心既。」

我都知，其實，係場戲既一部份。

又，可能到頭黎係我自作聰明估錯晒都唔定。

辦公室實驗（一）

2009-08-10T18:34:00.005+08:00

公司架構改組後接近三個月，情況大致上算係滿意。同事最初由好抗拒，到慢慢發覺改組後自己既工作量並冇特別增加，開始放低佢地既「武裝」，亦開始樂意融入呢一個新既公司架構裡面。

一切順利，除左其中一個branch office裡面既一team同事。

呢一team既同事，繼續投訴公司改組後，工作量大增，對佢地好唔公平，而且情況越黎越壞，說話亦越黎越激。佢地不斷投訴管理層改革太急太快，讓前線既同事辛苦不已。於是響每天既日常工作上，實行案章工作，以示抗議。

小弟既公司，同樣既team我有八條，其餘七條全部相安無事，新架構之下運作暢順，亦冇任何不滿同投訴，唯獨係呢一條team出左問題。

至於有關佢地極力投訴既「工作量大增」問題，well，公司裡面每一條team每一個staff handle左幾多個客人，用左幾多時間，全部都有figure。當然數字並未必可以反映事實既全部，但數字同時也唔懂得講大話。數字顯示，改組前後，佢地既工作量，增加既幅度極少，同佢地口中所講「大增」既距離極遠。

kelly幫我實地視察過，憑佢一對眼所得出既結論係，工作量「正常」，同另外果七條team分別唔大。不過佢所觀察既時間並唔係好長，只係一個下午左右既時間，所以結論並唔可以百份百作準。

面對呢一條怨氣極重既team，我打算親自到佢地身處既branch office，貼身坐響佢地後面一整個星期，睇清楚，到底係我手上既數據出錯，還是同事們響度誇大其詞。

感覺有點似做實驗。

管理自己

2009-08-07T23:44:00.007+08:00

「CK，最近你脾氣真係好大喎…」kelly偷偷地同我講：「再係咁，班同事就快怕左你啦。」

嗯，其實我知既。

*****

管理既工作當中，其中一項最困難既，往往係管理自己。管理者既focus總係習慣放響管理他人身上，而自己既一言一行，反而會「有意無意」咁忽略。

老闆係公司裡面，位於食物鍊最頂部既「動物」，可以有無尚權威。只不過我響度諗，當我最近每次開會，響道埋怨同事們唔肯諗野又或者做唔到我要求既時候，到底我呢一肚既怨氣，帶到d乜野俾公司？

姑勿論同事佢地係真唔掂又好，假唔掂又好，我呢一肚既怨氣，所得出黎既結果係：同事唔開心，佢地既自信心被打擊，我亦唔開心，埋怨既心情同挫敗既感覺冇改善過，公司亦冇得益，解決唔到既事情依然停留響同一個未解決既階段。

therefore，三輸。

感覺好似練功過度，走火入魔身體開始有怪異反應一樣，最後分分鐘可能經脈盡碎，死鬼左都唔知乜事。老細響冇更高既權力監管底下，每日就好似不停徘徊響瘋狂練功同走火入魔既邊緣遊走。

最大鑊既係，當你開始走火入魔既時候，你自己往往唔會發覺。而當你發覺既時候，往往又已經太遲。

又，你可以選擇搵十萬個理由去解釋你點解會走火入魔，將所有責任推到去其他人既身上面，然之後縱容自己，繼續行呢條成魔之路，直至有一日覺得後悔但又已經冇得返轉頭為止。

我需要一點清醒。

祝大家有個愉快既週末。

痛恨呀邊個邊個

2009-08-03T22:58:00.010+08:00

本來想就有關擦鞋仔既題目，發表好大篇謬論既。不過，我見大家既留言，其實都講左好多，而且有好多同我心裡面所諗既，其實都好接近，所以呢，係咁簡單寫幾句當交功課算啦今次。

-好鍾意CM既講法，impression management，其實人人都做緊，做多做少咁解啦。做得恰到好處既你會話佢叻仔，做得過火左既，你就會鄙視佢話佢擦鞋同拍馬屁。不過我響道諗，假設impression management真係人人都有做既話，你咁痛恨果班擦鞋仔，其實算唔算50步笑100步？

-痛恨擦鞋仔既人，好多時都係有咁既聯想：呀邊個邊個，乜都唔識做，淨係識擦鞋，上位都係全靠擦鞋之嘛。咁個老細呢？死蠢黎個囉，俾人拍馬屁拍到飄飄然，盲左架啦，邊個做到野邊個淨係識拍馬屁，仲邊識得分？hmmm，我既諗法係，擦鞋係佢成個人既一部份，一個好鍾意擦鞋既人，同做唔做到野，照計應該冇乜抵觸架喎。一個每日同我講十次：「CK老闆你真係好靚仔」既伙計，一樣可以好做得野好幫得手。不過如果真係有個咁既同事同我講d咁既野，我會提議佢快d去驗眼咁囉。

-好多老闆都唔多醒目，我知，不過我又覺得佢地未至於蠢到好似好多人所諗咁。除非你真係極度自大狂既遮，否則同事對自己既讚美說話有幾成真，好容易feel得到。我聽過有d同事講：「老闆都盲既，阿邊個邊個擦鞋擦到出晒面都睇唔出！」咁我就心諗啦：「咁，即使查實我睇得出，咁你又想我對佢做d乜？」

唔通叫我炒個同事魷魚，係因為佢鍾意讚我靚仔咩？

-又，擦下鞋就可以上到位，有冇咁易呀。如果有個邊個邊個，日日走黎讚下我靚仔就有人工加，咁我肯定全公司既同事都日日走黎話我有型過吳彥祖啦下話。我有時諗，話人靠擦鞋上位既人，心裡面其實都好清楚，人地上到位，唉，其實邊有咁簡單丫，如果只係日日講幾句拍馬屁既說話就可以升職加人工，一間公司，又點會來來去去都得果一、兩個擦鞋仔咁少丫。

-響我公司成日標榜佢自己"好痛恨擦鞋仔"既同事，通常都比較有性格同有堅持。emmm，at least佢表現到好似好有性格同堅持咁啦。咁，又講真丫，辦公室裡面既工作，有好多都唔係好方便寫落個JD道。而呢d工作，你咁有性格其實又好難委派俾你做。之但係，呢d工作又似終要有人做，於是，益左d冇咁多堅持，冇咁有性格既so call擦鞋仔囉。呢d so call擦鞋仔幫老闆解決左問題，積積埋埋，老細又會俾返d甜頭佢，所以，日子耐左，佢地往往升得高過你又搵得多過你囉。

-同埋我其實好懷疑，「擦鞋仔」呢個term，多少已經俾人濫用晒。好多打工仔，鍾意將果d同老闆關係密切d，work得比較close既同事，係唔係都歸類為「擦鞋仔」。查實，人地同老細close d，唔等於一定要拍老細馬屁架喎。我升kelly職果陣，公司一樣有同事話佢靠擦鞋先上得到。oh well，我心諗，kelly平時成日同我撐到行，要佢擦我鞋，我諗佢揀死左好過。

-hana話，衣家好多人，當見到人上位果陣，就不其然習慣去話人靠美色靠擦鞋。我又唔排除，真係有d咁既人存在，不過響擦鞋同美色以外，上到位果班，通常都真係仲有d料既。佢地能夠得到老闆信任而你得唔到，除左歸咎你老細唔夠你聰明，睇唔出你文武全才卻又有性格唔鍾意賣弄之外，有時，都不能抹殺你眼中果件擦鞋仔，曾經付出過既努力既。

風光背後，都未必一定咁黑暗既。

又，無啦啦俾人誤會係擦鞋仔，俾人痛恨既感受，應該唔係咁好feel架咋。標籤呀邊個邊個「靠擦鞋上位」之前，問一問心先，你會唔會寃枉左好人呀？

突然諗起聖經裡面果個執石頭擲人既故仔，唉，好老土呀，唔講啦。